Read Te Tusi Tapu I Te Gana Tuvalu Lomiga Lua ISAIA 55 Bible Online

ISAIA 55 - Te Tusi Tapu I Te Gana Tuvalu Lomiga Lua bible

ISAIA 55

¹ Muna a te Aliki, “O'mai, koutou katoa kola e fiainu, Tenei te vai! O'mai, koutou kola e seai ne otou tupe, Togi a saito o kai! O'mai! Togi a uaina mo susu, E seai se togi o mea kona!

²Ai a e fakamaumau ei otou tupe ki mea Kola e seai se lei e maua mai i ei? Ai a e fakamaumau ei otou peofuga kae E fia'kai faeloa koutou? Fakalogo mai, kae fai te mea tenei e fai atu ne au, Kae ka kai fiafia koutou ki meakai gali eiloa.

³ “Toku fenua, fakalogo mai kae o'mai ki a au; O'mai ki a au, kae ka maua ne koutou te ola! Ka fai ne au se feagaiga tumau mo koutou, Kae tuku atu ne au a fakamanuiaga Kola ne tauto ne au ki a Tavita.

⁴Ne fai ne au a ia mo pule mo takitaki o malo, Kae ne fakaasi ne au ki a latou a toku malosi e auala i a ia.

⁵Nei, ka kalaga koe ki malo fakaatea; Ne seki iloa ne latou a koe i aso mua, Kae nei, ka tele mai latou o kau atu ki a koe! Ko au, te Aliki tou Atua, te Atua tapu o Isalaelu, Ka fakataunu ne au a mea katoa kona; Ka avatu ne au te tulaga malu kae fakaaloalogina.”

⁶Fuli atu ki te Aliki kae talo atu ki a Ia, Me ko pili mai a Ia i te taimi nei.

⁷A tino amio masei ke tiaki olotou uiga masei Kae fuli aka foki a olotou mafaufauga. Fai ki ei ke fuli mai ki te Aliki te tou Atua; A ia e alofa kae vave fakamagalo ne ia a agasala a tino.

⁸Muna a te Aliki, “A oku mafaufauga e se pau mo otou mafaufauga, A oku ala e se pau foki mo otou ala.

⁹E pela mo lagi e nofo mai i luga o te lalolagi, E pena te maluga o oku auala mo mafaufauga i lo otou auala mo mafaufauga.

¹⁰ “Aku muna e pela mo te kiona mo te vaiua Kola e to mai mai te lagi o fakasusu te lalolagi. E fakaola ei a lakau kaina Kae maua mai foki i ei a fuaga kola e toki ko maua ei te meakai mai i ei.

¹¹E pena foki te muna tela e faipati ne au — E se mafai o se fakataunu ne ia a te mea Tela ne fakamoemoe au ke fai ne ia; E fai eiloa ne ia a mea kola ne fai Ne au ki ei ke fano o fai.

¹²“Ka tiakina ne koutou a Papelonia mo te fiafia; Ka taki koutou ki tua mo te fa'kai mo te filemu. A mauga ka usu pese, mo lakau ka kalaga mo te fiafia.

¹³A lakau ko pelosi ka ola ake i koga konei e ola ei a lakau makaikai; A lakau ko metolo ka tupu ake i koga ne ola ei a vao talatala. A te mea tenei se fakailoga tela e tumau ki te se gata mai, Se fakamasauaga o te mea ne fai ne au te Aliki.”