Read Te Tusi Tapu I Te Gana Tuvalu Lomiga Lua ISAIA 8 Bible Online

ISAIA 8 - Te Tusi Tapu I Te Gana Tuvalu Lomiga Lua bible

ISAIA 8

¹[12] Muna a te Aliki ki a au, “Puke se pepa lasi eiloa kae tusi ki ei, ki mataimanu lasi, a muna konei: ‘Puke Fakavave, Fao Fakavave.’

²Puke mai ne tagata lauiloa e tokolua, ko Ulia te faitaulaga mo Sakalia te tama tagata a Iepelekia, ke fai mo molimau.”

³I se taimi fakamuli ifo, ne faitama taku avaga, kae i te taimi ne fanau mai ei te tama tagata a maua, ne fai mai te Aliki ki a au penei, “Fakaigoa a ia tena ko ‘Puke Fakavave, Fao Fakavave.’

⁴Koi tuai o iloa ne te tamaliki o kalaga ki tena matua mo tena tamana, ka ko oti ei ne ave ne te tupu o Asulia a te koloa o Tamaseko mo mea taua katoa o Samalia.”

⁵Ne toe faipati mai te Aliki ki a au,

⁶Ana muna, “Ona ko tino konei ne seki manako ki te vai tela e tafe malie mai i te vai o Sailo,[13] kae polepole i te mataku [14] i te Tupu ko Lesina mo te Tupu ko Peka,

⁷tela la, ko au, te Aliki, ka aumai ne au a te tupu o Asulia mo tena kautau katoa o taua mai ki Iuta. Ka o'mai latou pela mo te lofiaga o te Vaitafe ko te Eufilate, tela ko lofia katoa ona kaugutu.

⁸Ka olo atu latou i loto i Iuta pela me se lofiaga mo olotou tuauma e sae i luga, kae ta fakapalele a mea katoa.”[15] A te Atua e fakatasi mo tatou! A ona kapakau e fola, e puipui ei te fenua.

⁹Koutou malo, maopoopo fakatasi mo te mataku! Fakalogo mai koutou fenua mao o te lalolagi. Fakatoka o taua, kae mataku! Ao, fakatoka kae mataku!

¹⁰Fai otou fuafuaga, kae e se mafai o taunu manuia. Me e pefea eiloa te uke o otou pati e fai kae e seai eiloa se aoga, me i te Atua e fakatasi mo matou.

¹¹Ne fakatonu malosi mai au ne te Aliki i tena 'mana malosi, ke mo a au e tautali i te auala tela e olo i ei a tino. Muna a ia,

¹² “Sa kau ki togafiti a tino o te fenua kona e fai, kae sa mataku foki i mea kona e ma'taku ki ei latou.

¹³Masaua i a au, te Aliki Malosi, e 'malu; ko au e tau o mataku koe ki ei.

¹⁴ Ona ko au e tapu kae fakamataku, ko pela ei au me se fatu tela e siga ei a tino; au pela me se malei tela ka lave i ei a tino o te malo o Iuta mo Isalaelu, pela foki mo tino o Ielusalema

¹⁵E tokouke a tino ka siga, ka siga ko te mea eiloa ko se aoga. Ka lavelave latou i te malei.”

¹⁶A koutou, oku soko, e tau o puipui kae tausi fakalei ne koutou a te fekau tela ne aumai ne te Atua ki a au.

¹⁷ A te Aliki ko fano o muni mai i ona tino, ka ko au e talitonu ki a ia kae fakamoemoe foki au ki a ia.

¹⁸ Tenei au e nofo tasi atu mo tamaliki ne aumai ne te Aliki ki a au. A te Aliki Malosi, tela e tu tena nofogaaliki i luga i te Mauga o Siona, ne uga mai ne ia matou ke fai mo fekau ola ki tino Isalaelu.

¹⁹Ka ko tino ka fai atu ki a koutou ke olo koutou ki tino fakamatala mea tupu i aso fakamuli, mo tino faka'tu agaga, kola e 'lau kae faipati musumusu. Ka fai mai latou penei, “A tino e tau eiloa o kalaga ki agaga e uiga ki fekau e fia iloa ne latou, kae ke fesili foki ki tino mate e uiga ki tino ola.”

²⁰E tau o tali ne koutou penei, “Fakalogo mai ki te akoakoga a te Aliki ki a koutou! Sa fakalogo ki tino fakatu agaga — a mea e fakamatala atu ne latou e seai se aoga ki a koutou.”

²¹A tino ka olo sale fua i loto i te fenua mo te loto vaivai kae mate fia'kai. Ka muna masei latou ki te lotou tupu mo te lotou Atua, ona eiloa ko te fia'kai mo te kaitaua. Ka kilo ake latou ki te lagi

²²io me pula toka ki te laukele, kae ka seai eiloa se mea e lavea ne latou, na ko te puapuaga fua mo te pouliga, te pouliga fakamataku tela ne afuli ki ei latou.