Read Te Tusi Tapu I Te Gana Tuvalu Lomiga Lua LEVITIKO 9 Bible Online

LEVITIKO 9 - Te Tusi Tapu I Te Gana Tuvalu Lomiga Lua bible

LEVITIKO 9

¹Ko tasi te aso mai i tua o te faigā fakasopoga, ne kalaga atu a Mose ki a Alona mo ana tama tagata, mo takitaki o Isalaelu.

²Muna a ia ki a Alona, “Puke se tamā pulumakau tagata mo se mamoe tagata e seai ne o la pona, kae ofo atu ki te Aliki; ko te pulumakau ke fai mo taulaga mo te fakamagaloga o agasala, ka ko te mamoe ke fai mo taulaga 'sunu.

³Fai atu foki ki tino Isalaelu ke aumai se kouti tagata ke fai mo taulaga mo te fakamagaloga o agasala, ka ko te tamā pulumakau mo te tamā mamoe ko takitasi o la tausaga kae seai ne pona, ke fai mo taulaga 'sunu,

⁴ka ko te pulumakau tagata mo te mamoe tagata ke fai mo taulaga fakafetai. E tau o ofo atu ne latou a manu kona ki te Aliki, fakatasi mo taulaga saito e palu tasi mo sinu. E tau o fai ne latou a te mea tena, me i te Aliki ka fakasae mai ki a latou i te aso tenei.”

⁵Ne aumai ne latou ki mua o te Faleie o te Aliki a mea katoa kola ne fakatonu atu ne Mose, tela ne maopoopo ei te fenua i kona o tapuaki atu ki te Aliki.

⁶Muna a Mose, “A te Aliki ne fakatonu atu ke fai a mea katoa konei, ko te mea ke matea ne koutou a tena mainaga.”

⁷Tena ne fai atu ei a ia ki a Alona, “Fano ki te fata-fai-taulaga o ofo atu a te taulaga mo te fakamagaloga o agasala, mo te taulaga 'sunu, ke magalo ei au agasala mo agasala a tino. Fai te taulaga tena ke magalo ei a agasala a te fenua, e pela eiloa mo te fakatonuga a te Aliki.”

⁸Ne fanatu a Alona ki te fata-fai-taulaga, tamate ei ne ia a te tamā pulumakau mo fai tena taulaga mo te fakamagaloga o agasala.

⁹Ne aumai ne ana tama ki a ia a te toto, tela ne ufi atu ki ei tena matikao, kae nani atu ne ia ki nifo i matulimanu o te fata-fai-taulaga, ka ko te toega o te toto ne ligi ne ia ki te feitu ki lalo o te fata-fai-taulaga.

¹⁰Tena ne sunu ei ne ia i luga i te fata-fai-taulaga, a te gako o te manu, ana nonu, mo te feitu taua o te ate, e pela eiloa mo te fakatonuga a te Aliki ki a Mose.

¹¹Ka ko te pakili mo kano ne sunu ne ia i tua o te fa'kai.

¹²Ne ta foki ne Alona a te manu tela e fai mo fai tena taulaga‐sunu. Ne aumai ne ana tama tagata a te toto o te manu ki a ia, tela ne apiapi atu ei ne ia ki feitu e fa o te fata-fai-taulaga.

¹³Ne tuku atu ne latou ki a Alona a te ulu mo nisi feitu o te manu, tela ne sunu ne ia i luga i te fata-fai-taulaga.

¹⁴Oti aka, fulu fakalei ei ne ia ona totoga mo ana vae tua kae 'sunu atu ne ia i luga i te fata-fai-taulaga, mai luga atu o te taulaga‐sunu katoa.

¹⁵I te otiga o taulaga a Alona, ne ofo atu ei ne ia a te taulaga mo te fenua. Ne puke atu a ia ki te kouti tela ne fakatoka ke ofo mo agasala a te fenua, tamate ne ia, te mea eiloa ko ofo atu ne ia, e pela eiloa mo tena faiga ki tena taulaga mo ana agasala.

¹⁶Ne aumai foki ne ia a te manu mo te taulaga‐sunu, kae ofo atu ei ne ia e pela eiloa mo faifaiga o te taulaga tena.

¹⁷Ne tuku atu ne ia a te taulaga‐saito, kae ne asu aka ne ia ne mu falaoa ki ana lima o sunu i luga i te fata-fai-taulaga. A te mea tena se fakaopoopoga fua ki te taulaga sunu tela e fai i aso takitasi.

¹⁸Ne tamate ne ia a te pulumakau mo te mamoe ke fai ei te taulaga fakafetai a te fenua. Ne aumai ne ana tama ki a ia a te toto, tela ne apiapi atu ei ne ia ki feitu e fa o te fata-fai-taulaga.

¹⁹Ne tuku ne Alona a gako o te pulumakau mo te mamoe

²⁰ki luga i fatafata o manu, kae avatu katoa ne latou ki te fata-fai-taulaga. Ne 'sunu ne ia a te gako i luga i te fata-fai-taulaga,

²¹kae avatu ne ia a fatafata mo vae tua fakaatamai ke fai mo meaalofa fakapitoa ki te Aliki, ko kai ei ma faitaulaga e pela eiloa mo te fakatonuga a Mose.

²²I te otiga o taulaga a Alona ne fai, ne sisi ake ona lima i luga o tino kae fakamanuia atu ne ia latou. Oti aka, ko ia eiloa ko fanaifo.

²³Ne olo atu a Mose mo Alona ki loto i te Faleie o te Aliki, kae i te maiga ki tua, ne fakamanuia atu ne laua a tino, kae sae ake mo te mainaga o te Aliki i luga o tino katoa.

²⁴Ne 'poi eiloa latou me ko tuku ifo ne te Aliki te afi tela ne folo ne ia a te taulaga 'sunu, mo gako i luga i te fata-fai-taulaga. I te mateaga ne tino a te mea tena, ne ka'laga kae pu'nou o ifo ki lalo i te laukele.