Read Te Tusi Tapu I Te Gana Tuvalu Lomiga Lua ISAIA 65 Bible Online

ISAIA 65 - Te Tusi Tapu I Te Gana Tuvalu Lomiga Lua bible

ISAIA 65

¹ Ne faipati mai te Aliki penei, “Au ko toka o tali atu a talosaga a tino o toku fenua, ka ko latou ne seki talo mai ki a au. Ko talia ne au ke maua au ne latou, ka ko latou e seki taumafai o sala mai au. A toku fenua e seki talo mai eiloa ki a au, kae tela la, au e toka faeloa o tali atu ki a latou penei, ‘Tenei au; ka fesoasoani atu au ki a koutou.’

² Au ne toka faeloa o talia mai toku fenua, kola e fai faeloa ne latou a mea se tonu kae fai eiloa a mea e ma'nako latou ki ei,

³E tumau faeloa te lotou faka'itaita mai ki a au, kae se mafai o tae'ma. E ofo atu ne latou a taulaga fapaupau i fatoaga tapu kae sunu mea manogi i luga i fata-fai-taulaga fapaupau.

⁴I po, ko olo ei ki ana mo tugamau o faipati ki agaga o tino mate. E kai ki kano o puaka kae inu ki te kava tela e faite mai i kano manu kola e ofo ne latou mo fai olotou taulaga fapaupau.

⁵Tena la, ko fai ake ei latou ki nisi tino penei, ‘Fakamao keatea mai i a matou; e se tau mo koutou o patele mai ki a matou i a matou ko 'to 'malu!’ E se mafai ne au o talia ne vaega tino pena — a toku kaitaua ki tino pena e pela eiloa me se afi tela e se mafai o mate.

⁶“Ko oti ne iku i a au a te fakasalaga ka fakaoko ki a latou, a te lotou ikuga ko oti ne tusi ki lalo. Ka se toe fakapuli ne au a te mea ne fai ne latou, ka taui atu eiloa ne au ki a latou

⁷e tusa eiloa mo olotou agasala ne fai, pela foki agasala a olotou tupuga. Ne sunu mea manogi i koga tapuaki fapaupau i luga i mauga foliki kae faipati foki ki muna masei e uiga ki a au. Tela la, ka fakasala ne au latou e pela eiloa mo uiga se lei o latou i taimi ko teka.”

⁸Muna a te Aliki, “E seai se tino e fakamasei ne ia a fuagavine lei; e fakaaoga ne ia mo fai te uaina. E pena foki taku faiga ki oku tino, e se ta fakapalele katoa ne au — ka faka'sao ne au a latou kola e tavini mai ki a au.

⁹Ka fakamanuia ne au a tino Isalaelu i te matakaiga o Iuta, a tino i te gafa o latou ka puke mo latou a toku fenua maugā. A oku tino filifilia, kola e tavini mai ki a au, ka nofo i kona.

¹⁰ Ka tapuaki mai latou ki a au kae ka ave olotou mamoe mo pulumakau ke kaikai i te mouku i te koga laugatasi o Salona i te togala, pela foki i te Vanu o Fakalavelave i te saegala.

¹¹“Ka ko koutou kola e se saga mai ki a au, kola e se saga ki a Siona, toku mauga tapu, kae e tapuaki ki atua fapaupau ko Kato mo Meni.

¹²A te ikuga o koutou, ka 'mate i se mate fi'ta, me i a koutou e seki tali mai i taku kalagaatuga, e seki fakalogo mai foki koutou i taku faipatiatuga. Ne filifili eiloa koutou o se fakalogo mai ki a au kae fai a amioga se lei.

¹³Tela la, au e fai atu me i tino kola e tapuaki kae fakalogo mai ki a au ka uke olotou meakai mo meainu, ka ko koutou ka fia'kai kae fiainu. Ka fiafia latou, ka ko koutou ka fakamasiasigina.

¹⁴Ka usu pese latou mo te fiafia, ka ko koutou ka tagi i te fanoanoa.

¹⁵A oku tino filifilia ka fakaaoga ne latou a te igoa o koutou e pela me se muna fakamalaia. Ko au, te Aliki Sili, ka tamate ne au koutou. Ka ko latou kola e fakalogo mai ki a au, ka avatu ne au se igoa fou mō latou.

¹⁶So se tino i te fenua tela e manako ki se fakamanuiaga ka fakatagi atu ki te Atua Fakamaoni ke fakamanuia mai a ia. So se tino e tauto, e tauto i te igoa o te Atua Fakamaoni. A fakalavelave o aso ko teka ka galo atu ko se toe manatua eiloa.”

¹⁷ Muna a te Aliki, “Ko toe faite nei ne au se lalolagi fou mo ne lagi fou. A mea ne tupu i aso ko teka ka se toe manatua eiloa.

¹⁸Ke lifu kae fiafia koutou ki te se gata mai i mea ne faite ne au. A te Ielusalema fou tenei ka faite ne au ka fonu i te fiafia, mo tino i ei ka fiafia katoa.

¹⁹ Au foki ka fonu i te fiafia ona ko Ielusalema mo tino i ei. Ka se toe ai ne tino e tagi fanoanoa, se toe ai se kalaga mō se fesoasoani.

²⁰A tamaliki ka se toe 'mate foliki, a tino katoa ka ola eiloa ki te gataga o te olaga o te tagata. A latou kola ko oko ki te taki selau e fai pela me koi foliki fua. A tino e mate kae seki oko ki te taki selau e fakaasi ei i a latou e fakasala ne au.

²¹A tino ka faite olotou fale ko nofo ei i ei—ka se toe fakaaoga eiloa ne tino fakaatea. Ka toki olotou togāvine kae inu fiafia i te uaina mai i olotou togāvine kona, ka se toe inu ne nisi tino fakaatea. A oku tino ka ola leva pela me ne lakau. Ka fakaoga faka'lei eiloa ne latou mo te fiafia a fua o olotou galuega.

²³A te galuega e fai ne latou ka iku manuia, ka ko olotou tamaliki ka se toe fetaui mo ne puapuaga. Ka fakamanuia ne au a latou pela foki a tino e tupu mai i a latou, i taimi katoa konei mai i mua.

²⁴Koi tuai o oti a talosaga a latou ki a au, ka ko leva ne tali atu au ki a latou:

²⁵ A kuli vao mo tama mamoe ka kai fakatasi; a leona ka kai ki kausaito e pela mo pulumakau, ka ko gata ka se toe fakama'taku. Ka se toe ai se mea fakama'taku io me masei i luga i Siona, toku mauga tapu.