Read Te Tusi Tapu I Te Gana Tuvalu Lomiga Lua IELEMIA 2 Bible Online

IELEMIA 2 - Te Tusi Tapu I Te Gana Tuvalu Lomiga Lua bible

IELEMIA 2

¹A te Aliki ne fai mai ki a au

²ke folafola atu ne au ki tino katoa i Ielusalema a te fekau tenei, “E masaua ne au i a koe e lasi tou fakamaoni i aso koi foliki ei koe, Kae ne alofa foki eiloa koe ki a au I te taimi ne fatoa fakaipoipo ei taua; Ne tautali mai koe i a au i loto i te vao, I loto i kogā laukele tela e seki toki ki ei ne lakau.

³Isalaelu, a koe e a aku tokotasi; A koe ko toku fenua tapu. Ne avatu ne au a mala mo puapuaga Ki tino katoa kola e taumafai o faitaua atu ki a koutou. Ko au, te Aliki, tena ne faipati atu.”

⁴Fakalogo mai ki te fekau a te Aliki, koutou te gafa o Iakopo, koutou matakaiga o Isalaelu.

⁵Muna a te Aliki: “Se a te mataupu a otou tupuga ne avake e uiga ki a au? Se a te pogai ne fulitua mai ei latou ki a au? E tapuaki latou ki tupua se aoga, tena la, ko se aoga foki ei latou.

⁶E se fia 'saga lele mai eiloa latou ki a au, Kae tela la, ne faka'sao ne au latou mai i Aikupito Kae taki ne au latou i loto i te vao: Se laukele e seai ne lakau e ola i ei kae uke a lua fakamataku i ei, Se laukele fakamataku kae seai ne vai i ei, Kae seai ne tino e nofo i ei, E seai foki se tino e fia malaga i se koga pena.

⁷Ne aumai ne au latou ki se fenua laukele ola, Ke fiafia latou o fakaaoga a fuagalakau mo nisi mea lei aka foki. Kae tela la, ne fakamasei ne latou toku fenua; Ne fakalailai ne latou a te fenua tena ne avatu ne au mō latou.

⁸A faitaulaga e seki fia fesili penei, ‘Tefea te Aliki?’ Aku faitaulaga e se iloa ne latou a au. A tino pule ko teke mai ki a au; A pelofeta ko faipati i te igoa o Paala kae tapuaki ki tupua se aoga.

⁹“Tela la, ko au te Aliki, ka fakaasi atu ne au taku mataupu e uiga ki toku se fiafia ki oku tino. Ka fakaasi aka foki ne au a nisi mea e uiga ki te se lei o olotou tupuga.

¹⁰Olo ki te togala ki te fenua o Kupelu, Kae uga atu se tino ki te saegala ki te fenua o Ketala. Ka lavea ne koutou i te mea tenei ka tupu, E seki tupu eiloa i aso mua.

¹¹E seki ai eiloa se malo ne fuli ana atua, E ui eiloa e se ne atua tonu a atua kona. Ka ko oku tino ko oti ne fesuiaki ne latou a au, Te Atua tela ne aumai ne ia te tulaga fakaaloalogina ki a latou, Ki atua kola e se mafai o fai se mea lei mō latou.

¹²Tela la, ko fakatonu ne au a te lagi ke 'pole i te mataku, Ke ofo kae poi,

¹³Me i toku fenua ko fai ne latou a agasala e lua: Ko oti ne fulitua mai ki a au, Te vaipuna e maua ei te vai fou, Kae ne keli ne latou ne vaikeli, Ne vaikeli se aoga kola e se mafai o taofi ei se vai.

¹⁴“A Isalaelu e se se pologa; E seki fanau mai i se kaiga pologa. Ai a la e salasala ei a ia ne ona fili o ta?

¹⁵Ne 'gulu atu latou ki a ia e pela me ne leona; Ne fakamasei ne latou tena fenua ke liu toafa, Mo ona fa'kai ko ma'ofa valevale, Kae ko seai ne tino e nofo i ei.

¹⁶Ao, ko tagata Mefisi mo tagata Tapenesa ne foa ne latou tena ulu.

¹⁷Isalaelu, a mea kona e pogai mai foki eiloa i a koutou! Ne tiakina ne koutou a au, te Aliki te otou Atua, I te taimi ne taki ei ne au koutou i te ala.

¹⁸Se a te mea ka maua ne koutou i te olo o koutou ki Aikupito O inu i te vai o te Naila? Se a te mea e maua ne koutou i te olo o koutou ki Asulia O inu i vai o te Eufilate?

¹⁹Ka fakasala eiloa koutou ne otou amioga masei, Ka fakamalaia foki eiloa koutou i te fulitua mai o koutou ki a au. Ka matea ne koutou te 'kona mo te se o te mea a koutou tena ne fai, O tele keatea mai i a au, te Aliki te otou Atua, Kae ko se tumau foki te otou fakamaoni mai ki a au. Ko au, te Aliki Sili i te Maluga, tena ne faipati atu.”

