Read Te Tusi Tapu I Te Gana Tuvalu Lomiga Lua ISAIA 53 Bible Online

ISAIA 53 - Te Tusi Tapu I Te Gana Tuvalu Lomiga Lua bible

ISAIA 53

¹ Ne tali mai a tino penei, “Ko oi ka talitonu ki mea konei e fakamatala atu ne matou? Ko oi ne lavea ne ia me ko te Aliki ne fai ne ia a te mea tenei?

²Ko te loto eiloa o te Aliki ko tena tavini Ke tupu aka pela me se lakau tela E mau ona aka i se laukele malo. E se takutakua io me gali, E seai se mea e tau ei o fia kilokilo tatou ki a ia. E seai se mea e gali ei a ia, Seai se mea e tau ei tatou o fia olo atu ki a ia.

³A matou e se fiafia kae takalialia i a ia; E kufaki eiloa ne ia a te puapuaga mo te mae. E seai eiloa se tino e fia kilo ki ei — E se fia saga foki matou ki a ia, Pela eiloa a ia me se mea seai.

⁴ “Ne kufaki eiloa ne ia a te puapuaga Tela ne tau o puapuaga i ei matou, Mo te mae tela ne tau eiloa o mae i ei matou. A matou ne leake eiloa nei i tena puapuaga se fakasalaga mai i te Atua.

⁵ Kae tela la, ne pakia a ia ona ko omotou agasala, Ne kini ona ko amioga masei a matou ne fai. A matou ko fakasaogina i fakasalaga ne mae ei a ia, Ko ola matou ona ko kini ne oko ki a ia.

⁶ A tatou katoa ko pela me ne mamoe ko galo, Ko fakatau olo eiloa tatou i o'tou auala taki tokotasi. Ka ko te Aliki ne tuku atu ne ia te fakasalaga ki a ia, Ko te fakasalaga tela ne tau o paku ki luga i a tatou.

⁷ “Ne fai fakamaseigina a ia, kae ne kufaki eiloa ne ia mo te loto malalo; E seai eiloa sena muna ne fai. E seai eiloa sena pati ne fai, E pela me se mamoe tela ka ave o ta, Pela me se mamoe tela ka ave o vele ona fulufulu.

⁸Ne puke fakapagota a ia, iku tena fono ke tamate, Ko te mea eiloa ko ave o tamate, Seai eiloa se tino ne saga mai ki te ikuga tena ko oko ki a ia. Ne tamate a ia ona ko agasala a tatou.

⁹ Ne tuku a ia ki te tanuga fakatasi mo tino amio masei, Ne tanu fakatasi a ia mo tino maumea, Kae tela la, e seki fai ne ia se agasala, E seki faipati foki eiloa ki se muna loi.”

¹⁰Muna a te Aliki, “Ko toku loto eiloa ke puapuaga a ia; A tena mate se taulaga e aumai ei te fakamagaloga o agasala. Tela la, ka lavea ne ia a tino o tena gafa; Ka ola leva a ia, Ka taunu foki toku fakamoemoega e auala i a ia.

¹¹Kafai e oti atu te olaga puapuaga o ia, Kae ka toe maua ne ia te fiafia; Ka iloa ne ia me ne seki sona puapuaga a ia. A taku tavini fakamaoni, tela e fiafia au ki ei, Ka amo ne ia te fakasalaga o tino katoa, Tela la, ka fakamagalo ne au latou ona ko ia.

¹² Tena la, ka avatu ne au ki a ia se tulaga fakaaloalogina, Se tulaga ke pau ei a ia mo tagata takutakua kae malosi. Ne tuku atu tena ola mo te loto malie Kae ne mate fakatasi mo tino amio masei. Ne sui ne ia a tino agasala e tokouke Kae ne talo a ia ke fakamagalo a tino agasala kona.”[57]