Read Te Tusi Tapu I Te Gana Tuvalu Lomiga Lua ISAIA 62 Bible Online

ISAIA 62 - Te Tusi Tapu I Te Gana Tuvalu Lomiga Lua bible

ISAIA 62

¹Au ka se mafai o filemu ke oko eiloa ki te taimi ko fakasao ei a Ielusalema, Ka ko tena manumalo ke maina e pela me se molisulu i te po.

²Ielusalema, ka lavea koe ne malo i a koe e manumalo! Ka lavea katoa ne olotou tupu a tou 'malu Ka fakaigoa koe ki se igoa fou, Se igoa ne aumai eiloa ne te Aliki.

³Koe ka pela me se kalauna gali mo te Aliki.

⁴Ka se toe fakaigoa a koe ko “Tuku Tiaki,” E se toe fakaigoa foki a tou fenua ko “Te Avaga ne Tiaki.” A tou igoa fou nei, “Ko Fiafia te Atua ki a ia.” A tou fenua ka fakaigoa ko “Fakaipoipoga gali,” Me i te Aliki e fiafia ki a koe Kae ka fai a ia mo avaga tagata a te otou fenua.

⁵A ia tela ne faite ne ia a koe ka avaga ki a koe, E pela eiloa mo se tamataene tela e puke Mai ne ia se taupou mo fai tena avaga. E pela mo te tagata fatoa fakaipoipo tela e fiafia ki tena avaga, E pena foki te fiafia o te Atua ki a koe.

⁶Ielusalema, ko oti ne fakatulaga ne au a sotia tiute i luga i ou pui; E se tau eiloa latou o filemu i ao mo po. E tau faeloa o fakamasaua ne latou te Aliki e uiga ki ana tautoga, Kae ke mo a eiloa e fai ne latou ke puli i a ia.

⁷Ke mo a eiloa e tuku atu ne latou se avanoaga ki a ia, Ke oko eiloa ki te taimi e toe fakafou aka ei ne ia a Ielusalema, Kae fai ne ia mo fa'kai tela e vikia ne te lalolagi katoa i te gali.

⁸Ko oti ne fai ne te Aliki se tautoga malu, Kae ka fakataunu ne ia i tena malosi: “A otou saito ka se toe fai mo meakai a otou fili, A tino fakaatea foki ka se toe inu i otou uaina.

⁹Ka ko koutou kola e toki ne koutou te saito, E toe kati foki eiloa ne koutou i te taimi o te taukai, Ka kai koutou i te falaoa kae vikia ne koutou te Aliki. A koutou kola e tausi ne koutou a vine, E toe fakaputu foki eiloa ne koutou; Ka inu koutou ki te uaina i potu fono i toku Faletapu.”

¹⁰Tino Ielusalema, olo atu ki tua o te fa'kai O faite se auala mo tino o te otou fenua kona ko foki mai! Fakatoka se auala lasi; ave keatea a fatu mai i ei! Fakaasi aka se fakailoga ko te mea ke iloa ne malo

¹¹I te Aliki ko fai mai tena folafolaga ki te lalolagi katoa: “Fai ki tino o Ielusalema I te Aliki ko vau o fakasao koutou, Kae o'mai mo ia a tino kola ne fakasao ne ia.”

¹²Ka fakaigoa koutou “Ko te Fanau Tapu a te Atua,” “Ko Tino ne Fakasao ne te Aliki.” A Ielusalema ka fakaigoa “Ko te Fa'kai Tela e Alofa ki ei te Atua,” “Ko te Fa'kai Tela ne seki Tiaki ne te Atua.”