Read Te Tusi Tapu I Te Gana Tuvalu Lomiga Lua IELEMIA 17 Bible Online

IELEMIA 17 - Te Tusi Tapu I Te Gana Tuvalu Lomiga Lua bible

IELEMIA 17

¹Muna a te Aliki, “Tino Iuta, a te otou agasala e tusi ki lalo ki te mea tusitusi fiti; e tusi i otou loto ki te taemani mata makaikai, kae e ta foki i matulimanu o otou fata-fai-taulaga.

²A otou tino e tapuaki i fata-fai-taulaga pela foki ki fakatusa o te atua fafine ko Asaila i lalo o lakau lau usiusi katoa, i luga i ulu o mauga foliki,

³pela foki i luga i mauga i tua o te fa'kai. Ka fai ne au otou fili ke o mai o puke otou koloa mo te otou maumea, ona eiloa ko agasala a koutou ne fai[12] i luga i te fenua.

⁴Ka tiakina ne koutou te fenua tela ne avatu ne au mo koutou, kae fai ne au koutou ke tavini atu ki otou fili i se fenua tela e seki iloa lele eiloa ne koutou, me i toku kaitaua e pela me se afi, kae ka 'ka faeloa ki te se gata mai.”

⁵Muna a te Aliki, “Ka fakamalaia ne au a te tino Tela e fulitua mai ki a au Kae fakatuaga ki tino ola, Ki te malosi o tino ola.

⁶A ia e pela me se vao lakau i te toafa, Tela e ola i te laukele malo, I luga i te laukele taitaia, Te koga e seai aka foki se lakau e ola i ei. E seai eiloa se mea lei e maua ne ia.

⁷“Kae ka fakamanuia ne au a te tino tela e talitonu mai ki a au.

⁸ E pela a ia me se lakau tela e ola i tafa o se vaitafe foliki Kae solo atu ona aka ki te vai. E se mafai o manavase manafai ko oko mai te tau vela Me i ona lau e lau usiusi faeloa; E se manavase manafai e seai ne vaiua; E tumau faeloa te fua mai o ana fuataga.

⁹“Ko oi te tino e mafai o malamalama i te loto o te tagata ola? Ko te toe mea tafasili foki eiloa i te fakase tino; E se mafai o fai ke lei, me ko to masaki.

¹⁰ Au, te Aliki, e sukesuke ne au a mafaufauga o tino, Kae tofotofo ne au olotou loto. Aku faiga e fai ki tino, e fakatau eiloa ki te olaga ne ola ei latou; Kafai e lei, e fai fakalei ne au latou, Kafai e se lei, e se fakalei foki eiloa latou.”

¹¹A te tino e maua ana tupe i se auala se tonu, E pela me se manu eva tela e foa ne ia a fua o se manu fakaatea. Kafai ko tugāmalie i tena olaga, Kae ka galo ana koloa, Ka ko tena ikuga e liu tino valea.

¹²A te motou Faletapu e pela me se nofogaaliki malu, Tela ne tu i luga i te mauga mai i te kamataga.

¹³Te Aliki, a koe ko te fakamoemoega o Isalaelu; A latou katoa kola ne tiakina ne latou a koe ka fakamasiasigina. Ka galo atu latou e pela me ne igoa ne tusi i te pefu, [13] Me ne tiaki ne latou a koe, e te Aliki, Te vaipuna e puna mai i ei te vai fou.

¹⁴Te Aliki, fai aka ke lei oku pakiaga, ko te mea ke lei katoatoa au; fakasao mai au, kae ka saogalemu au. Ko koe e tavae ne au!

¹⁵A tino e fai mai ki a au penei, “Ko fea a mala kola ne folafola mai ne te Aliki me oko mai ki a matou? Fai ki ei ke na fakaoko mai i te taimi nei!”

¹⁶Te Aliki, e seki faimalo ne au a koe ke aumai te mala ki luga i a latou;[14] au seki manako ki se taimi o puapuaga mo latou. Te Aliki, e iloa ne koe te mea tenei; e iloa ne koe a mea ne faipati atu ne au.

¹⁷Sa fai pela me se mea fakamataku ki a au; a koe ko toku lafiga i taimi o fakalavelave.

¹⁸Te Aliki, fakamasiasi atu a tino kola e o mai o fakasaua a au, kae fakasao mai au. Fakamatakutaku atu latou, kae sa fakamatakutakugina au. Aumai a mala ki a latou kae ofagina latou ke malakulaku valevale.

¹⁹Muna a te Aliki ki a au, “Ielemia, fano o folafola atu taku fekau i te Mataloa o Tino, ko te mataloa tena e ulu sale i ei a tupu o Iuta ki loto i te fa'kai, ko te mataloa foki tena e olo sale ei ki tua mo te fa'kai; ka oti ko fano foki ei koe ki nisi mataloa katoa o Ielusalema.

²⁰Fai atu ki tupu mo tino Iuta, mo tino katoa kola e nofo i Ielusalema kae ulu sale i mataloa kona, ke fakalogo mai ki aku muna e fai atu.

²¹ Fai ki ei me kafai e alofa latou ki olotou ola, e se tau o ave sale ne lotou amoga i te Sapati; e se tau o ave ne latou ne mea i loto i mataloa o Ielusalema

²²io me amo ne mea mai i olotou fale i te Sapati. E se tau mo latou o galue i te Sapati; e tau o faka'malu fakalei ne latou me se aso tapu, e pela eiloa mo taku fakatonuga ki olotou tupuga.

²³A olotou tupuga e seki fakalogo mai ki a au io me saga mai ki aku fakatonuga, kae ne tumau te lotou loto makeke. E seki fia fakalogo mai ki a au, se fia saga mai foki ki aku akoakoga.

²⁴“Fai atu ki tino kona me e tau latou o fakalogo mai ki aku fakatonuga katoa. E se tau o amo ne latou ne amoga i loto i mataloa o te fa'kai tenei i te Sapati. E tau o tausi ki te Sapati me se aso e malu, kae se tau lele eiloa o fai se galuega i te aso tena.

²⁵Tena la, ka toe mafai o ulu atu olotou tupu mo olotou pelenise i mataloa o Ielusalema o toe puke te malosi fakatupu tela ne i a Tavita i aso mua. Ka toe sopo fakatasi latou mo tino Iuta mo Ielusalema i kaliota mo solofanua, ka ko te fa'kai o Ielusalema ka fonu faeloa i tino.

²⁶A tino ka o'mai mai i fa'kai o Iuta, pela foki mai i fa'kai i tafatafa o Ielusalema; ka o'mai mai i te koga fenua o Peniamina, mai i tafito mauga, mai i mauga, pela foki mai i Iuta i saute. Ka aumai ne latou ki toku Faletapu a taulaga sunu mo taulaga manu, taulaga saito mo mea manogi, pela foki a taulaga fakafetai.

²⁷Kae e tau mo latou o fakalogo mai ki a au, kae tausi ki te Sapati me se aso e malu. E se tau o amo ne latou ne amoga i loto i mataloa o Ielusalema i te aso tena, me kafai e fai ne latou, ko te mea ka sunu ne au a mataloa o Ielusalema. Ka ula a palesi o Ielusalema i te afi, kae seai se tino e mafai o tamate ne ia a te afi.”