Read Te Tusi Tapu I Te Gana Tuvalu Lomiga Lua LEVITIKO 23 Bible Online

LEVITIKO 23 - Te Tusi Tapu I Te Gana Tuvalu Lomiga Lua bible

LEVITIKO 23

¹Ne tuku mai ne te Aliki ki a Mose

²a fakatonuga konei e uiga ki faiga o 'kaiga faka‐te‐lotu, i te taimi e maopoopo ei a tino Isalaelu mo tapuakiga.

³ E ono aso e fai ei otou galuega, kae masaua i te fitu o aso, tela ko te Sapati, se aso malolo. I te aso tena e seai ne galuega e fai, kae e tau koutou o maopoopo o fai otou tapuakiga. A te Sapati e o te Aliki, faitalia me tefea te koga e nofo koe i ei.

⁴Fakasalalau atu a 'kaiga fiafia konei i taimi tonu e fakamanatu ei.

⁵ A te Kaiga o te Paseka, tela e fakaaloalo atu ei ki te Aliki, e kamata i te taimi e to ei te la i te po sefulu fa o te masina muamua.

⁶ I te po sefulu lima e kamata ei te Kaiga o Falaoa se Faka'fete; e fitu aso e tapu se tino e kai ki se falaoa ne palu ki se mea faka'fete.

⁷I te aso muamua o aso konei, e tau mo koutou o maopoopo mo tapuakiga kae mo a e fai ne otou galuega i otou kaiga.

⁸Ofo atu otou taulaga meakai ki te Aliki i aso e fitu. I te fitu o aso ko toe maopoopo mai ei koutou mo tapuakiga, kae ke mo a e fai ne otou galuega i otou fale.

⁹Kafai ko oko mai koutou ki te fenua tenei ka tuku atu ne te Aliki mō koutou, i te taimi e kati ei otou saito, masaua o ave a te saitaga saito muamua ki te faitaulaga.

¹¹Ka ofo atu ne ia ke fai mo taulaga fakapitoa ki te Aliki, ko te mea ke talia ne ia koutou. A te taulaga tena e ofo atu ne te faitaulaga i te aso mai tua o te Sapati.

¹²I te aso e ofo atu ei ne koutou te taulaga saito, masaua o ofo atu foki se tamā mamoe tagata ko tasi tena tausaga kae seai se pona.

¹³Fakatasi atu ki te mea tena, ofo atu foki e lua kilokalame o falaoa ne palu ki sinu olive ke fai mo taulaga meakai, ko te manogi o te taulaga tena e fiafia ki ei te Aliki. E tau foki o ofo atu e tasi te lita uaina ke fakatasi atu ki mea kona.

¹⁴E tapu se tino e kai ki saito fou kona, me e kai mata ne ia, me e tao ke liu falaoa, vagana ke oti ne avatu te taulaga tena ki te Atua. A te fakatonuga tenei e tau o tausi ne tino katoa o tou gafa i taimi katoa fakamuli.

¹⁵ Lau faka'lei e fitu a vaiaso, e kamata mai i te aso i tua o te Sapati tela ne ofo atu ei ne koe tau fusi saito ki te Aliki.

¹⁶I te limasefulu o aso, te aso e tuakoi ki te fitu o Sapati, toe ofo atu ki te Aliki se taulaga saito fou.

¹⁷E tau mo kaiga takitasi o aumai se avā puta falaoa o tuku atu ke fai mo meaalofa fakapitoa ki te Aliki. A te puta e tasi e tau o lua kilokalame o te falaoa e palu ki te isi, kae e tau o tuku atu ki te Aliki ke fai mo taulaga o te saito muamua i saito o te taukai.

¹⁸Fakatasi atu ki te falaoa tenei, e tau o ofo atu ne te fenua e fitu tamā mamoe ko takitasi tausaga, e tasi te pulumakau tagata, kae lua kouti, kae ke seai katoa ne olotou pona. E tau o ofo atu a manu kona ke fai mo taulaga meakai ki te Aliki, fakatasi mo te taulaga saito mo te taulaga sunu. Ko te manogi o te taulaga tenei e fiafia ki ei te Aliki.

¹⁹Ofo atu foki se kouti tagata ke fai mo taulaga mo agasala kae e lua tamā mamoe tagata ko takitasi tausaga ke fai mo taulaga fakafetai.

²⁰Ka ofo atu ne te faitaulaga a te falaoa mo te avā tamā mamoe ke fai mo meaalofa fakapitoa ki te Aliki kae puke ma faitaulaga. A taulaga konei e 'malu.

