Read Te Tusi Tapu I Te Gana Tuvalu Lomiga Lua LEVITIKO 24 Bible Online

LEVITIKO 24 - Te Tusi Tapu I Te Gana Tuvalu Lomiga Lua bible

LEVITIKO 24

¹Ne faipati mai te Aliki ki a Mose

²ke tuku atu ki tino Isalaelu, a fakatonuga konei: Aumai se sinu olive tafasili i te lei mo faka'ka a moli i te Faleie o te Aliki, ko te mea ke 'ka faeloa a moli i ei.

³I afiafi katoa, e tau mo Alona o faka'ka a moli kona, ke 'ka ke oko eiloa ki te taeao, i mua o te Aliki, i tua o te laugatu pui, i mua o te Pokisi o te Feagaiga, tela e tuku i te Potu Tafasili i te Tapu. A te fakatonuga tena e tau o tausi faeloa i taimi katoa fakamuli.

⁴E tau mo Alona o onoono faka'lei ki moli kona i luga i olotou tulaga aulo, kae tausi faka'lei ke 'ka faeloa i taimi e tau o 'ka ei, i mua o te Aliki.

⁵ Puke mai e sefulu lua kilokalame o falaoa kae faite e sefulu lua puta falaoa.

⁶Fakalaina a puta falaoa i laina e lua, e taki ono i te laina, i luga i te taipola tela e ufi katoa ki te tina aulo, tela i mua o te Aliki.

⁷Tuku atu ne mea manogi ki laina takitasi, ke tuku fakatasi atu mo te falaoa e fai mo vaega fakamanatu e ofo atu ki te Aliki i luga i te afi.

⁸I aso Sapati katoa i taimi katoa fakamuli, a te falaoa ke tau o tuku faeloa i mua o te Aliki. A te mea tena ko te tiute o tino Isalaelu ki te se gata mai.

⁹ A te falaoa e a Alona mo tena gafa, kae e tau o kai ne latou i se koga tapu, me i te mea tenei se vaega tafasili i te tapu i meakai kola e ofo atu ki te Aliki ma faitaulaga.

¹⁰E isi se tagata tokotasi, a tena tamana se tino Aikupito ka ko tena matua se fafine Isalaelu e igoa ki a Selomita, te tama fafine a Tepili mai i te matakaiga o Tanu. A te tagata tenei ne fakakinau mo te tagata Isalaelu e tokotasi i loto i te fa'kai, kae ne pati masei ne ia te Atua. Tena ne puke ne latou a ia o ave ki a Mose,

¹²ke tausi fakapagota ke oko ki te taimi e maua mai ei se tonu mai i te Aliki.

¹³Muna a te Aliki ki a Mose,

¹⁴“Ave te tagata tena ki tua o te fa'kai. A tino katoa kola ne lagona ne latou a pati masei a te tagata tenei e tau o na olotou lima ki tena ulu, o molimau i te tagata tenei ko 'se, ka oti ko peipei ei a ia ki fatu ke mate ne te fenua katoa.

¹⁵Tena la, fai atu ki tino Isalaelu me i so se tino e pati masei ki te Atua

¹⁶e fakasala ki te mate. So se tino Isalaelu io me se tino fakaalofa e nofo tasi mo tino Isalaelu e pati masei ki te Aliki e tau o peipei ki fatu ke mate ne te fenua katoa.

¹⁷ “So se tino e tatino e fakasala ki te mate,

¹⁸kae so se tino e tamate ne ia se manu a te sua tino, e tau o toe sui ne ia. A te tulafono, e sui te ola ki te ola.

¹⁹“Kafai e fakapakia ne se tino te sua tino, ko te mea ne fai ne ia ka toe fakafoki atu ki a ia.

²⁰Kafai ne fati ne ia te ivi o te sua tino, ko tau foki o fati tena ivi; kafai ne fai ne ia te sua tino ke kivi te mata e tasi, ko ia foki ka fakakivi tena mata e tasi. Kafai ne to te nifo o te sua tino ne pago ne ia, ko tena nifo foki ka pago ke to. Ko te koga e fakapakia ne ia i te sua tino, ko te koga foki tena o ia e fakapakia.

²¹So se tino e tamate ne ia se manu, ke toe sui ne ia. So se tino e tamate ne ia se tino e ta foki ke mate.

²² A te tulafono tenei e fakasino ki a koutou katoa, tino Isalaelu pela foki mo tino fakaalofa e nofo tasi koutou, me i a au ko te Aliki te otou Atua.”

²³I te otiga o pati kona a Mose ki tino Isalaelu, tena, ave ei ne latou a te tagata tela ne pati masei ki te Aliki o peipei ki fatu ke mate i tua o te fa'kai. I te faiga tena, ne fai ei ne tino Isalaelu a te fakatonuga a te Aliki ki a Mose.