Read Te Tusi Tapu I Te Gana Tuvalu Lomiga Lua IELEMIA 18 Bible Online

IELEMIA 18 - Te Tusi Tapu I Te Gana Tuvalu Lomiga Lua bible

IELEMIA 18

¹Muna a te Aliki ki a au,

²“Fano ki te fale o te tagata faite mea ki one, i kona ka avatu ne au taku fekau ki a koe.”

³Tena ne fanatu au, lavea ei ne au te tagata tena e fai mai ana galuega.

⁴Kafai e se tonu lei a tena mea e fia faite, e toe fakaaoga ne ia a te one tena o faite ki ei se mea fakaatea.

⁵Ne fai mai te Aliki ki a au penei,

⁶“E a, e se saoloto au o fai te mea e loto au ki ei ki tino Isalaelu, e pela mo te tagata faite mea ki one e pule i te mea e manako a ia o faite ki one? A koutou e i oku lima e pela mo one i lima o te tagata faite mea ki one.

⁷Kafai ne faipati au i so se taimi, me ka ofa fakamasei ne au se malo, kae

⁸kafai ne fuli keatea te malo tena mai i ana uiga masei, ko tena uiga ko se fakataunu ne au a te mea ne fakamoemoe au o fai.

⁹E pena foki manafai ne fai au pela me ka toki kae atiake ne au so se malo,

¹⁰kae kafai ko se fakalogo mai a te malo tena ki a au kae fai amioga masei, ko tena uiga ka se fakataunu ne au taku pati ne fai.

¹¹Fai atu la ki tino Iuta mo Ielusalema i a au ko fakatoka aku aofaga o fakasala latou. Fai ki ei ke fakagata te olaga fai agasala o latou, ke fuli olotou uiga mo mea e fai ne latou.

¹²Ka tali mai latou penei, ‘Ikai, ai a e fakalogo atu ei matou o fai a mea kona? A matou e tumau eiloa te motou loto makeke mo te fai amioga masei.”’

¹³Muna a te Aliki, “Fai atu ki malo me kai tupu eiloa se mea pena i aso mua. A tino Isalaelu ne fai ne latou se mea tafasili i te masei!

¹⁴E a, e isi eiloa se taimi ne seki ai ei se kiona i mauga maluga o Lepanona? E a, e isi eiloa se taimi kai masa pakupaku ei a vaitafe moko i mauga kona?

¹⁵Ka ko oku tino, ko puli i a latou a au; e sunu mea manogi ki tupua. Ko siga latou i te auala ne olo ei latou; ko se tautali lele eiloa i olotou ala mua; ko sasale latou i luga i auala kola e seki faite fakalei.

¹⁶Ne fai ne latou te fenua tenei mo koga fakamataku, ke takalialia i ei a tino ki te se gata mai. A tino katoa kola e faka'sili aka i te koga tenei ka poi i te mea e lavea ne latou; ka lūlū olotou ulu i te ofo.

¹⁷Ka fakasalalau ne au oku tino i mua o olotou fili, e pela me ne pefu e agina i te matagi mai i te saegala. Ka fuli atu toku tua ki a latou; Ka se fesoasoani lele eiloa au ki a latou manafai e oko mai te fakalavelave.”

¹⁸Ne fai mai a tino penei, “Tatou ka olo o ta Ielemia! E isi eiloa ne faitaulaga e o'mai o akoako tatou, tino poto o fakatonutonu tatou, mo pelofeta ke folafola ne latou a te fekau a te Atua. O'mai ke moli ne tatou a ia ki mua o te fono, kae ke se toe fakalogo foki tatou ki ana muna e fai.”

¹⁹Tena ne talo atu ei au penei, “Te Aliki, fakalogo mai ki aku muna, kae fakalogo atu foki ki muna a oku fili e fai e uiga ki a au.

²⁰E a, e taui te lei ki te masei? Ne keli ne latou te lua ke to au ki loto i ei. E masaua ne koe taku vauga o faipati atu ki a koe mō latou, ko te mea ke se ta ne koe latou i tou kaitaua.

²¹Kae nei, te Aliki, tuku atu olotou tamaliki ke mate i te fiakai; tuku atu latou ke mate i te taua. A fafine ke galo olotou avaga mo tamaliki; a tagata ke mate i famai, ka ko tamataene ke mate i te taua.

²²Uga atu se potukau ke olo o ta kae fao a mea i olotou fale kae seai se fakailoaga; fai ki ei ke tagi ki luga i te mataku. Ne keli ne latou se lua ke to au ki ei, kae tao ne latou a malei ke lavelave au i ei.

²³Kae e iloa eiloa ne koe, e te Aliki, a olotou togafiti katoa ke tamate au. Sa fakamagalogina olotou agasala mo olotou amioga masei. Pei atu latou ke takavale valevale, kae 'ta atu latou i tou kaitaua.”