Read Te Tusi Tapu I Te Gana Tuvalu Lomiga Lua IELEMIA 15 Bible Online

IELEMIA 15 - Te Tusi Tapu I Te Gana Tuvalu Lomiga Lua bible

IELEMIA 15

¹ Ne fai mai te Aliki ki a au penei, “E se mafai ne au o alofa ki tino konei, faitalia foki eiloa manafai e o'mai Mose mo Samuelu o tu i oku mua o fakamolemole mai ki a au mo tino kona. Fai ke olo keatea, ke galo keatea mai i oku mua.

² Kafai e fesili atu me e olo latou ki fea, fai ki ei i a au ne fai atu penei: E isi ne tino e mate i te famai — Tena te koga e olo ki ei latou! A nisi tino e mate i te taua — Tena te koga e olo ki ei latou! A nisi tino e mate i te fiakai — Tena te koga e olo ki ei latou! A nisi tino e ave fakapagota — Tena te koga e olo ki ei latou!

³Ko au, te Aliki, ne iku i toku mafaufau me e fa a mea fakamataku e oko ki a latou: ka mate latou i te taua; ka toso keatea olotou foitino ne kuli; ka kai ne manu eva kae fakaoti fakalei ne manu vao.

⁴ Ka fai ne au a tino o te lalolagi ke poi kae mataku manafai e kilo ki a latou, e pogai te mea tena ona ko mea ne fai ne Manase te tama tagata a Hesekia i Ielusalema, i te taimi ne fai ei a ia mo tupu o Iuta.”

⁵Muna a te Aliki, “Tino Ielusalema, ko oi ka alofa atu ki a koutou? Kae ko oi foki ka tagi fanoanoa ona ko koutou? Ko oi ka mafai o tu ke tai leva o fesili atu me e a koutou?

⁶Ne teke mai koutou ki a au; Ne fulitua mai koutou ki a au; Tena la, ne fakaoko atu toku lima o tukipala koutou Me i a au ko fita i te taofiofi o toku kaitaua.[11]

⁷I fa'kai katoa i luga i te fenua, A koutou e pei sale fua ne au ki te matagi E pela me ne kausaito. Toku fenua, ne ta fakamasei ne au koutou, Ne tamate ne au otou tamaliki Me e seki fakagata eiloa otou amioga masei.

⁸E tokouke atu a fafine ko mate olotou avaga i te otou fenua I lo one o te matafaga. Ne tamate ne au a tamataene o te otou fenua i te taimi koi malosi ei, Kae fai ne au olotou matua ke tigaina. Ne ta fakapalele ne au latou.

⁹A te matua tela ne galo ana tamaliki e tokofitu, ko matapo, Kae ko taumafai ke manava a ia. A tena fiafia ko fuli ki te pouliga; Ko masiasi kae mafatia te loto. Ka tuku atu ne au otou fili ke tamate ne latou a nisi o koutou kona koi ola. Ko au, te Aliki, tena ne faipati atu.”

¹⁰Au ko oko eiloa i toku fanoanoa! Ai a ne aumai ei au ne toku matua ki te lalolagi tenei? Au e fakakinau faeloa mo tino katoa i te fenua. E seki ai eiloa ne tupe kai tuku fakakaitalafu atu ne au ki se tino, seai foki se tupe kai kaitalafu ne au mai i se tino; ka ko tino katoa e muna tuku faeloa ne latou a au.

¹¹Te Aliki, ke taunu olotou muna fakamalaia manafai e tonu e seki tavini fakamaoni atu au ki a koe, manafai foki e seki fakamolemole atu au ki a koe e uiga mo oku fili i taimi e maua ei latou ne fakalavelave.

¹²(E seai se tino e mafai o fati ne ia te fiti, kae maise te fiti mai i matu tela e palu tasi mo te palasi.)

¹³Muna a te Aliki ki a au, “Ka uga mai ne au a te fili ke ave keatea ne latou a te maumea mo te koloa o toku fenua, ko te mea ke fakasala latou ona ko agasala ne fai ne latou i luga i te fenua.

¹⁴Ka fai ne au latou ke tavini atu ki olotou fili i te fenua fakaatea, me i toku kaitaua e pela me se afi tela e ka faeloa ki te se gata mai.”

¹⁵Tena kae fai atu au penei, “Te Aliki, a koe e malamalama. Manatua mai au kae fesoasoani mai. Talia mai ke taui atu ne au ki tino kola ne o'mai o fakasaua au, e tusa mo te lotou mea ne fai mai ki a au. Na fakasalagina latou i te mea ma taunu ei te lotou fakamoemoega o tamate au. Masaua i au e muna maseigina ne tino i a au e tavini ki a koe.

¹⁶Ne faipati mai koe ki a au, kae ne fakalogo fakalei eiloa au ki au muna katoa ne fai. Te Aliki te Atua Malosi, au e o koe, tela la, au muna e aumai ne ia te fiafia ki toku loto.

¹⁷E seki fakamaumau oku taimi o nofo tasi mo nisi tino, o katakata kae fiafia. Au ne fakalogo eiloa ki au fakatonuga, ne nofo tokotasi eiloa au kae ko oko eiloa i toku ita.

¹⁸Ai a e puapuaga faeloa ei au? Ai a se mafai ei o lei oku pakiaga? Ai a e se lei ei? A koe e loto eiloa o faka'ita au e pela me se vaitafe foliki tela e masa pakupaku i te tau vela?”

¹⁹Ne tali mai te Aliki penei, “Kafai e foki mai koe, e toe puke mai eiloa ne au a koe, kae e toe fai eiloa koe mo aku tavini. Kafai e se faipati valevale koe, kae folafola eiloa ne koe te fekau aoga, kae ka toe fai koe mo aku pelofeta. A tino ka foki mai ki a koe, tela la, e se fita koe o fano ki a latou.

²⁰Ka fai ne au a koe ke pela me se pui palasi makeke. Ka taua atu latou ki a koe, kae e se mafai o fakatakavale ne latou a koe. Au e fakatasi atu ki a koe o puipui kae tausi a koe.

²¹Ka fakasao ne au a koe mai i te malosi o tino amio masei. Ko au, te Aliki, tena ne faipati atu.”