Read Te Tusi Tapu I Te Gana Tuvalu Lomiga Lua LEVITIKO 21 Bible Online

LEVITIKO 21 - Te Tusi Tapu I Te Gana Tuvalu Lomiga Lua bible

LEVITIKO 21

¹Ne fakatonu mai te Aliki ki a Mose ke fai atu ki faitaulaga mai te kaiga o Alona penei, “Ke mo a se faitaulaga e fakalailai tena foitino o fakatasi atu ki sauniga e fai i te mate o se tino i tena kaiga,

²vagana ko te mate o tena matua, io me ko tena tamana, io me ko tena tama, io me ko tena taina

³io me ko te tuagaene o ia tela e seki avaga kae nofo i a ia.

⁴E se tau mo te faitaulaga o fakalailai tena foitino i te mate o tino kola e kaiga mo tena avaga.

⁵ “E tapu se faitaulaga e vele so se feitu o tena ulu, io me katikati fakamutu tena talafa io me katikati tena foitino o fakaasi tena tagi fanoanoa.

⁶E tau te faitaulaga o fakatapu tena foitino kae ke mo a e fakamasiasi ne ia toku igoa. E tau a ia o 'malu, me e ofo mai sale ne ia a taulaga meakai ki a au.

⁷A te faitaulaga e se tau o avaga ki se fafine ne masani o tali tagata, io me se fafine ko oti ne fano ki tagata, io me se fafine ne mavae mo tena avaga, i a ia se tagata e 'malu.

⁸E tau mo tino o faka'malu te faitaulaga, me e ofo mai sale ne ia a taulaga meakai ki a au. Au ko te Aliki; au e 'malu, kae e fai foki ne au oku tino ke malu.

⁹Kafai se tamaliki fafine a se faitaulaga ko liu ki fafine tali tagata, ko fakamasiasi ne ia tena tamana, tela la, e tau o sunu ke mate.

¹⁰“A te Faitaulaga Pule e se tau o tuku fua tena ulu pela se selu faka'lei, io me e saesae ona gatu o fakaasi tena tagi fanoanoa, me i tena ulu ko oti ne ligi ki ei te sinu milimili, kae ko oti foki a ia ne fakatapu ke pei ki gatu fakafaitaulaga.

¹¹E tapu a ia ma fano ki te koga e tuku ei se foitino mate, tiga eiloa me ko tena tamana io me ko tena matua e se tau eiloa mo ia o fakalailai tena foitino.

¹²E se 'tau mo ia o ulu ki tua mo te fale tapu, mo te manatu fakaseaoga ki te fale tapu o te Atua; i te mea ko oti a ia ne filifiligina, kae fau'gina a ia ki te sinu ne tena Atua: Ko Au ko te Aliki.

¹³E tau mo ia o avaga ki se taupou

¹⁴kae mo a e avaga ki se fafine ko mate tena avaga io me se fafine ko mavae mo tena avaga, io me se fafine ne masani sale o tali tagata. E tau mo ia o avaga ki se taupou, i loto i tena kaukaiga.

¹⁵Me kafai e se fai pena, ko tena uiga ko ana tamaliki, kola e tau o tapu, ka se 'ma. Au ko te Aliki tela ne fakakese ne au a ia ke fai mo Faitaulaga Pule.”

¹⁶Ne fakatonu mai te Aliki ki a Mose

¹⁷ke fai atu ki a Alona penei, “So se tino i tou gafa e isi se pona i tena foitino e se tau o ofo mai ne ia se taulaga meakai ki a au. A te mea tena e tumau mo taimi katoa fakamuli.

¹⁸E tapu se tino e isi se pona i tena foitino e tau o fai ne ia se taulaga: me se tino kivi, io me se tino e masei te vae, io me se tino e se katoatoa tena foitino e tau o fai ne ia se taulaga: me se tino kivi, io me se tino e masei te vae, io me se tino e se katoatoa tena foitino;

¹⁹e pena foki te tino e piko te vae io me ko te lima;

²⁰e pena foki te tino e piko te tua io me se tino toetoe; e pena foki se tino e masaki i tena mata io me se tino magiso, io me se tino ne 'pena ona masaki.

²¹E tapu se tino i te gafa o Alona e isi se pona i tena foitino e tau o ofo mai ne ia se taulaga meakai ki a au.

²²So se tino pena, e mafai o kai ki meakai kola ko oti ne ofo mai ki a au. Ko te taulaga meakai tapu, mo te taulaga meakai tafasili i te tapu

²³kae e se mafai ne ia o fakapilipili mai ki te laugatu 'pui tapu io me ko te fata-fai-taulaga me e isi se pona i tena foitino. E se tau mo ia o fakalailai a mea tapu konei, me i a au ko te Aliki tela ne fai ne au a mea kona ke 'malu.”

²⁴Kona a pati a Mose ki a Alona mo ana tama tagata, pena foki ki tino katoa o Isalaelu.