Read Te Tusi Tapu I Te Gana Tuvalu Lomiga Lua ISAIA 66 Bible Online

ISAIA 66 - Te Tusi Tapu I Te Gana Tuvalu Lomiga Lua bible

ISAIA 66

¹ Muna a te Aliki, “A te lagi ko toku nofogaaliki, ka ko te lalolagi ko te koga e tuku ei oku vae. Tela la, se fale pefea e mafai ne koutou o faite mo oku, se koga pefea ke nofo ei au?

²Ko au ne faite ne au a te lagi mo te lalolagi katoa! Au e fiafia ki tino loto malalo kae loto salamo, kola e mataku mai ki a au kae fakalogo mai ki a au.

³“A tino e fai eiloa ne latou a te mea e manako latou ki ei. E pau eiloa i a latou me e tamate ne latou se pulumakau tagata mo fai te taulaga io me se tino ola; me ofo atu ne latou se tama mamoe io me fati te ua o se kuli; me ofo atu se taulaga saito io me se toto o se puaka; me ofo atu ne mea manogi io me talo atu ki se tupua. E fiafia latou o fai valevale a faigā tapuakiga.

⁴Tela la, ka aumai ne au a mala ki a latou — ko mea eiloa kola e mataku latou ki ei — me e seai eiloa se tino ne tali mai i te taimi ne kalaga atu ei au io me ne fakalogo mai i te taimi ne faipati atu ei au. Ne iku te lotou filifiliga ke se fakalogo mai ki a au, kae ke olo o fai a amioga masei.”

⁵Fakalogo mai ki muna a te Aliki, koutou kola e mataku ki a ia kae fakalogo ki a ia: “Ona ko koutou e fakamaoni mai ki a au, tela la, e isi ne tino o koutou ko takalialia i a koutou kae ko se fia saga atu ki a koutou. E fakalili mai ki a koutou kae fai mai penei, ‘A te Aliki ke fakaasi mai tena mana o fakasao koutou, ko te mea ke lavea atu ne matou a koutou ko fiafia.’

⁶Fakalogo mai! A te leo tela e vau mai i te fa'kai, pela foki mai i te Faletapu, ko te leo o te fakasalaga ne te Aliki a ona fili!

⁷ “A toku fa'kai tapu e pela me se fafine tela e fanau mai ne ia te tamaliki, kae e seki ai se mae kai oko ki a ia.

⁸E isi se tino ko oti ne lavea ne ia se vaega mea pena ko oti ne tupu, io me ne logotala i se vaega mea pena? E a, e isi se malo kai fanau mai i se aso e tasi? E se leva te taimi e puapuaga ei Siona, kae fanau mai a te malo.

⁹Sa manatu pela me ka aumai ne au a oku tino ki te tulaga tela ko pili o fanau mai, ko se talia ei ne au ke fanau mai.” Ko te Aliki tena ne faipati.

¹⁰Fiafia Ielusalema; koutou katoa kola e alofa ki te fa'kai tenei, Ke fiafia koutou ona ko ia! Fiafia fakatasi mo ia, Koutou katoa kola ne tagi fanoanoa ki a ia!

¹¹Ka fiafia koutou i tena maumea, E pela me se pepe e fiafia ki u o tena matua.

¹²Muna a te Aliki, “Ka aumai ne au ki a koutou a te maumea e se gata mai; a te koloa o malo ka tafe mai ki a koutou e pela me se vaitafe tela e se mafai o masa pakupaku. A koutou ka pela me se pepe tela e tausi fakalei ne tena matua, e sapai i ona lima kae tausi mo te alofa.

¹³Ka fakamafanafana ne au koutou Ielusalema, e pela me se matua e fakamafanafana tena tamaliki.

¹⁴Kafai ko lavea ne koutou a te mea tenei ko tupu, kae ka fiafia koutou; ka fai ne ia koutou ke mafi kae malosi. Tena la, ka iloa ei ne koutou i a au, te Aliki, e fesoasoani ki a latou kola e faka'logo mai ki a au, kae e fakaasi toku kaitaua ki oku fili.”

¹⁵A te Aliki ka vau mo te afi. Ka sopo mai a ia i kapakau o te afā o fakasala a latou kola e ita a Ia ki ei.

¹⁶Ka fakasala ne Ia ki te pelu mo te afi a tino katoa o te lalolagi kola e maua atu ne ia e 'se — e tokouke eiloa ka tamate.

¹⁷Muna a te Aliki, “Ko pili mai te gataga ki a latou kola e faka'ma olotou foitino mō tapuakiga fapaupau, kola e solo i laina ki fatoaga tapu, kae e kai ki puaka mo kimoa mo nisi meakai matagā aka foki.

¹⁸E iloa ne au olotou mafaufauga mo olotou amioga. Au ko vau o fakamaopoopo a tino o malo katoa. Kafai ko maopoopo fakatasi mai latou, kae ka lavea ne latou a te mea e mafai ne toku mana o fai,

¹⁹ka iloa foki ne latou me ko au ne fakasala ne au latou. “Ka fakasao ne au a nisi o latou o uga ke olo ki malo mo fenua mao kola e seki logotala eiloa i toku igoa mo toku 'mana takutakua: Ki Sepania, Lipia mo Litia, te fenua o tino apo i te fakaaogaga o matasana, pela foki Tupalu mo Eleni. Ka nofo latou i malo kona o takutaku atu toku igoa takutakua.

²⁰Ka fakafoki mai ne latou a ou taina mai i malo e fai mo meaalofa ki a au. Ka aumai ne latou ki toku mauga tapu i Ielusalema i solofanua, miula mo kamela, pela foki i kaliota mo ka, e pela eiloa mo tino Isalaelu e aumai olotou taulaga saito ki te Faletapu i ipu kola ko oti ne faka'ma i feitu fakatapuakiga.

²¹Ka fai ne au a nisi o latou ke fai mo faitaulaga, ke fai foki mo tino sa Levi.

²² Muna a te Aliki, “E pela eiloa mo te lagi fou mo te lalolagi fou e fakatumau ne au ki toku mana, e pena foki te otou gafa mo te otou igoa ka fakatumau ne au.

²³I Kaiga Fiafia katoa o te Masina Tu, pela foki i Sapati katoa, a tino o malo katoa ka o'mai o tapuaki mai ki a au i Ielusalema.

²⁴ Kafai ko olo latou, kae ka lavea ne latou a foitino mate o tino kola e 'teke mai ki a au. A ilo kola e olo o kai olotou foitino ka se mafai o mate, pena foki a te afi tela e 'sunu ei latou ka se mafai o mate. Ka takalialia a tino katoa i a latou.”