Read Te Tusi Tapu I Te Gana Tuvalu Lomiga Lua ISAIA 52 Bible Online

ISAIA 52 - Te Tusi Tapu I Te Gana Tuvalu Lomiga Lua bible

ISAIA 52

¹ Ielusalema, fakamalosi ke toe takutakua foki koe! Te fa'kai tapu o te Atua, teu tou foitino ke gali! Ka se toe ulu atu eiloa a tino fakaatea ki loto i ou mataloa.

²Ielusalema, fiti aka ke saoloto koe! Tu aka mai i te pefu o sagasaga i luga i tou nofogaaliki! Koutou tino o Siona kola ne ave fakapagota, Tala aka a seni kona e saisai ei koutou!

³Muna a te Aliki ki tino o tena fenua, “i te taimi ne fai ei koutou mo pologa, e seai eiloa se tupe ne togi mai mo koutou; e pena foki manafai ko fakasaoloto koutou, e seai foki se tupe e togi atu mō fakasaoloto koutou.

⁴I te otou ologa o nofo i Aikupito pela me ne tino fakaalofa, ko te otou loto eiloa ke olo koutou o nofo i kona; ne ave malo koutou ne Asulia, seai se tupe ne togi mai mō te avega o koutou.

⁵ Kae nei, e pena foki te mea ko tupu i Papelonia: a koutou e nofo fakapagota, seai se tupe ne togi mai mō koutou. A latou kola e pule i a koutou e faipati fakamatamata kae fakaasi faeloa te lotou takalialia ki a au.

⁶I taimi mai mua nei, ka iloa tonu ne koutou i a au ko te Atua, kae ka iloa foki ne koutou i a au ko oti ne faipati atu ki a koutou.”

⁷Ko oko eiloa i te gali, manafai e lavea atu se avefekau e vau mai i mauga, O aumai se tala 'lei, ko te tala o te filemu! E folafola mai ne ia te manumalo kae fai mai ki Siona penei, “A tou Atua ko te tupu!”

⁸A latou kola e tausi ne latou te fa'kai e kalaga fakatasi ona ko te fiafia! E lavea ne latou ki olotou mata a te fokimaiga o te Aliki ki Siona!

⁹Ka'laga mo te fiafia, koga ne fakamasei o Ielusalema! Ka fakasao ne te Aliki a tena fa'kai Kae fakamafanafana a loto o tino o tena fenua.

¹⁰A te Aliki ka fakaaoga ne ia a tena mana tapu; Ka fakasao ne ia a tino o tena fenua, Kae ka lavea katoa ne te lalolagi.

¹¹ Masaua ke tiakina ne koutou a Papelonia, Koutou katoa kona e tauave Ne koutou a mea o te Faletapu! Sa puke se mea tela e fakalailai ne ia koutou i feitu fakatapuakiga;[55] Tausi otou foitino ke malu, kae na olo.

¹²I te taimi nei, a koutou e se fakavavave o olo keatea mai i Papelonia; A koutou e se sola keatea ke sao koutou. Ko te Aliki te otou Atua ka 'taki ne ia koutou kae puipui koutou i otou feitu katoa.

¹³Muna a te Aliki, “A taku tavini e iku manuia eiloa tena galuega tena e taumafai o fai, Ka maua ne ia se fakaaloaloga maluga eiloa.[56]

¹⁴E tokouke tino ka po manafai e lavea ne latou a ia; Ko oko eiloa i te se lei o tena foitino, tela la, Toe itiiti eiloa kae se foliga mai pela me se tino ola.

¹⁵ Kae nei, e uke a malo ka ofo i a ia, Mo tupu ka se maua o fai ne pati i te ofo i a ia. Ka lavea ne latou, kae malamalama I se mea tela e seki iloa eiloa ne latou.”