Read Te Tusi Tapu I Te Gana Tuvalu Lomiga Lua ISAIA 64 Bible Online

ISAIA 64 - Te Tusi Tapu I Te Gana Tuvalu Lomiga Lua bible

ISAIA 64

¹Ai a se vaelua ei ne koe te lagi kae fanaifo ki lalo? Ka lavea ne mauga a koe, ko te mea eiloa ko polepole i te mataku.

²Ka polepole pela me se vai vela tela ko 'puna i te afi. Vau o fakaasi mai tou mana ki ou fili, kae fai a malo ke polepole manafai e lavea ne latou a koe!

³E isi se taimi ne vau ei koe kae fai ne koe a mea fakama'taku kola e seki mafaufau eiloa matou ke fai ne koe; ne lavea ne mauga a koe ko te mea eiloa ko polepole i te mataku.

⁴ E seai eiloa se tino kai matea io me logotala i se Atua pena mo koe, tela e fai ne koe a mea fakaofoofogia pena mō latou kola e fakatuaga ki a koe.

⁵E talia mo te fiafia ne koe a latou kola e fiafia o fai te mea tonu, kae manatua ne latou au fakatonuga mo te olaga e tau o ola ei latou. Ne kaitaua koe ki a matou, ka ko matou ne tumau eiloa o fai agasala; e ui eiloa i tou ita soko ki a matou, ka ko matou ne tumau eiloa o fai a mea se lei mai aso mua eiloa.

⁶A matou ne agasala katoa; ke oko foki eiloa ki omotou galuega lei eiloa, e isi eiloa ne feitu se lei i ei. Ona ko omotou agasala, ko pela ei matou me ne laulakau kola ko magemage kae ko agina keatea ne te matagi.

⁷E seai se tino e saga atu o talo ki a koe; e seai foki se tino e fanatu ki a koe mo se fesoasoani. Ko muni koe mai i a matou kae tiakina[60] foki ne koe a matou ona ko omotou agasala.

⁸Te Aliki, a koe ko te motou tamana. A matou e pela me ne one, ka ko koe ko te tino e faite ne ia a mea ki one. Ne faite ne koe matou,

⁹tela la, sa to kaitaua mai ki a matou io me teu i tou loto a omotou agasala ki te se gata mai. A matou ko ou tino; alofa mai ki a matou.

¹⁰A ou fa'kai tapu ko pela me se toafa; a Ielusalema ko maofa valevale,

¹¹ka ko te Faletapu, te koga gali kae tapu tela e vikia sale i ei a koe ne omotou tupuga, ko oti ne sunu ki te afi. A koga katoa kola e pele i omotou loto ko masei katoa.

¹²Te Aliki, e a, e se kaitaua koe i mea kona ne tupu? E a, ka se gasue mai eiloa koe o fai se mea, kae ko tiakina mai eiloa matou ke puapuaga malosi?