Read Te Tusi Tapu I Te Gana Tuvalu Lomiga Lua ISAIA 51 Bible Online

ISAIA 51 - Te Tusi Tapu I Te Gana Tuvalu Lomiga Lua bible

ISAIA 51

¹Muna a te Aliki, “Fakalogo mai ki a au, koutou kona e manako ke fakasao koutou, Koutou kona e o'mai ki a au mo se fesoasoani. Mafaufau ki te kaupapa ne o'mai ei koutou, Ki te koga ne keli mai ei koutou.

²Mafaufau ki te otou tupuga ko Apelaamo, Pela foki a Sala tela ne tupu mai ei koutou. I te taimi ne kalagagina ei ne au a Apelaamo, Kae e seki ai ei sena tamaliki. Ne fakamanuia ne au a ia, Tuku atu ei ne au se fanau ki a ia; Ne fakatokouke ne au a tena gafa.

³“Ka fakaasi toku alofa ki a Ielusalema, Pela foki ki a latou katoa kola e nofo i ona koga ne maofa. E ui eiloa ne masei valevale tena fenua, Kae nei ka fai ne au mo fatoaga, E pela mo te fatoaga tela ne toki ne au i Etena. Ka iai te lifu mo te fiafia i kona, Pela foki a pese o tavaega mo fakafetai ki a au.

⁴“Toku fenua, fakalogo mai ki a au, Fakalogo mai ki aku muna: Ne avatu ne au aku poloakiga ki malo; Ko aku tulafono ka aumai ei latou ki te mainaga.

⁵Au ka vau fakavave o fakasao latou; A te taimi o toku manumalo ko pili mai. Au ka pule i malo. A fenua mao e fakatali mai ke fanatu au; E fakatalitali mo te fakamoemoega ke fakasao latou ne au.

⁶Kilo aka ki lagi; kilo atu ki te lalolagi! A lagi ka galo atu e pela me se au; A te lalolagi ka pala pela me se laugatu ko leva, Ka ko tino katoa i ei ka mate e pela me ne lago. Ka ko te fakaolataga tenei ka aumai ne au, Ka tumau ki te se gata mai; A toku manumalo ka tumau ki te se gata mai.

⁷Fakalogo mai, koutou kola e iloa ne koutou te mea tonu, Kola e taofi mau ki aku akoakoga. Sa ma'taku manafai e fakalili koutou ne tino kae faka'itaita ki a koutou;

⁸Ka galo atu latou e pela me ne laugatu ne kai ne mogamoga! Ka ko te fakaolataga tenei ka aumai ne au Ka tumau ki te se gata mai; A toku manumalo ka tumau ki te se gata mai.”

⁹Te Aliki, ala ake o fesoasoani mai ki a matou! Fakaaoga tou mana o fakasao matou; E pela mo te fakaaogaga sale ne koe i aso taumua. Ko koe ne katikati ne koe a Lahapa,[53] Te manu fakamataku o te tai.

¹⁰Ko koe foki ne faka'masa pakupaku ne koe a te tai Kae fai te auala i loto i ei, ko te mea Ke mafai o olo i loto a latou kola e fakasao ne koe.

¹¹A latou kola ne fakasao ne koe Ka oko atu ki Ielusalema mo te fiafia, E usu pese kae kalaga mo te fiafia. Ka fiafia latou ki te se gata mai, Me ko sao ki te se gata mai, mai i te nofo fanoanoa.

¹²Muna a te Aliki, “Ko au ne fai ne au koe ke malosi. Ai a e mataku ei koe ki te tagata ola, Tela e se tumau pela fua me se mouku?

¹³Ko puli i a koe a te Aliki tela ne faite ne ia a koe, Tela ne fola ne ia a lagi Kae fakavae ne ia a te fakavae o te lalolagi? Ai a ka nofo mataku faeloa ei koe Ki te kaitaua o latou kola e pule fakasaua ki a koe, Pela foki ki a latou kola e fakatoka o ta fakamasei a koe? A te lotou kaitaua e se toe mafai o oko atu ki a koe.

¹⁴A latou kola e nofo fakapagota ko pili nei o fakasaoloto; Ka ola latou i se olaga leva Kae uke olotou meakai e maua.

¹⁵“Au ko te Aliki te otou Atua; E fakagasue ne au te tai Kae fai ne au ona galu ke pa'ku. A toku igoa ko te Aliki Malosi!

¹⁶Ne fola ne au a lagi,[54] Kae fakatakato ne au a te fakavae o te lalolagi. Ne fai au ki a Ielusalema penei, ‘A koe ko toku fenua! Ko oti ne avatu ne au ki a koe aku akoakoga, Kae ne puipui ne au a koe ki toku lima.”’

¹⁷ Ielusalema, ala mai! Ala mai kae tu mai ki luga! Ko oti koe ne inu i te ipu o te fakasalaga tela Ne avatu ne te Aliki i tena kaitaua ke inu koe ki ei; Ne inu koe ki ei, kae ne takasese ei koe.

¹⁸E seai se tino e taki ne ia koe, E seai se tino mai i tino o tou fenua ke puke mai ki tou lima o taki koe.

¹⁹E lua mea faigata ne oko atu ki a koe: Tou fenua ne fakamaseigina i te taua, Mo ou tino ne mate fia'kai. E seai se tino ke alofa atu ki a koe.

²⁰I feitu o auala katoa A ou tino ko siga valevale fua i te vaivai; Ko pela me ne 'tia kola e lave i te tili a te tagata afuli manu. Ko oti ne lagona ne latou a te malosi o te kaitaua o te Atua.

²¹Koutou tino Ielusalema kona e puapuaga, Koutou kona e takasese pela me ne tino kona,

²²A te Aliki te otou Atua e pulu ne ia koutou kae fai mai penei, “Ka ave nei ne au keatea a te ipu tela ne avatu ne au i toku kaitaua. Ka se toe inu koutou i te uaina tela e fai ne ia koutou ke takase'se.

²³Ka tuku atu ne au ki a latou kola ne pule fakasaua ki a koutou, Kola ne fai ne latou koutou ke takato i auala Kae lakalaka ne latou koutou, E pela koutou me ne pefu.”