Read Te Tusi Tapu I Te Gana Tuvalu Lomiga Lua IELEMIA 12 Bible Online

IELEMIA 12 - Te Tusi Tapu I Te Gana Tuvalu Lomiga Lua bible

IELEMIA 12

¹“Te Aliki, kafai e finau taua i te mataupu tenei e avake ne au. A te ikuga e tonu eiloa koe. Kae e ui eiloa i tena, e fia fesili atu eiloa au e uiga ki te fakamasinoga tonu. Ai a e maumea ei a tino amio masei? Ai a e taunu sale ei a fakamoemoega o tino se fakamaoni?

²Ne toki ne koe latou, mau ei olotou aka ki te laukele; Ne ola ake, fua mai ei olotou fuataga. E faipati faeloa latou ki mea lei e uiga ki a koe, Kae tela la, e se fia saga atu eiloa ki a koe.

³Ka ko koe, e te Aliki, e iloa ne koe au; E lavea ne koe aku mea e fai, E lavea foki ne koe a toku alofa ki a koe. Toso atu a tino amio masei konei pela me ne mamoe kola ka ave o ta; Leoleo fakalei latou ke oko ki te taimi e ta ei latou.

⁴E gata afea te malō o te motou laukele? E gata afea te mage o mouku i fatoaga? A manu vae fa mo manu eva ka mate ona ko uiga masei o omotou tino, Ko tino kola e fai sale penei, ‘E se lavea ne te Atua a mea a tatou e fai.”’[9]

⁵Muna a te Aliki, “Ielemia, kafai ko se maua ne koe o fakatautele mo tagata, E mafai la pefea ne koe o fakatautele mo solofanua? Kafai se mafai ne koe o tu fakalei i te fenua ateatea, Ka mafai la pefea ne koe o tu fakalei I te vao i tafa o te Iolitana?

⁶Ke oko foki eiloa ki ou taina, ko tino tonu i tou kaiga, Ne fakatogafiti foki ne latou a koe; Ko kau fakatasi latou o taua atu ki a koe. Sa talitonu ki a latou, e ui eiloa e faipati fakalei atu.”

⁷Muna a te Aliki, “Ko oti ne tiakina ne au a Isalaelu; Ko se manako au ki toku malo filifilia. Ne tuku atu ne au a toku fenua pele i te loto ki te malosi o olotou fili.

⁸A toku fenua filifilia ko fulitua mai ki a au; Ko gulu mai latou ki a au E pela me ne leona i te vao, Tela la, ko se fiafia lele eiloa au ki a latou.

⁹A toku fenua filifilia ko pela me se manu eva Tela e ta ne manu eva ko oka mai i feitu katoa. Kalaga atu ki manu vao Ke o'mai o fakatasi mai ki te kaiga!

¹⁰E tokouke a takitaki o fenua fakaatea ne fakamasei ne latou a taku togavine; Ne lakalaka ne latou aku fatoaga; Ne fuli ne latou toku fenua gali ke liu toafa.

¹¹Ne fai ne latou ke liu vao; Ko takato se aoga i oku mua. A te fenua katoa ko liu toafa, Kae seai eiloa se tino e fia saga atu ki ei.

¹²A tagata ne ui mai i toafa maluga, O o'mai o taua kae faomea. Ne uga ne au te taua ke fakamasei ei te fenua katoa; E seai eiloa se tino e mafai o ola i te filemu.

¹³A tino o toku fenua e toki ne latou a saito, Kae e maua fua ne latou ne mouku; Ne galue malosi, kae seai se lotou mea e maua mai i ei. Ona ko toku kaitaua fakamataku ko ala ei o se aoga olotou lakau kaina.”

¹⁴Muna a te Aliki, “E isi ne aku muna a fia fai ki tuakoi o Isalaelu kola ne fakamasei ne latou a te fenua tenei ne tuku ne au mo toku fenua ko Isalaelu. Ka ave keatea ne au a tino masei kona mai i olotou fenua e pela me se lakau ne unu, kae ka fakasao ne au a Iuta mai i a latou.

¹⁵Kafai ko oti ne ave keatea ne au a latou, kae ka toe alofa au ki a latou; ka toe fakafoki mai ne au a malo takitasi ki olotou fenua.

¹⁶Kafai e talia ne latou a te talitonuga a toku fenua mo olotou loto katoa, kae tauto foki latou penei, ‘A te Atua e ola’ — e pela mo te akoakoga ne latou a tino o toku fenua ke tauto i te igoa o Paala — tena la, ka fai foki latou mo oku tino kae ka maumea latou.

¹⁷Kae kafai se malo e se fakalogo, ka unu ne au kae ta fakamasei. Ko au, te Aliki, tena ne faipati atu.”