²¹I te aso tena e seai ne galuega a koutou e fai, kae maopoopo o fai tapuakiga. Ko tino Isalaelu e tau o tausi ki fakatonuga konei i taimi katoa fakamuli, faitalia te koga e nofo ei latou.

²² Kafai ko kati otou fatoaga, sa kati a saito i tafatafa o otou fatoaga; sa foki ki tua o kati a saito kola ne tiakina. Tuku a mea kona ma tino ma'tiva mo tino fakaalofa. A te Aliki ko te otou Atua.

²³A te po muamua o te fitu o masina ke fakamanatu ne koutou me se aso malolo taua, kae ke maopoopo mai koutou ki faigā tapuakiga manafai ko tagi mai te pu.

²⁵Ofo atu se taulaga meakai ki te Aliki, kae sa fai galuega o te aso.

²⁶ I te po sefulu o te fitu o masina ko te aso e fai ei te sauniga faka te lotu o te tausaga, e faka'ma ei a agasala a te fenua. I te aso tena e tapu se tino e kai, kae maopoopo katoa mō tapuakiga, kae ofo atu se taulaga meakai ki te Aliki.

²⁸Sa fai ne galuega i te aso tena me ko te aso e fai ei te sauniga o te fakamaga o agasala.

²⁹So se tino e kai i te aso tena ka se taku se tino o te fenua o te Atua.

³⁰So se tino e galue i te aso tena, ka tamate ne te Aliki.

³¹A te fakatonuga tenei e fakasino ki tino katoa e tupu mai i a koutou, faitalia me tefea te koga e nofo ei latou.

³²Mai te taimi e to ei te la i te po iva o te masina ke oko ki te taimi e to ei te la i te po sefulu, ko te aso tena e tau o fakamanatu ne koutou me se aso malolo, se aso e se tau mo koutou o kai ki se meakai.

³³ A te 'Kaiga Fiafia o Fale Fakamalumalu e kamata i te po sefulu lima o te fitu o masina kae e tusa mo te fitu o aso e fai ei.

³⁵I te aso muamua o aso konei, e tau mo koutou o maopoopo o fai tapuakiga kae mo a e fai ne otou galuega.

³⁶I aso takitasi o aso konei e fitu, e tau o ofo ne koutou ne taulaga meakai. I te valu o aso ko toe maopoopo fakatasi ei koutou o fai tapuakiga kae ofo atu se taulaga meakai. A te aso tena se aso fai tapuakiga, tela la, seai ne galuega e tau o fai.

³⁷(Kona a kaiga fiafia faka-te-lotu kola e fakaaloalo ei ne koutou te Aliki i taimi e maopoopo ei koutou o fai tapuakiga kae ofo atu mo taulaga meakai, taulaga sunu, taulaga saito, taulaga manu, mo taulaga uaina i aso takitasi.

³⁸A 'Kaiga fiafia konei e fakaopoopo ki Sapati i vaiaso takitasi, ka ko taulaga konei e fakaopoopo ki meaalofa a koutou kola e masani o fai sale, pela foki ki otou taulaga e fakataunu ei otou feagaiga mo otou taulaga o te loto malie kola e tuku atu ne koutou ki te Aliki.)

³⁹Kafai ko oti ne kati otou fatoaga saito, masaua o fakamanatu te 'kaiga fiafia tena i aso e fitu, e kamata i te po sefulu lima o te fitu o masina. A te aso muamua se aso e fakakese, e malolo koutou i ei.

⁴⁰I te aso tena, puke mai a fuaga lakau tafasili i te lei mai otou fatoaga, puke mai foki ne kaula o pama mo kaula o lakau fai lau, ko kamata ei se 'Kaiga Fiafia Faka‐te‐Lotu e fakaaloalo ei ki te Aliki te otou Atua.

⁴¹Fakamanatu te 'kaiga tena i aso e fitu. A te fakatonuga tena e tau o tausi ne tino e tupu mai i a koutou i taimi katoa fakamuli.

⁴²A tino Isalaelu katoa e tau o nofo i fakamalumalu i aso e fitu,

⁴³ko te mea ke iloa ne otou fanau fakamuli me ne fakanofo ne te Aliki a tino Isalaelu i fakamalumalu i te taimi ne taki mai ei ne ia latou keatea mo Aikupito. A ia ko te Aliki te otou Atua.

⁴⁴E pena te tukuatuga ne Mose ki tino Isalaelu a fakatonuga mo te fakamanatuga o 'Kaiga Fiafia Faka‐te‐Lotu e fakaaloalo ei ki te Aliki.