Read Te Tusi Tapu I Te Gana Tuvalu Lomiga Lua LEVITIKO 7 Bible Online

LEVITIKO 7 - Te Tusi Tapu I Te Gana Tuvalu Lomiga Lua bible

LEVITIKO 7

¹Konei a fakatonuga mo taulaga e toe togi ei te agasala, kola e tafasili i te 'malu.

²A te manu mo te taulaga tenei e tau o ta i te feitu ki matu o te fata-fai-taulaga, te koga e ta ei a manu mo taulaga sunu. A te toto o te manu tena e tau o apiapi atu ki feitu e fa o te fata-fai-taulaga.

³A gako katoa o te manu tena e tau o ofo atu i luga i te fata-fai-taulaga; ko te gako i te velo, ko te gako e ufi ei ana totoga,

⁴ko ana nonu mo te gako e piki i ei, mo te feitu tāua ei o te ate.

⁵Ka sunu ne te faitaulaga a gako katoa o te manu i luga i te fata-fai-taulaga mo fai te taulaga meakai ki te Aliki. A te mea tena se taulaga e toe togi ei te agasala.

⁶So se tagata i te kaiga o faitaulaga e mafai o kai ki te taulaga tena, kae e tau o kai i se koga tapu, me se taulaga tafasili i te 'malu.

⁷E tasi te fakatonuga tenei e aofia ei te taulaga mo te fakamagaloga o agasala, mo te taulaga o te toe togiga o te agasala; a te kano o te manu e puke ma te faitaulaga tela e fai ne ia te taulaga.

⁸A te pakili o te manu tela e ofo atu mo fai te taulaga sunu e puke ma te faitaulaga tela e fai ne ia te taulaga.

⁹A taulaga saito katoa kola ko oti ne tao ki se ogaumu, io me ne falai, io me ne tunu ki te fiti tunu falaoa e puke ma te faitaulaga tela ne ofo ne ia te taulaga tena ki te Atua.

¹⁰Ka ko taulaga saito katoa kola e seki tunu, kola ne palu ki te sinu io me ne seki palu, e vae pau katoa i faitaulaga katoa i te gafa o Alona.

¹¹Konei a fakatonuga e uiga ki taulaga fakafetai kola e tuku atu ki te Aliki.

¹²Kafai se tino e fai ne ia te taulaga tenei ke fai mo taulaga fakafetai ki te Atua, e tau o ofo atu ne ia fakatasi mo te manu ne fakatoka mo fai te taulaga, se taulaga falaoa e se palu ki te isi; e pau fua me se feitu falaoa matolu tela ne faite ki te falaoa e palu ki te sinu olive, io me ne masi e nani ki sinu olive, io me ne keke e faite ki falaoa e palu ki sinu olive.

¹³E tau foki o ofo atu ne ia ne falaoa tao e seki palu ki te isi, o fakatasi atu ki te taulaga tena.

¹⁴Ka ofo atu ne ia te vaega e tasi mai i vaega falaoa kola ne fai, ke fai mo meaalofa ki te Aliki; a te mea tena e puke ma te faitaulaga tela ne apiapi ne ia a te toto o te manu ki te fata-fai-taulaga.

¹⁵A te kano o te manu e tau o kai i te aso eiloa ne ta ei mo fai te taulaga; kae ke mo a e tuku se vaega o ia ki te sua aso.

¹⁶Kafai se tino ne aumai ne ia sena taulaga fakafetai e fakakatoatoa i ei tena tautoga ne fai, io me se taulaga eiloa a ia i tena loto malie, e se tau o kai katoa i te aso ne ofo atu ei, kae ko mea e toe e mafai o kai i te sua aso.

¹⁷A kano kola koi toe eiloa ki te tolu o aso e tau o sunu katoa.

¹⁸Kafai e isi ne kano ne kai i te tolu o aso, ka se talia ne te Atua a te taulaga a te tagata tena. A te taulaga tena ka se lau i ana taulaga, kae ka lau ki taulaga se 'ma, kae so se tino e kai ki ei ka maua ne ia te ikuga se lei.

¹⁹Kafai ne patele te kano o te manu tena ki se mea lailai i faiga o tapuakiga, e se tau o kai, kae ke sunu katoa. So se tino e 'ma i feitu fakatapuakiga e saoloto o kai ki te manu,

²⁰kae kafai se tino se 'ma ne kai ki ei, ka se taku a ia se tino o te fenua o te Atua.

²¹Kafai foki se tino ne kai ki te manu tenei, kae ko oti ne patele ki se mea se 'ma o se manu io me se tino, ka se taku foki a ia se tino o te fenua o te Atua.

²²Konei a fakatonuga ne tuku atu ne te Aliki ki a Mose

²³mo tino Isalaelu. E tapu e kai a gako o se pulumakau, io me se mamoe, io me se kouti.

²⁴A te gako o te manu tela ne mate eiloa i a ia, io me ne ta ne se manu fekai, ke mo a e kai, kae e lei mafai e fakaaoga ki nisi mea ake.

²⁵So se tino e kai ki te gako o te manu ne ofo atu mo fai te taulaga meakai ki te Aliki ka se taku se tino i tino o te Atua.

²⁶A tino Isalaelu e tapu eiloa e kai ki te toto o manu eva io me ko manu vae fa.

²⁷So se tino e ofa ne ia a te tulafono tenei ka se taku se tino o te fenua o te Atua.

²⁸Konei a fakatonuga ne tuku ne te Aliki ki a Mose

²⁹mo tino Isalaelu. So se tino e ofo sena taulaga fakafetai, e tau o aumai ne ia se vaega i ei mo fai tena meaalofa fakapitoa ki te Aliki,

³⁰kae ke aumai eiloa ne ia i ona lima e fai mo taulaga meakai. E 'tau o aumai ne ia a te gako o te manu mo tena fatafata ko tuku atu ei ke fai mo meaalofa fakapitoa ki te Aliki.

³¹Ka sunu ne te faitaulaga te gako i luga i te fata-fai-taulaga, ka ko te fatafata e puke ma faitaulaga.

³²A te vae tua fakaatamai o te manu e tau o tuku atu

³³ki te faitaulaga tela ne ofo atu ne ia a te toto mo te gako o te taulaga fakafetai.

³⁴A te fatafata mo te vae tua fakaatamai o te manu, se vaega ne puke ne te Aliki mai tino Isalaelu o tuku ke fai mo meaalofa ki faitaulaga. Tena te vaega e tau o tuku ne tino Isalaelu ki faitaulaga i taimi katoa fakamuli.

³⁵Tena te vaega o te meakai tela ne ofo atu ki te Aliki, tela ne tuku ma Alona mo ana tama tagata, i te taimi ne fakasopo ei latou ki te tofi faitaulaga.

³⁶I te aso tena, ne fakatonu atu ei a te Aliki ki tino Isalaelu ke tuku atu ki faitaulaga a te vaega tena o te taulaga. A te mea tena, se fakatonuga e tau o fai ne tino Isalaelu i taimi katoa fakamuli.

³⁷Kona a fakatonuga mo taulaga‐sunu, taulaga‐saito, taulaga mo te fakamagaloga o agasala, taulaga mo te toe togiga o agasala, taulaga i taimi o te faūga, mo taulaga fakafetai.

³⁸Ne tuku mai ne te Aliki ki a Mose i luga i te Mauga o Sinai, a fakatonuga konei, i te taimi ne fai atu ei a ia ki tino Isalaelu ke fai olotou taulaga.