Read Te Tusi Tapu I Te Gana Tuvalu Lomiga Lua LEVITIKO 20 Bible Online

LEVITIKO 20 - Te Tusi Tapu I Te Gana Tuvalu Lomiga Lua bible

LEVITIKO 20

¹Ne faipati mai te Aliki ki a Mose

²ke fai atu ki tino Isalaelu penei, “So se tino i a koutou, io me se tino fakaalofa e nofo tasi koutou e tuku atu sena tamaliki ke fai mo taulaga ki te atua ko Moloka, e tau o peipei ki fatu ke mate ne te fenua katoa.

³Kafai se tino ne tuku atu sena tamaliki ki a Moloka, kae ko fakalailai ne ia toku Faleie tapu, kae fakamasiasi foki ne ia toku igoa tapu; ko au ka kaitaua ki a ia kae se toe taku ne au se tino o toku fenua.

⁴Kafai se saga te fenua ki tena mea ne fai, kae se fakasala ne latou ki te mate,

⁵ko tena uiga ko au ka kaitaua ki te tagata tena mo tena kaiga katoa, pela foki ki tino katoa kola e kau ki a ia, kola e se fakamaoni mai ki a au, kae tapuaki atu ki a Moloka. Ka se toe taku ne au a latou ne tino o toku fenua.

⁶“So se tino e fano o sala fesoasoani ki tino fakataulaitu, ka se toe taku ne au a ia se tino o toku fenua.

⁷Tausi otou foitino ke 'malu, me i a au ko te Aliki te otou Atua.

⁸Faka'logo ki aku tulafono, me i a au ko te Aliki, kae ko au e fai ne au koutou ke 'malu.”

⁹ Konei a fakatonuga ne tuku mai ne te Aliki. So se tino e muna masei ki tena tamana io me ko tena matua e tau o tamate; ko tena 'se eiloa e mate ei a ia.

¹⁰So se tagata Isalaelu e moe mo te avaga a te sua tino Isalaelu ka tamate, fakatasi mo te fafine tena ne moe mo ia.

¹¹ So se tagata e moe mo se fafine i avaga a tena tamana, e fakamasiasi ne ia tena tamana, tela la, e tau a ia mo te fafine ne moe mo ia o ta ke mate. Ko te 'se eiloa o laua tena ko mate ei laua.

¹² Kafai se tagata e moe mo te avaga a tena tama tagata, e tau o tamate fakatasi te tagata tena mo te fafine ne moe laua. Ko oti ne agasala laua i te mataifale, tela la, ko te 'se eiloa o laua tena ko mate ei laua.

¹³ Kafai se tagata e moe mo te sua tagata, e tau laua o tamate me ko oti ne fai ne laua se mea tafasili i te matagā, ko te 'se eiloa o laua ne tamate ei laua.

¹⁴ Kafai se tagata e avaga ki te fafine mo te matua o te fafine tena, a te tokotolu kona e sunu katoa ke mate e tusa mo te matagā o te lotou mea ne fai; e tapu eiloa se vaega mea pena e fai ne koutou.

¹⁵ Kafai se tagata e moe mo se manu, ka tamate te tagata tena fakatasi mo te manu.

¹⁶Kafai se fafine e taumafai o moe mo se manu, a te fafine tena mo te manu e tamate katoa. Ko te 'se eiloa o laua ko ala ei o tamate laua.

¹⁷ Kafai se tagata e avaga ki tena tuagaene io me se afā tuagaene o ia, e tau o fakamasiasi i mata o tino ko afuli ei keatea mai te fenua. Ko oti a ia ne moe mo tena tuagaene, tela la, e tau eiloa o fakasala.

¹⁸ Kafai se tagata e moe mo se fafine e maua i te masaki fafine, e tau te tokolua kona ke afuli keatea mai te fenua, me ko oti ne ofa ne laua a fakatonuga e uiga ki te olaga 'ma faka te lotu.

¹⁹ Kafai se tagata e moe mo te tuagaene o tena tamana, io me ko te taina o tena matua, ka fakasala laua ki te sala o te agasala ko te mataifale.

²⁰Kafai se tagata e moe mo te avaga a te taina o tena tamana io me ko te avaga a te tuagaene o tena matua, e fakamasiasi ne ia te taina o tena tamana io me ko te tuagaene o tena matua, tela la, e tau o fakasala a ia mo te fafine tena ne moe laua; ka seai ne tamaliki e maua ne laua.

²¹ Kafai se tagata e avaga ki te avaga a tena taina, ka mate laua seai eiloa ne la tamaliki. Ko oti ne fai ne ia se mea lailai i feitu fakatapuakiga kae fakamasiasi foki ne ia tena taina.

²²Muna a te Aliki, “Tausi aku tulafono mo fakatonuga katoa, ko te mea ke se teke atu ki a koutou a te fenua o Kanana, tenei e aumai ne au koutou ki ei.

²³Sa tau'tali ki tu a tino e nofo i kona. Tenei ko afuli ne au a tino fapaupau e nofo i kona ko te mea ke ulu atu koutou ki te fenua tena. Ko oko eiloa i toku se fiafia i faifaiga masei a latou.

²⁴Ko oti ne tauto atu au ke tuku atu te fenua maumea kae laukele ola tenei ke fai mo otou tofi, tenei la ka tuku atu ne au. Au ko te Aliki te otou Atua, kae ne fakakese ne au koutou mai nisi malo.

²⁵Tela la, e tau o fakakese ne koutou a manu vae fa mo manu eva kola e 'ma, mai manu vae fa mo manu eva kola e lailai. Sa kai ki manu vae fa mo manu eva kola e lailai, me ko oti ne fakailoa atu ne au me e lailai; kafai e kai koutou ki ei, ko koutou ka lailai.

²⁶E tau mo koutou o faka'malu otou foitino, kae tavini mai ki a au tokotasi, me i a au ko te Aliki 'malu. Ko oti ne fakakese ne au koutou mai nisi malo ko te mea ke fai au mo Atua o koutou, kae seai aka foki.

²⁷“So se tagata me se fafine e talo ki agaga o tino mate e tau o peipei ki fatu ke mate; so se tino e fai ne ia se mea pena, e salasala eiloa a ia ki tena mate.”