Read Te Tusi Tapu I Te Gana Tuvalu Lomiga Lua LEVITIKO 19 Bible Online

LEVITIKO 19 - Te Tusi Tapu I Te Gana Tuvalu Lomiga Lua bible

LEVITIKO 19

¹Ne faipati atu a te Aliki ki a Mose

²ke faipati atu ki te fenua o Isalaelu penei, “te otou Atua e 'malu.

³ E tau mo koutou o ava ki otou matua mo tamana, kae tausi ki te Sapati, e pela mo taku fakatonuga. Au ko te Aliki te otou Atua.

⁴“Sa tapuaki atu ki nisi atua kae tiaki a au; sa faite ne atua ki fiti kae tapuaki ki ei. Au ko te Aliki te otou Atua.

⁵“Kafai e ta ne koe se manu mo fai te taulaga fakafetai, masaua o tausi ki fakatonuga ko oti ne tuku atu ne au, kae ka talia ne au a te taulaga.

⁶A te kano o te manu e tau o kai i te aso eiloa ne tamate ei a te manu io me ko te aso mai tua ifo. A kano manu e toe atu ki te tolu o aso e tau o sunu,

⁷me ko se 'ma, kae kafai e isi se tino ko oti ne kai ki ei, ka se talia ne au a te taulaga.

⁸So se tino e kai ki te kano manu tena ka agasala a ia me e fakaseaoga ne ia a te mea ko oti ne fakatapu mai ki a au, tela la, ko se toe taku ei a ia se tino o toku fenua.

⁹ “Kafai ko kati otou fatoaga, sa katigina a saito kola i tafatafa o otou fatoaga; sa toe foki ki tua o kati a saito kola ne seki kati.

¹⁰Kafai ko tau otou vine, masaua o sa toe foki atu i loto i toga vine a koutou o toe tau a fuagavine kola ne tiaki io me o toe puke aka a vine kola ne ta'tela ki lalo. Tuku ei a mea kona ma tino ma'tiva mo tino fakaalofa. Au ko te Aliki te otou Atua.

¹¹ “E tapu te kaisoa, te faitogafiti mo te loi.

¹² Sa tauto ki toku igoa manafai e seki mafaufau koe o tausi tau feagaiga; me e fakamasiasi fua ne koe toku igoa. Au ko te Aliki te otou Atua.

¹³ “Sa fakatogafiti ne koe se tino io me kaisoa ana mea. Sa funa ne koe se 'togi o se tino ne fakagalue ne koe, e tusa eiloa me ko te 'togi o ia i se afiafi fua e tasi.

¹⁴ Sa pati maseigina se tino taliga tuli, io me tuku se mea i mua o te tino kivi ko te mea ke siga. Ma'taku mai ki a au; au ko te Aliki te otou Atua.

¹⁵ “A fakamasinoga i te fono ke fai mo te fakamaoni; sa fapito ki tino ma'tiva io me ma'taku ki tino mau'mea.

¹⁶Sa fakasalalaugina ne tala 'loi e uiga ki te sua tino. Kafai se tino ko tu i te fono o fakasao tena ola, sa mataku o fakaasi tau molimau manafai e iloa ne koe e mafai o maua se fesoasoani ki a ia. Au ko te Aliki.

¹⁷ “Sa nofo mo te loto ita ki te sua tino, kae taumafai o fai fakalei te va o koulua, ke mo a koe e agasala e pogai i a ia.[7]

¹⁸ Sa taui atu se mea 'se a se tino e fai ki a koe, sa tumau foki tou kaitaua ki a ia, kae alofa ki tou tuakoi e pela eiloa mo tou alofa ki a koe eiloa. Au ko te Aliki.

¹⁹ “Faka'logo mai ki aku fakatonuga. Sa fakaavagagina a manu i vaega kesekese. Sa toki ne fuaga e lua kae se pau i se fatoaga e tasi. Sa pei ki gatu e sui ki laugatu e lua.

²⁰“Kafai se tino ne tauto ke togi atu tena pologa fafine ki te sua tino mo fai tena avaga fakasalasala, kae e seki tuku atu a te togi ki a ia, ko tena uiga kafai e moe a te tagata tena mo tena pologa fafine, e se tau a ia o tamate, kae ke fakasala fua;[8] me i te pologa fafine tena koi pule eiloa ne ia.

²¹Ka aumai ne te tagata tena se mamoe tagata ki te mataloa o toku Faleie mo fai tena taulaga mo te toe togiga o tena agasala.

²²Tena, ka fai ei ne te faitaulaga a te sauniga e faka'ma ei a agasala a te tagata tena, ko fakamagalo ei a ia ne te Atua.

²³“Kafai ko ulu atu koutou ki loto i te fenua o Kanana kae toki ne koutou ne lakau kaina, masaua i fuaga lakau kona e se 'ma i tausaga e tolu. I taimi kona, e se tau o kai ne koutou.

²⁴I te fa o tausaga e tau o ofo atu a fuaga kona ke fai mo taulaga e fakaasi ei te otou fiafia ki a au,[9] te Aliki.

²⁵I te lima o tausaga ko mafai ei ne koutou o kai ki fuaga kona. Kafai e fai ne koutou a mea kona, kae ka fua malosi otou lakau. Au ko te Aliki te otou Atua.

²⁶ “Sa kai ki ne kano manu e isi ne toto i ei. Sa fai vailakau.

²⁷ Sa katigina a laulu i tafatafa o tou ulu io me katikati tou talafa.

²⁸Sa ta ne ta'u i tou foitino io me katikati tou foitino o fakaasi tou tagi fanoanoa ki se tino mate. Au ko te Aliki.

²⁹ “Sa fakamasiasi ne koutou otou tamaliki fafine o ave ke fai mo fafine tali tagata i faletapu; kafai e fai ne koutou te mea tena, ko koutou ka fuli atu ki nisi atua,[10] ko tena uiga ka fonu te fenua i amioga masei.

³⁰ Tausi faka'lei te Sapati, kae faka'malu te koga e tapuaki mai ei koutou ki a au. Au ko te Aliki.

³¹ “Sa olo o sala fesoasoani ki tino kola e ka'laga sale ki agaga o tino mate. Kafai e fai ne koutou a te mea tena, ko koutou ka se 'ma. Au ko te Aliki te otou Atua.

³²“Ava kae faka'malu ki tino ma'tua. A koutou ke ma'taku mai ki a au; au ko te Aliki.

³³ “Fai faka'lei ki tino fakaalofa kona e nofo tasi koutou i te otou fenua.

³⁴A faiga a koutou ki a latou ke pela eiloa mo faiga a koutou ki otou tino Isalaelu. A koutou ke alofa ki a latou e pela mo te otou a'lofa ki a koutou eiloa. Masaua i te otou nofoga i te fenua o Aikupito a koutou ne tino fakaalofa. Au ko te Aliki te otou Atua.

³⁵ “Sa fakaaoga ne koutou ne fua 'se o fakaloiloi te sua tino, me se fua o mea mafa, me se fua o mea loa mo te lauefa.

³⁶Masaua ke fakaaoga ne koutou mo te fakamaoni a fua kona. Au ko te Aliki te otou Atua, tela ne aumai ne ia koutou keatea mai i Aikupito.

³⁷Fakalogo ki aku tulafono mo fakatonuga katoa. Au ko te Aliki.”