Read Te Tusi Tapu I Te Gana Tuvalu Lomiga Lua ISAIA 54 Bible Online

ISAIA 54 - Te Tusi Tapu I Te Gana Tuvalu Lomiga Lua bible

ISAIA 54

¹ Ielusalema, a koe ne pela me se fafine seai sena fanau, Kae nei ko mafai ne koe o usu pese kae kalaga mo te fiafia. Nei, ka tokouke atu au tamaliki i lo te fafine tela e seki tiaki eiloa ne tena avaga!

²Fakalasi aka a te faleie tena e nofo koe i ei; Fakaloa aka ona lopu kae fakamalosi ona pine!

³Ka fakalasi ne koe ou tuakoi i feitu katoa; A ou tino ka toe puke mai ne latou a laukele konei e nofo i ei a tino o nisi malo. A fa'kai konei e lavaki nei, ka toe fonu i tino.

⁴Sa mataku, a koe e se toe fakamasiasigina eiloa; Ka se toe fakaseaogagina eiloa koe. Ka fakapuli ne koe a tou se fakamaoni E pela me se fafine seki leva ne avaga, Ka puli foki i a koe a tou fi'ta I te nofo tokotasi e pela me se fafine ko mate tena avaga.

⁵A ia tela ne faite ne ia koe ka pela me se avaga tagata a koe, A tena igoa ko te Aliki Malosi. A te Atua tapu o Isalaelu ka fakasao ne Ia a koe, Ko ia ko te pule o te lalolagi katoa.

⁶Isalaelu, a koe pela me se fafine fatoa avaga, Tela ne tiakina ne tena avaga kae Ko oko eiloa i te fanoanoa. Ka ko te Aliki ne toe kalaga atu ki a koe Ke foki mai ki a ia, kae fai mai penei:

⁷“Ne tiaki ne au koe i se taimi toetoe; Ka toe puke mai ne au a koe mo te alofa lasi.

⁸Ne tiaki ne au koe i toku kaitaua, I se taimi toetoe, Kae ka fakaasi atu nei toku alofa ki a koe ki te se gata mai.” Kona muna a te Aliki tela ne fakasao ne ia koe.

⁹ “I aso o Noa, ne fai taku tautoga ke Mo a e toe fakalofia ne au a te lalolagi. Nei, au ko tauto i a au e se toe kaitaua atu eiloa ki a koe; E se toe ita atu au io me toe fakasala ne au a koe.

¹⁰E maofa a mauga, Ka ko toku alofa mō koe e se mafai o gata; Ka tausi ne au taku tautoga o te filemu Ki te se gata mai.” Kona a muna a te Aliki tela e alofa ki a koe.

¹¹ Muna a te Aliki, “Ielusalema te fa'kai puapuaga kae fakaalofa, Tela e seai se tino ke fakamafanafana atu ne ia koe; Ka toe faite ne au ou fakavae ki fatu tāua.

¹²Ka faite ne au ou taoa ki fatu taua ko lupi, Kae faite ou mataloa ki fatu kola e malapulapu pela me ne afi, Ka ko pui i ou feitu e faite ki teuga taua.

¹³ “Ko au eiloa ka akoako ne au ou tino, Kae tuku atu ki a latou te maumea mo te filemu.

¹⁴A te fai mea tonu mo te tonu ka fai ne ia koe ke malosi. Ka sao koe mai i pulega fakasaua mo mea fakama'taku.

¹⁵Kafai e taua atu se tino ki a koe, Ko tena uiga e taua atu fua kae e seki fakailoa mai ki a au. So se tino e taua atu ki a koe ka takavale.

¹⁶“Ko au ne faite ne au te tagata faite fiti, Tela ne faka'ka ne ia te afi kae faite a meatau. Ko au foki ne faite ne au a te sotia, Tela e fakaaoga ne ia te meatau o tatino.

¹⁷Kae ka seai eiloa se meatau e mafai o fakapakia ne ia a koe; Ka isi faeloa se tali a koe ki a latou Kola e taumafai o taku fakamasei koe. Ka 'pulu ne au aku tavini Kae tuku atu ki a latou a te manumalo.” Ko te Aliki tena ne faipati.