Read Te Tusi Tapu I Te Gana Tuvalu Lomiga Lua LEVITIKO 8 Bible Online

LEVITIKO 8 - Te Tusi Tapu I Te Gana Tuvalu Lomiga Lua bible

LEVITIKO 8

¹Muna a te Aliki ki a Mose penei,

²“Puke atu a Alona mo ana tama tagata ki te mataloa o toku Faleie, kae aumai a gatu faka‐faitaulaga, te sinu milimili, te tamā pulumakau tagata mo fai te taulaga mo te fakamagaloga o agasala, te avā mamoe, mo te kete falaoa e seki palu ki te isi.

³Ka oti ko fakamaopoopo ei a te fenua ki te koga tena.”

⁴Ne fai eiloa ne Mose a te mea ne fakatonu atu ne te Aliki, tela la, i te taimi ne maopoopo ei a te fenua,

⁵ne fai atu ei a ia ki a latou penei, “A te mea tenei ka fai ne au ko te fakatonuga a te Aliki.”

⁶Ne aumai ne Mose a Alona mo ana tama tagata ki mua kae fai atu ki a latou ke koukou faka'ma.

⁷Ne fakapei atu ne ia a te tilima mo te gatu 'loa ki a Alona kae sai atu mo te fusi laugatu ki tena taugasulu. Ne tuku atu ne ia a te efota ki luga i a Alona, kae fakamau faka'lei ne ia o sai, ona fusi ne laga faka'lei, ki tena taugasulu.

⁸Ne tuku atu ne ia a te ufi fatafata ki luga i a ia kae fakamau atu ki ei a te Ulima mo te Tumema.[1]

⁹Ne tuku atu ne ia ki tena ulu a te pulou laugatu, kae i mua o te pulou ne fakamau atu ne ia ki ei te aulo fakamanatu, ko te fakailoga 'malu tena o tena fakatapuga, e pela eiloa mo te fakatonuga a te Aliki.

¹⁰Tena ne puke ei a Mose ki te sinu milimili o mili a te Faleie o te Aliki mo mea katoa i loto i ei; ko te faiga tena ko fakatapu ei a mea katoa kona mo te Aliki.

¹¹Ne puke aka Mose ki ne mu sinu kae ligiligi atu ne ia a te fata-fai-taulaga mo mea katoa i ei, pela foki mo te pesini mo tena tulaga e fakafitu taimi, ko te mea ke fakatapu a mea kona mo te Aliki.

¹²Tena, ne fakasopo ei ne ia a Alona i te ligiga ne ia ne mu sinu milimili ki tena ulu.

¹³Oti aka, aumai ei ne Mose a tama tagata a Alona ki mua, fakapei atu olotou tilima, sai atu olotou fusi laugatu i olotou taugasulu, kae fakamau atu olotou pulou ki olotou ulu, e pela eiloa mo te fakatonuga a te Aliki.

¹⁴Tena, aumai ei ne Mose te tama pulumakau mo fai te taulaga mo te fakamagaloga o agasala, ka ko Alona mo ana tama ne na olotou lima ki te ulu o te pulumakau.

¹⁵Ne tamate ne Mose te pulumakau kae puke aka ne ia ne mu toto o nani a nifo i matulimanu o te fata-fai-taulaga ki ona matikao, e fakatapu ei a te fata-fai-taulaga. A te toega o te toto ne ligi ne ia ki te feitu ki lalo o te fata-fai-taulaga. I te faiga tena, ko fakatapu kae faka'ma ei ne ia a te fata-fai-taulaga.

¹⁶Ne puke ne Mose a te gako e ufi ei ana totoga, mo te feitu taua o te ate, mo ana nonu mo te gako e piki i ei, sunu katoa ei ne ia i luga i te fata-fai-taulaga.

¹⁷Ne puke ne Mose a te toega o te pulumakau, fakatasi mo tena pakili, ana kano mo ana gakau, kae ave ne ia o sunu i tua o te fa'kai, e pela eiloa mo te fakatonuga a te Aliki.

¹⁸Oti aka, aumai foki ei ne Mose a te mamoe tagata mo fai te taulaga sunu, tela ne na atu foki ei a lima o Alona mo ana tama tagata ki te ulu o te mamoe tena.

¹⁹Ne tamate ne Mose a te mamoe kae apiapi atu ona toto ki feitu e fa o te fata-fai-taulaga.

