Read Te Tusi Tapu I Te Gana Tuvalu Lomiga Lua LEVITIKO 16 Bible Online

LEVITIKO 16 - Te Tusi Tapu I Te Gana Tuvalu Lomiga Lua bible

LEVITIKO 16

¹Ne toe faipati mai a te Aliki ki a Mose kae ko oti ei ne 'mate a tamaliki tagata a Alona kola e tokolua, i te taimi ne ofo atu ei ne laua a te afi se malu ki te Aliki.

²Muna a te Aliki penei, “Faipati atu ki tou taina ko Alona me e se tau mo ia o ulu atu ki loto i te Potu Tafasili i te Tapu, tela mai tua o te laugatu pui, i so se taimi, na ko te taimi tau eiloa, me e tena te koga e fanake ei au e foliga ki te au i luga o te pono o te Pusa o te Feagaiga. Kafai e se fakalogo a ia, ko ia ka mate.

³E mafai fua ne ia o ulu atu ki loto i te Potu Tafasili i te Tapu manafai ko oti ne ta ne ia se tamā pulumakau mo fai te taulaga mo agasala, mo se tamā mamoe mo fai te taulaga sunu.”

⁴Tena ne tuku mai ei ne te Aliki a fakatonuga konei. Kafai ko oko ki te taimi ka ulu atu ei a Alona ki te Potu Tafasili i te Tapu, e tau mo ia o koukou muamua ko pei ei ki gatu fakafaitaulaga: ko te gatu lino loa, ko te tivae, te fusi, mo te pulou laugatu.

⁵E tau mo te fenua o Isalaelu o tuku atu ki a Alona e lua kouti tagata mo fai te taulaga mo te fakamagaloga o agasala, mo se mamoe tagata mo fai te taulaga sunu.

⁶Ka ofo ne ia se pulumakau tagata mo fai te taulaga mo te fakamagaloga o ana agasala mo agasala a tino o tena kaiga.

⁷Ka oti ko ave ei ne ia a te avā kouti ki te mataloa o te Faleie o te Aliki.

⁸I kona ka fai ei ne ia a te vili ki fatu e lua, te fatu e tasi e tusi ei te igoa penei, “mo te Aliki”, ka ko te sua fatu e tusi i ei a pati penei, “mo Asasela.”[4]

⁹A te kouti tela ne fili mo te Aliki ka ta mo fai te taulaga mo te fakamagaloga o agasala.

¹⁰A te kouti tela ne fili mo Asasela ka tuku ola atu ki te Aliki, ko uga ei ke tele ki te koga lavaki, ko te mea ke ave keatea ne ia a agasala a te fenua.

¹¹I te taimi e ofo atu ei ne Alona a te pulumakau tagata mo fai te taulaga mo te fakamagaloga o ana agasala mo agasala a tena kaiga,

¹²e tau o puke ne ia se ulo e fonu i malala 'ka mai te fata-fai-taulaga, mo ona lima e lua e fonu i mea fakamanogi, o ave ki loto i te Potu Tafasili i te Tapu.

¹³I kona, i mua o te Aliki, ka tuku atu ne ia a mea fakamanogi ki luga i te afi, ka ko te au o mea kona ka ufi ei a te pono o te Pusa o te Feagaiga ko te mea ke se lavea ne Alona, tena ko se mate foki ei a ia.

¹⁴Ka puke aka ne ia ne mu toto o te pulumakau tagata ki ona matikao, ko apiapi atu ei ne ia a te feitu ki mua o te pono o te Pusa o te Feagaiga, ka oti ko apiapi atu foki ei a nisi mu toto e fakafitu taimi i mua o te Pusa o te Feagaiga.

¹⁵Ka oti te mea tena, ko tamate ei ne ia a te kouti tela e fai ke ofo atu mo te fakamagaloga o agasala a te fenua, ka aumai ne ia ne mu toto o te kouti tena ki loto i te Potu Tafasili i te Tapu, ko apiapi atu ei ne ia i luga o te pono o te Pusa o te Feagaiga e pela foki i tena feitu ki mua, e tusa eiloa mo tena faiga i te toto o te pulumakau.

¹⁶E pena te faiga e faka'ma ei ne ia a te Potu Tafasili i te Tapu mai i te olaga se 'ma o tino o Isalaelu, e pela foki mai olotou agasala katoa. E tau o fai ne ia a te mea tena ki te Faleie o te Aliki, me e tu eiloa i te kogaloto o te fa'kai, tela se koga se 'ma i feitu fakatapuakiga.

