Read Te Tusi Tapu I Te Gana Tuvalu Lomiga Lua ISAIA 63 Bible Online

ISAIA 63 - Te Tusi Tapu I Te Gana Tuvalu Lomiga Lua bible

ISAIA 63

¹ “Ko oi tenei e vau mai i te fa'kai o Posala i Etoma? Ko oi tenei e teu fakalei ki gatu kula, tenei e vau mo te 'mana mo te malosi?”[59] “Ko te Aliki, e i a ia te malosi o fakasao a tino, tenei e vau o folafola mai a tena manumalo.”

²“Ai a e kula malosi ei ona gatu, pela mo gatu o te tagata tela e lakalaka ne ia a fuagā vine o fai te uaina?”

³ Ne tali mai te Aliki, “Ne lakalaka ne au a malo e pela me ne fuagavine, kae e seai se tino ne vau o fesoasoani mai ki a au. Ne lakalaka ne au latou i toku kaitaua, tela la, oku gatu ko pisia ne olotou toto.

⁴Ne tonu i toku mafaufau me ko oko mai te taimi e tau ei o fakasao oku tino; ko te taimi o te fakasalaga o olotou fili.

⁵ Au ne poi i taku kiloatuga me e seai eiloa se tino e vau o fesoasoani mai ki a au. Ka ko toku kaitaua ne fai ne ia au ke malosi, kae ne manumalo eiloa au.

⁶I toku kaitaua ne lakalaka ne au a malo kae fakaseaoga latou. Ne fakamaligi atu ne au te toto o latou, tela ko te ola o latou, ki te laukele.”

⁷Ka takutaku atu ne au a te alofa tumau o te Aliki; E vikia ne au a ia ona ko mea katoa ne fai ne ia mō tatou. Ne fakamanuia ne ia a tino Isalaelu Ona ko tena alofa mo tena alofa tumau.

⁸Muna a te Aliki, “A latou ko tino o toku fenua; ka se mafai o fakatogafiti ne latou a au.” Tela la, ne fakasao eiloa ne ia latou

⁹mai i olotou puapuaga. E se se agelu ne fai ne ia, ka ko te Aliki eiloa ne fakasao ne ia latou. Ne fakasao ne ia latou i tena alofa mo tena atafai. Ne masani sale eiloa o tausi ne ia a latou i taimi ko teka,

¹⁰kae ne teke latou ki a ia kae aumai ne latou te fanoanoa ki a ia. Tena la, ne fai ei te Aliki mo fili o latou o fakasaga tau atu ki a latou.

¹¹Kae ne masaua aka ne latou a aso ko teka, aso o Mose, te tavini a te Aliki, tena ne fesili aka ei latou penei, “Tefea nei te Aliki, tela ne fakasao ne ia a takitaki o tena fenua mai i te tai? Tefea te Aliki tela ne tuku mai tena agaga ki a Mose?

¹² Tefea te Aliki tela ne fai ne ia a mea fakaofoofogia i tena mana e auala i a Mose, i te vaega ne ia o te suatai o te tai kae taki atu tena fenua i loto i ei, ko te mea tena ne takutakua ei tena igoa ki te se gata mai?” Ne taki latou ne te Aliki, tena te mea ne olo tonu eiloa latou pela mo solofanua vao, seki siga valevale eiloa latou.

¹⁴E pela me ne pulumakau kola e taki atu ki loto i se vanu, a te Agaga o te Aliki ka avatu ne ia ki a latou a te malologa. Tela la ne taki ne koe ou tino, ne ala ei o fakaaloalogina tou igoa.

¹⁵Te Aliki, kilo mai ki a matou mai i te lagi, te koga e nofo ei koe i tou malu mo tou tapu katoatoa. Tefea tou loto mō matou? Tefea tou malosi? Tefea tou alofa mo tou atafai? Sa tiakina mai matou.

¹⁶A koe ko te motou tamana. A omotou tupuga ko Apelaamo mo Iakopo. E se saga mai ki a matou, ka ko koe, e te Aliki, ko te motou tamana, ko koe ne fakasao sale ne koe matou.

¹⁷Ai a e tiaki mai ei ne koe matou ke piko keatea mai i tou auala? Ai a e fai ei ne koe matou ke loto makeke ko ala ei o fulitua atu matou ki a koe? Foki mai ki a matou o fesoasoani mai ki a latou kola e tavini ki a koe, pela foki ki a matou konei ko ou tino.

¹⁸A matou, tou fenua tapu, ne afuli keatea ne omotou fili i se taimi toetoe: ne ofa ne latou a ou fale tapuaki.

¹⁹Au faiga e fai ki a matou, e pela a koe se ko te motou pule, e pela eiloa matou se ko ou tino.