²⁰Ne katikati ne Mose a te mamoe, mulu ne ia a ona totoga mo ana vaetua ki vai, kae sunu ne ia a tena ulu, ana gako, mo te toega o te mamoe i luga i te fata-fai-taulaga, e pela eiloa mo te fakatonuga a te Aliki. A te taulagasunu tenei, se taulaga meakai, kae ko te manogi o ia e fiafia ki ei te Aliki.

²²Tena, ne toe aumai ne Mose te sua mamoe tagata, tela e fakaaoga mo te faūga o faitaulaga, ka ko Alona mo ana tama tagata ne na foki olotou lima ki te ulu o te mamoe tena.

²³Ne ta ne Mose te mamoe kae tuku ne ia ne mu toto ki te kapa taliga fakaatamai o Alona, pela foki ki te matikao matua o tena lima fakaatamai, mo te matikao matua o tena vae fakaatamai.

²⁴Tena, ne aumai foki ne Mose a tama tagata a Alona, kae nani atu foki ne mu toto ki olotou kapa taliga, pela foki ki matikao matua o olotou lima fakaatamai, mo matikao matua o olotou vae fakaatamai. A te toega o te toto ne ligiligi ne Mose ki feitu e fa o te fata-fai-taulaga.

²⁵Ne puke ne Mose a te gako o te mamoe; ko gako i tena velo, ko gako e ufi ei ana totoga, ko te feitu taua o te ate, ko ana nonu mo te gako e piki i ei, mo tena vae tua fakaatamai.

²⁶Tena, ne tapale aka ne Mose se falaoa e tasi mai falaoa e seki palu ki te isi; e tasi foki te falaoa ne palu ki te sinu, mo te masi e tasi, tuku ei ne ia ki luga o te gako mo te vae tua.

²⁷Ne tuku atu ne ia a meakai katoa konei ki lima o Alona mo ana tama tagata, tela ne tuku atu ei ne latou ke fai mo meaalofa fakapitoa ki te Aliki.

²⁸Tena, ne puke mai ne Mose a meakai mai i a latou o 'sunu i luga i te fata-fai-taulaga, mai luga o te taulaga‐'sunu, ke fai mo taulaga o te faūga. A te mea tenei se taulaga meakai, kae ko tena manogi e fiafia ki ei te Aliki.

²⁹Ne puke atu Mose ki te fatafata o te manu kae ofo atu ne ia ke fai mo meaalofa fakapitoa ki te Aliki. A te mea tena ko te tusaga o Mose mai te mamoe tena ne ofo ke fai mo taulaga o te faūga. Ne fai ne Mose a mea katoa e pela eiloa mo te fakatonuga a te Aliki.

³⁰Ne puke aka ne Mose ne mu sinu milimili, mo ne mu toto kola i luga o te fata-fai-taulaga kae fakamatulutulu ne ia ki luga i a Alona mo ana gatu, pela foki ki tamaliki a Alona mo olotou gatu. A te mea tena ko te fakatapuga o latou mo olotou gatu mo te Aliki.

³¹Ne fai atu a Mose ki a Alona mo ana tama tagata penei, “Ave a kano manu konei o tunu i te mataloa o te Faleie o te Aliki, ko kai ei i kona kae kiki ki falaoa kola e tuku i te kete tela e tuku ei a meakai ne ofo mo taulaga o te faūga, e pela eiloa mo te fakatonuga a te Aliki.

³²A kano manu io me ne falaoa e 'toe, e tau o 'sunu katoa.

³³E se mafai ne koutou o tiakina a te mataloa o te Faleie o te Aliki i aso e fitu, ke oko eiloa ki te taimi e palele ei a faifaiga o te fakasopoga o koutou.

³⁴A te mea ne fai ne matou i te aso nei ko te mea eiloa tela ne fakatonu mai ne te Aliki, ko te mea ke magalo ei otou agasala.

³⁵E tau mo koutou o nofo i te mataloa o te Faleie o te Aliki i te ao mo te po, i aso e fitu, o fai a mea ne fakatonu mai ne te Aliki. Kafai e se fai ne koutou, ko koutou ka mate. Tena te mea ne fakatonu mai ne te Aliki ki a au.”

³⁶Tena, ne fai eiloa ne Alona mo ana tama tagata a mea katoa kola ne fakatonu ne te Aliki ki a Mose ke fai ne latou.