Read Te Tusi Tapu I Te Gana Tuvalu Lomiga Lua IELEMIA 10 Bible Online

IELEMIA 10 - Te Tusi Tapu I Te Gana Tuvalu Lomiga Lua bible

IELEMIA 10

¹Tino Isalaelu, fakalogo mai ki te fekau a te Aliki ki a koutou.

²Ana muna, “Sa tautali ki faifaiga a nisi malo; Sa 'poi manafai e lavea ne koutou ne mea fakaatea i te lagi, Sa saga ki nisi malo manafai e mataku i mea kona.

³A te lotu a tino konei e seai se aoga. E kati ki lalo ne latou se lakau i te vao ko tata fakalei ei ki mea faigaluega a te tagata faite tupua,

⁴Ka oti ko fakagaligali ei ki siliva mo aulo. Ka oti ko 'tuki ei ki fao ke mo a e siga ki lalo.

⁵A tupua pena, e pela me ne mea fakamatakutaku i se fatoaga meleni; E se mafai ne latou o faipati, Kae e tau o aveave sale me e se mafai o sasale. Sa mataku ki tupua kona: E se mafai o fakapakia ne latou se tino, E se mafai foki o fai ne latou se tino ke lei.”

⁶Te Aliki, e seai se tino e 'pau mo koe; A koe e malosi, Ka ko tou igoa foki e mana kae takutakua.

⁷ Ko oi te tino e se fia fakaaloalo atu ki a koe, I a koe ko te tupu o malo katoa? E tau eiloa o fakaaloalo atu a tino ki a koe. E seai se tino e pau mo koe i tagata poto katoa o malo katoa; E seai foki se tupu i olotou tupu e pau mo koe.

⁸A latou ne tino valea katoa. Se a te mea e tauloto ne latou mai tupua lakau?[6]

⁹A olotou tupua e vali ki siliva mai i Sepania, Pela foki ki aulo mai i Ufasa, Ko galuega katoa kona a tino poto i te faite mea pena; A tupua kona e 'pei ki gatu violeti kae lanu kulakula Kola e sui ne tino poto i suiga o laugatu.

¹⁰Ka ko koe, e te Aliki, ko te Atua tonu, Koe ko te Atua ola Ko te tupu ki te se gata mai. Kafai e kaitaua koe, kae pole'pole te lalolagi; A malo e se mafai o kufaki ne latou tou kaitaua.

¹¹(E tau mo koutou tino o te fenua o fai atu ki a latou i atua kola e seki faite ne latou a te lagi mo te lalolagi e ta fakapalele katoa. Ka se toe ai eiloa latou i te lalolagi nei.)

¹²Ne faite ne te Aliki a te lalolagi ki tena mana; Ne faite ne ia te lalolagi ki tena poto Kae 'fola foki ne ia a lagi.

¹³A vai i luga atu o te lagi e gulu i te fakatonuga a te Aliki; E aumai ne ia a kaumana mai i feitu o te lalolagi. E fai ne ia a te uila ke lapa i te taimi e 'to ei te vaiua Kae uga mai ne ia a te matagi mai i tena potu 'teu koloa.

¹⁴A tagata e lagona ifo ne latou, Te se lava mo te valea; Manafai ko lavea ne latou a mea kona. A tino e faite ne latou a tupua Ko fakapouligina olotou mata, Me i atua e faite ne latou Ne atua mate fua, se ne atua tonu.

¹⁵A tupua kona e se aoga kae e 'tau o takalialia ki ei a tino; Ka 'ta fakapalelegina latou i te taimi e vau ei te Aliki o fakasala latou.

¹⁶A te Atua o Iakopo e se 'pau mo atua kona; Ko ia ne faite ne ia a mea katoa, Kae ne filifili ne ia a Isalaelu ke fai mo fenua o ia. A tena igoa ko te Aliki Malosi.

¹⁷Tino Ielusalema, koutou ko nikoi ne te fili! Fakatoka otou kope.

¹⁸A koutou ka ave keatea ne te Aliki mai i te fenua tenei; ka tukipala koutou ke mo a eiloa se tino o koutou e toe. Ko te Aliki tena ne faipati atu.

¹⁹Ne 'tagi aka a tino Ielusalema penei, “Matou ko logofiofio! A omotou pakiaga ko se toe mafai o lei. Ne leake eiloa nei matou me e mafai o kufaki ne matou a te mea tenei!

²⁰A omotou faleie ko ma'sei katoa; A lopu kola e sai ki ei ko motu. A omotou tamaliki katoa ko oti ne olo keatea; Ko seai ne tamaliki e 'toe ke toe fakatu aka a omotou faleie; Ko seai se tino ke tautau aka ne ia ona pui laugatu.”

²¹Ne tali atu au, “A omotou takitaki e valea; E se kalaga ki te Aliki mō se takitakiga lei. Tena te pogai ne se lei ei olotou takitakiga, Ko ala ei ki te salalau valevale atu o tino ki koga valevale.

²²Fakalogo mai! Ko oko mai te tala! E isi se gasuesuega lasi i se malo i te feitu ki matū; A tena kautau ka fuli ne ia a fa'kai o Iuta ke liu toafa, Se koga e nofo ei a manu vao e igoa ki tiakolo.”

²³Te Aliki, e iloa ne au me e seai se tino e pule i tena ikuga; E seai se tino e pule i tena ola.

²⁴Te Aliki, akoako aka tou fenua; kae sa to kaitaua malosi ki a matou; Sa fakasalagina foki matou i te taimi e kaitaua ei koe; Tena eiloa te gataga o matou.

²⁵Fuli atu tou kaitaua ki fenua kola e se tapuaki atu ki a koe, Ki tino kola e teke ki a koe. Ne tamate ne latou ou tino; Ne ta fakapalele ne latou a matou Kae tiakina mai te motou fenua me ko masei valevale.