Read Te Tusi Tapu I Te Gana Tuvalu Lomiga Lua LEVITIKO 3 Bible Online

LEVITIKO 3 - Te Tusi Tapu I Te Gana Tuvalu Lomiga Lua bible

LEVITIKO 3

¹Kafai se tino e ofo atu sena pulumakau mo fai te taulaga fakafetai, e tau se pulumakau tagata io me se pulumakau fafine kae seai sena pona.

²E tāu mo te tino tena o tuku tena lima ki te ulu o te pulumakau ko tamate ei i te mataloa o te Faleie o te Aliki. A te toto o te manu tena ka apiapi ki feitu e fa o te fata-fai-taulaga ne faitaulaga mai te gafa o Alona,

³kae ka tuku atu foki ne latou a vaega konei o te manu ke fai mo taulaga meakai ki te Aliki: ko gako katoa i ana totoga,

⁴ko ana nonu mo gako e 'piki i ei, mo te feitu tafasili i te 'lei o te ate.

⁵Ka tunu katoa ne faitaulaga a mea katoa kona i luga i te fata-fai-taulaga, fakatasi mo taulaga saito kola ne sunu. Ko te manogi o te taulaga meakai tenei e fiafia ki ei te Aliki.

⁶Kafai e ofo atu ne se tino se mamoe io me se kouti mo fai te taulaga fakafetai, e pau fua me se manu tagata io me se manu fafine, kae ke mo a eiloa e isi sena pona.

⁷Kafai e ofo atu ne se tagata se mamoe,

⁸e tau o nā tena lima ki te ulu o te mamoe, ko tamate ei i mua o te Faleie o te Aliki. Ka apiapi ne faitaulaga a te toto o te mamoe tena ki feitu e fa o te fata-fai-taulaga,

⁹kae tuku atu ne latou a kogā manu konei mo fai te taulaga meakai ki te Aliki: ko te gako, ko te velo katoa, ke kati pili eiloa ki te ivi tua, ko te gako katoa tela e ufi mai tua o ana totoga,

¹⁰ko ana nonu mo te gako e ufi i ei, mo te feitu tafasili i te lei o te ate.

¹¹Ka sunu katoa ne te faitaulaga a mea kona i luga i te fata-fai-taulaga ke fai mo taulaga meakai ki te Aliki.

¹²Kafai e ofo atu ne se tino se kouti,

¹³e tau o nā tena lima i te ulu o te kouti ko tamate ei i mua o te Faleie o te Aliki. Ka apiapi ne faitaulaga a tena toto ki feitu e fa o te fata-fai-taulaga

¹⁴kae tuku atu ne latou a kogā manu konei mo fai te taulaga meakai ki te Aliki: ko te gako katoa i loto i ana totoga,

¹⁵ko nonu mo gako e piki i ei, mo te feitu tafasili i te lei o te ate.

¹⁶Ka sunu ne te faitaulaga a mea katoa kona i luga i te fata-fai-taulaga ke fai mo taulaga meakai e fiafia ki ei te Aliki. Ko te gako katoa e a te Aliki.

¹⁷E seai se tino Isalaelu e kai ne ia ne gako io me ne toto; tenei te fakatonuga e tau o tausi ne tino Isalaelu ki te se gata mai.