Read Te Tusi Tapu I Te Gana Tuvalu Lomiga Lua ISAIA 61 Bible Online

ISAIA 61 - Te Tusi Tapu I Te Gana Tuvalu Lomiga Lua bible

ISAIA 61

¹ A te Aliki Sili ne fakafonu ne ia au ki tena agaga. Ne filifili ne ia au, uga ei ne ia au O avatu te tala lei ki tino mativa, O fakalei a loto o tino fanoanoa, O folafola atu te fakasaolotoga ki pagota Mo te saoloto ki tino i loto i falepuipui.

² Ne uga mai ne ia au o folafola atu Me ko oko mai te taimi Tela ka fakasao ei ne te Aliki a tena fenua kae fakatakavale olotou fili. Ne uga mai ne ia au o fakamafanafana a latou katoa kola e tagi fanoanoa,

³O avatu ki a latou kona e tagi fanoanoa i Siona A te lifu mo te fiafia kae se ko te fanoanoa, A pese o vikiga kae se ko te loto mafatia. Ka pela latou me ne lakau Kola ne toki eiloa ne te Aliki. Ka fai katoa ne latou a te mea tonu, Kae ka vikia te Atua i mea ne fai ne ia.

⁴Ka toe faite ne latou a fa'kai kola ko leva eiloa ne maofa.

⁵Toku fenua, a tino fakaatea ka tavini atu ki a koutou. Ka tausi ne latou otou manu Kae toki ne latou te otou laukele Kae tausi otou togavine.

⁶Ka takua koutou ko faitaulaga a te Aliki, Ko tavini a te tou Atua. Ka manuia koutou i te maumea o malo Kae ka fakamatamata koutou me ko puke ma koutou.

⁷Ko oti atu aso, ne fakamasiasigina sale ei koutou. Ka nofo nei koutou i te otou fenua totino eiloa, Ka ko te otou maumea ka faluaina; A te otou fiafia ka seai se gatamaiga.

⁸Muna a te Aliki, “Au e fiafia ki te fai mea tonu, kae takalialia i te fakasaua mo te amio masei. Ka fakamaoni eiloa au o avatu te taui lei Ki toku fenua Kae fai se feagaiga tumau mo latou.

⁹Ka takutakua latou i malo; A tino katoa e kilo ki oku tino kae e iloa ne latou i tino o toku fenua ne fakamanuia ne au.”

¹⁰ Ko fiafia Ielusalema ona ko te mea ne fai ne te Aliki. E pela a ia me se tamafine tela ko teu Ki tena fakaipoipoga. Ne fakapei a ia ne te Atua ki te fakaolataga Mo te manumalo.

¹¹E pela mo te iloa tonu ne tatou i fuaga e tupu ake ko ola ei, E pena te iloa tonu ne tatou i te Aliki Sili e fakasao eiloa ne ia tena fenua, Ka ko malo katoa ka tavae atu ki a ia.