Read Te Tusi Tapu I Te Gana Tuvalu Lomiga Lua ISAIA 60 Bible Online

ISAIA 60 - Te Tusi Tapu I Te Gana Tuvalu Lomiga Lua bible

ISAIA 60

¹Ielusalema, tu ki luga o maina mai pela mo te la; A te malu o te Aliki ko maina mai ki a koe!

²A nisi malo ka ufi ne te pouliga, Ka ko te mainaga o te Aliki ka maina mai ki luga i a koe; A te mainaga o tena fakatasi mai ka i luga i a koe.

³A malo ka o'mai ki tou mainaga, Pena foki a tupu ka o'mai ki te mainaga o te ata ao o tou aso fou.

⁴Onoono aka ki ou feitu me se a te mea e tupu: A ou tino ko maopoopo o foki mai ki te lotou fenua! A au tama tagata ka o'mai mai i koga mao; A au tama fafine ka sapasapai mai pela me ne tamaliki.

⁵Ka lavea ne koe a te mea tena kae ka fonu koe i te fiafia; Ka 'pole tou foitino i te fiafia. A te maumea o malo ka aumai ki a koe; A olotou koloa ka aumai mai i te vasa ki a koe.

⁶A tino faimalaga i kamela ka o'mai, Mai i Mitiana mo Efa. Ka o'mai mai i Seepa o aumai te aulo mo mea manogi. Ka folafola atu ne tino a te tala lei e uiga ki mea ne fai ne te Aliki!

⁷A mamoe katoa o Ketala mo Nepaiota Ka aumai ki a koe e fai mo taulaga Kae ofo atu i luga i te fata-fai-taulaga ke fakafiafia ei te Aliki. A te Aliki ka fakatumau ne ia te malu o tena Faletapu ki te se gata mai.

⁸Ne a vakamutu konei e folau pela me ne kaumana, Pela me ne lupe kola ko foki mai ki te lotou fenua?

⁹A vakamutu kona ne o'mai mai i fenua mao, O aumai a tino o te Atua ki te lotou fenua. Ne o'mai mo latou a siliva mo aulo Ke fakaaloalo ki ei ne latou a te igoa o te Aliki, Te Atua tapu o Isalaelu, Tela ne fai ne ia a malo ke fakaaloalo ne latou a tino o tena fenua.

¹⁰Muna a te Aliki ki a Ielusalema, “A pui o tou fa'kai ka faite ne tino fakaatea, Ka ko olotou tupu ka tavini atu ki a koe. Ne fakasala ne au a koe i toku kaitaua, Kae nei ka fakaasi atu toku fiafia mo toku alofa ki a koe.

¹¹ Ka tala ou mataloa i ao mo po, Ko te mea ke aumai ne tupu o malo A koloa ma koe.

¹²Ka ko malo kola e se tavini atu ki a koe Ka ta fakamaseigina.

¹³“A lakau mai i lakau ko paina, iunipa mo pelosi, A lakau tafasili i te lei mai i te vao o Lepanona, Ka aumai ke fakaaoga mo toe atiake ki ei a koe, e Ielusalema, Mo faite fakagaligali a toku Faletapu, Mo faite toku fa'kai ke gali.

¹⁴ A tama tagata a tino kola ne pule fakasaua ne latou a koe, ka o'mai O ifo mo te fakaaloalo atu ki a koe. A tino katoa kola ne takalialia i a koe ka o'mai o tapuaki i lalo o ou vae. Ka fakaigoa ne latou a koe ko ‘Te Fa'kai o te Aliki,’ io me ko ‘Siona, te Fa'kai o te Atua Tapu o Isalaelu.’

¹⁵“Ka se toe fai koe mo fa'kai ne tiakina, Ka se toe itagia foki koe, Ka se toe fai koe mo fa'kai lavaki kae seai ne tino e nofo i ei, Ka fai ne au a koe ke takutakua kae gali, Ke fai mo koga o te fiafia ki te se gata mai, Se gata mai eiloa.

¹⁶A malo mo tupu ka tausi fakalei ki a koe, E pela mo te matua tela e onoono fakalei ki tena tama. Ka iloa ne koe me ko au, te Aliki ne fakasao ne au a koe, Ko te Atua malosi o Isalaelu ne fakasaoloto ne ia a koe.

¹⁷“Ka aumai ne au ki a koe a te aulo kae se ko te palasi, Te siliva mo te palasi kae se ko te fiti mo te lakau, Te fiti kae se ko te fatu. A ou tino pule ka se toe pule fakasaua ki a koe; Ka fai ne au latou ke pule mo te fai mea tonu mo te filemu.

¹⁸A te leo o te fakasaua ka se toe lagona atu eiloa; Ka se ofa fakamasei foki eiloa a te otou fenua. Ka puipui kae 'pulu ne au a koe e pela au me se pui; Ka tavae mai ne koe a au me ne fakasao ne au a koe.

¹⁹ “Ka se toe fai te la mo mainaga ki a koe i te ao, A te masina foki ka se toe fai mo mainaga ki a koe i te po; Ko au, te Aliki, ka fai mo mainaga ki a koe ki te se gata mai; A te mainaga o toku malu katoatoa ka maina atu ki a koe.

²⁰A otou aso fanoanoa ko pili o gata. Ko au, te Aliki, ko te mainaga ki a koutou Tela e tumau ki te se gata mai, E tumau atu i lo te la mo te masina.

²¹A otou tino katoa ka fai ne latou a te mea tonu, Kae ka fai mo latou a te fenua ki te se gata mai. Ne toki ne au latou pela me ne lakau, Ne faite ne au latou Ko te mea ke lavea ne tino katoa a toku takutakua.

²²Ke oko foki eiloa ki kaiga tafasili i te foliki Kae malalo i te otou fenua Ka takutakua eiloa pela me se malo takutakua. Kafai ko oko mai te taimi tonu, Ko fakataunu fakavave ei ne au a te mea tena. Au ko te Aliki!”