¹⁷Mai i te taimi e ulu atu ei a Alona ki loto i te Potu Tafasili i te Tapu o fai te sauniga o te faka'maga, ke oko ki te taimi e toe ulu mai ei ki tua, e tapu eiloa se tino e matea atu ke nofo mai i loto i te Faleie o te Aliki. Kafai ko oti te sauniga mo ia, tena kaiga pela foki te fenua katoa,

¹⁸ko fano ei a ia ki tua o faka'ma te fata-fai-taulaga mo taulaga 'sunu. E tau o puke ne Alona ne mu toto o te pulumakau, pela foki mo ne mu toto o te kouti o nani atu ki nifo i matulimanu o te fata-fai-taulaga.

¹⁹Ka ufi ona matikao ki te toto ko apiapi atu ei ne ia ki luga o te fata-fai-taulaga e fakafitu taimi. I te faiga tena e faka'ma ei ne ia a te fata-fai-taulaga mai agasala a te fenua o Isalaelu, kae fai foki ne ia ke 'malu.

²⁰Kafai ko oti te galuega a Alona ki te faka'maga o te Potu Tafasili i te Tapu, te Faleie katoa o te Aliki, mo te fata-fai-taulaga, ko tuku atu ei ne ia ki te Aliki, a te kouti ola tela ne fili ma Asasela.[5]

²¹E tau mo Alona o na te ava lima o ia ki te ulu o te kouti, kae fakaasi atu katoa a mea masei, mo agasala mo faiga teke a te fenua o Isalaelu, kae tuku atu ki te ulu o te kouti. Ka oti ko fili ei se tino ke atuli ne ia a te kouti ke tele ki te koga lavaki.

²²Tena la, ko agasala katoa a te fenua ko fanatu eiloa mo te kouti ki se koga e seai ne tino i ei.

²³ Ka oti ko fanatu ei a Alona ki loto i te Faleie o te Aliki, o tapale a gatu fakafaitaulaga kola ne pei ei a ia koi tuai o ulu atu ei a ia ki loto i te Potu Tafasili i te Tapu, ko tuku ei i kona.

²⁴E tau mo ia o koukou i se koga tapu, ko pei ei ki ona gatu totino eiloa. Ka oti ko fanatu ei a ia ki tua o ofo atu se taulaga sunu ke ave keatea ei a ana agasala mo agasala a te fenua.

²⁵E tau o sunu ne ia a te gako o te manu tena ne ofo mo te fakamagaloga o agasala, i luga i te fata-fai-taulaga.

²⁶A te tino ne fano o afuli a te kouti ke tele ki a Asasela i te koga lavaki, e tau o 'ta ona gatu kae koukou koi tuai o ulu mai a ia ki loto i te fa'kai.

²⁷A te pulumakau mo te kouti kola ne ta mo fai te taulaga o te fakamagaloga o agasala, tela ne ave o la toto ki loto i te Potu Tafasili i te Tapu mo te fakamagaloga o agasala, e tau o ave o sunu i tua o te fa'kai. A te pakili mo kano mo gakau o manu kona e tau katoa o sunu.

²⁸A te tino tela e 'sunu ne ia a mea kona e tau o 'ta ona gatu kae koukou faka'lei koi tuai a ia o foki atu ki te fa'kai.

²⁹Konei a fakatonuga e tau ke tausi i taimi katoa fakamuli. I te po sefulu o te fitu o masina, e tau ei mo tino Isalaelu pela foki mo tino fakaalofa kola e nofo tasi latou, o fakalikiliki kae ke mo a e fai ne galuega.

³⁰I te aso tena e tau o fai se sauniga e faka'ma ei latou mai olotou agasala katoa, ko te mea ke 'ma latou i feitu fakatapuakiga.

³¹A te aso tena se aso e tapu, me ko te aso e fakaliki'liki ei latou kae seai foki ne olotou galuega e fai. A fakatonuga kona e tau o fai i taimi katoa fakamuli.

³²A te Faitaulaga Pule, tela ko oti ne faū faka'lei kae fakatapu ke sui ne ia a tena tamana, ka fai ne ia a te sauniga o te faka'maga. Ka pei a ia ki gatu faka faitaulaga

³³ko fai ei a te sauniga o te faka'maga o te Potu Tafasili i te Tapu, te Faleie katoa, te fata-fai-taulaga, e pela foki mo faitaulaga mo tino katoa o te fenua.

³⁴A fakatonuga konei e tau o fai faeloa i taimi katoa fakamuli. A te sauniga tenei e tau o fai fakatasi i te tausaga, e fakama ei a tino Isalaelu mai olotou agasala. Tena, ne fai eiloa ne Mose[6] a mea ne fakatonu atu ei a te Aliki.