Read Te Tusi Tapu I Te Gana Tuvalu Lomiga Lua IELEMIA 19 Bible Online

IELEMIA 19 - Te Tusi Tapu I Te Gana Tuvalu Lomiga Lua bible

IELEMIA 19

¹A te Aliki ne fai mai ki a au ke fano au o togi mai se tiā ne faite ki one. Ne fai mai foki ki a au ke puke ne au ne lua tino matuatua o te fenua mo ne faitaulaga matuatua,

² kae olo atu i loto i te Mataloa o Potisete o olo ki te vanu o Hinomo. I kona, ka folafola atu ei ne au a te fekau tela ka tuku mai ne ia ki a au.

³A te Aliki ne fai mai ke fai atu au penei, “Tupu o Iuta mo tino Ielusalema, fakalogo mai ki muna a te Aliki Malosi, te Atua o Isalaelu, konei ka fai atu. Ka aumai ne au te fakalavelave ki luga i te koga tenei, a tino e logo i te mea tenei ka poi kae ofo.

⁴E fai ne au a te mea tena me ne tiakina ne tino a au, kae fakalailai ne latou a te koga tenei i olotou taulaga ki atua fakaatea — ko atua kona e seki iloa eiloa ne latou io me ko olotou tupuga, e seki iloa foki eiloa ne tupu o Iuta. Ko fakafonu ne latou a te koga tenei ki toto o tino seai ne olotou agasala ne fai,

⁵ kae ne faite ne latou a fata-fai-taulaga ki a Paala, ko te mea ke sunu olotou tamaliki i te afi e fai mo taulaga. E seki fakatonu lele eiloa ne au ke fai ne latou se mea pena; e seki oko foki eiloa ki toku mafaufau se mea pena.

⁶Tela la, ka oko mai te taimi e se toe fakaigoa ei te koga tenei ko Tofeta io me ko te Vanu o Hinomo, kae ka fakaigoa ko te Vanu o Tatino.

⁷I te koga tenei, ka fakaseaoga ei ne au a fuafuaga katoa a tino Iuta mo Ielusalema. Ka tuku atu ne au latou ke takavale i olotou fili, kae ke tamate foki latou ne olotou fili i te taua. Ka tuku atu ne au olotou foitino mate ke kai ma manu eva mo manu vao.

⁸Ka ofa fakamasei ne au a te fa'kai tenei, a tino katoa e fakasili aka i tafa o te fa'kai tenei ka poi kae ofo.

⁹A te fili ka nikoi ne latou te fa'kai kae taumafai o tamate a tino i ei. A te pukega o te fa'kai ka se faka'tau eiloa i te fakamataku, tela la, a tino i loto i te fa'kai ka fakatau kai ne sua tino a te sua tino, ke oko foki eiloa ki olotou tamaliki.”

¹⁰Tena, ne fai mai ei te Aliki ke 'foa ne au a te tiā i mua o tagata kola ne olo mo au

¹¹kae ke fai ki ei i te Aliki Malosi ne fai mai penei, “Ka ofa ne au a te fa'kai tenei mo tino i ei, kae ka penei eiloa mo te tiā tenei ko mafā, ko se toe mafai o faka'piki fakatasi. A tino ka tanu olotou tino mate i Tofeta, me e seai aka foki se koga ke tanu i ei latou.

¹²Au e tauto me ka fai ne au a te fa'kai tenei, mo tino i ei, ke pēlā mo Tofeta.

¹³A fale o Ielusalema, a fale o tupu o Iuta, mo fale katoa kola ne sunu mea manogi a tino i olotou tuafale ki fetu, kae ligiligi i ei a uaina e fai mo taulaga ki atua fakaatea — a fale kona ka lailai katoa i feitu fakatapuakiga e pēlā mo Tofeta.”

¹⁴Tena ne tiakina ei ne au a Tofeta, te koga ne uga au ki ei ne te Aliki o folafola atu tena fekau. Au ne fano o tu i te malae fono o te Faletapu, kae faipati atu ki tino katoa

¹⁵i te Aliki Malosi, te Atua o Isalaelu, ne fai mai penei, “Ka aumai ne au ki te fa'kai tenei, pēlā foki ki fa'kai pili mai katoa, a te fakasalaga tela ne mafaufau au o aumai, me i a koutou ko oko eiloa i te loto makeke kae se fia fakalogo ki aku muna e fai.”