²⁰Muna a te Aliki Sili, “Isalaelu, a koe ne teke mai ki taku pule i aso mua; Ne ita koe ma fakalogo mai, kae tapuaki mai ki a au. I luga i mauga foliki katoa, Pela foki i lalo o malūga o lakau katoa, E fai ei au tapuakiga ki atua se aoga.

²¹Ne toki ne au a koe e pela me se vine ne filifilia fakalei, Mai fuataga tafasili i te gali. Kae kiloke ki te mea ko fua mai i a koe! A koe ko pela me se vine pala kae se aoga.

²²Me pefea eiloa te malosi o te sopu e kana ei koe Kae e lavea atu eiloa ne au a te lailai o te agasala i a koe.

²³E mafai pefea ne koe o fai mai me e seki fakalailai eiloa ne koe a tou foitino, I a koe e seki tapuaki eiloa ki a Paala? Kiloke ki te agasala ne fai ne koe i te vanu; Kilo ki te mea ko oti ne fai ne koe. A koe ko pela me se kamela vao tela ko manako ki sena soa, Kae ko tele sale fua

²⁴Ko te mea eiloa ko tele kini atu ki loto i te toafa.[1] Kafai ko manako te kamela fafine ki sena soa tagata, Ko oi te tino e mafai o taofi ne ia? So se kamela tagata e manako ki ei, E seai se mea e tau o fakafita a ia ki ei, Me e toka faeloa i te taimi o te fakatasiga.

²⁵Isalaelu, sa fakamae ou vae, Sa fakamae foki tou kato i te fiainu, I te fano fua o koe o tautali i tua o nisi atua. Ne fai aka au pati penei, ‘Ikai! Ko se mafai ne au o toe foki. Au ko alofa eiloa ki atua fakaatea, Tela la, au ka tautali atu eiloa i a latou.’ ”

²⁶Muna a te Aliki, “E pela eiloa mo te tino kaisoa tela ko maua atu kae ko fakamasiasigina, e pena eiloa te fakamasiasiga ka oko ki a koutou tino Isalaelu katoa — ko otou tupu mo tino maluga, otou faitaulaga mo pelofeta.

²⁷A koutou e fakamasiasigina katoa, koutou kona e fai aka pela i te lakau ko te otou tamana, ka ko te kaupapa ko te otou matua. Ka tupu te mea tena i a koutou ne fulitua mai ki a au, kae seki fuli mai ki a au. Kae kafai ko maua koutou ne fakalavelave, ko kalaga mai ei koutou ke fanatu au o fakasao koutou.

²⁸“Ko fea a atua kola ne faite ne koutou ma koutou? Kafai ko maua koutou ne fakalavelave, fai ki ei ke fakasao ne latou a koutou — manafai e mafai ne latou! Iuta, a te uke o otou atua ko pau eiloa mo te uke o otou fa'kai.

²⁹Se a te mea tena e se malie koutou ki ei? Ai a ko teke mai ei koutou, ki a au?

³⁰Ne fakasala ne au koutou, kae e seai se lei e maua mai i ei; e se talia eiloa ne koutou ke fakasao atu koutou ne au. Ne tamate ne koutou otou pelofeta, e pela eiloa koutou me ne leona kaitaua.

³¹Tino Isalaelu, fakalogo mai ki aku muna konei e fai atu. Kai fai eiloa au pela me se toafa ki a koutou, pela me se fenua pouli kae fakamataku? Ai a la e fai mai ei koutou pela me e fai eiloa ne koutou a te mea e loto koutou ki ei, kae ka se toe foki mai koutou ki a au?

³²E mafai ne se tamafine o puli ana teuga taua io me se tamafine ka fakaipoipo o puli tena gatu fakaipoipo? Ka ko toku fenua ko puli i a latou a au i aso e uke ko se mafai o lau.

³³A koutou ko oko eiloa i te atamai o tele i tua o otou fiafaiga. A fafine tafasili i te masei e mafai o tauloto i otou uiga.

³⁴A otou gatu ko pisia i toto o tino mativa mo tino amiotonu, kae se ko toto o tino kaisoa. “Kae e ui i mea katoa konei,

³⁵kae e fai mai eiloa koe penei, ‘Au e se se; a te Aliki kaati ko se ita mai ki a au.’ Ka ko au, te Aliki, ka fakasala ne au a koe i a koe e se taku tonu mai i a koe ko agasala.

³⁶Ko fakaseaoga ne koe a koe i tou fuli atu ki atua o nisi malo. Ka salamo koutou i a koutou ne fuli atu ki a Aikupito, e pela eiloa mo te fakamoemoega a koutou ki a Asulia, kae seki fai ne Asulia te mea ne fakamoemoe koutou ki ei.

³⁷Ka fulitua atu koutou ki a Aikupito, mo otou ulu e punou i te masiasi. Ko au, te Aliki, ne teke ne au a tino kola ne fakalagolago koutou ki ei; e seai se mea e maua ne koutou mai i a latou.”