Read Te Tusi Tapu I Te Gana Tuvalu Lomiga Lua IELEMIA 22 Bible Online

IELEMIA 22 - Te Tusi Tapu I Te Gana Tuvalu Lomiga Lua bible

IELEMIA 22

¹A te Aliki ne fai mai ki a au ke fano au ki te palesi o te tupu o Iuta, kae fakaasi ki a latou a te fekau,

²te gafa o Tavita, te tupu, mo ana ofisa, mo tino Ielusalema, ke fakalogo ki muna konei a te Aliki:

³“Au, te Aliki, ko fakatonu atu ki a koutou ke fai ne koutou a te mea tonu mo te fakamasinoga tonu. Puipui fakalei ne koutou a te tino tela e fakaloiloigina mai i te tino fakaloiloi. Sa fai fakamasei io me fakasaua ne koutou a tino fakaatea, tamaliki seai ne matua, pela foki a fafine ko mate olotou avaga; kae sa sona tamategina a tino seai ne lotou mea se ne fai, i te koga tapu tenei.

⁴Kafai e fakamaoni koutou o tautali i aku fakatonuga, kae ka tumau eiloa te fakasologa o tupu i te gafa o Tavita. Ka tumau foki te ulu sale atu o latou mo olotou ofisa mo tino o te lotou fenua i loto i mataloa o te palesi tenei, i luga i kaliota mo solofanua.

⁵ Kae kafai e se tautali koutou i aku fakatonuga, au e tauto ki a koutou i te palesi tenei ka masei valevale. Ko au, te Aliki, tena ne faipati atu.

⁶“I taku kilo, a te palesi o Iuta e gali pela mo te fenua o Kileata, pela foki mo mauga o Lepanona; kae ka fai ne au ke lavaki, ke fai mo koga e seai ne tino e nofo i ei.

⁷Ka uga ne au ne tagata ke olo o ofa fakamasei a te palesi tena. Ka o'mai latou mo olotou takū o kati ki lalo ona pou alasi, kae pei atu ki loto i te afi.

⁸“Fakamuli ifo, e tokouke a tino fakaatea ka fakasili aka i tafa o te fa'kai, kae fakatau fesilisili i a latou eiloa, me ai a ne fai ei ne au se vaega mea pena ki te fa'kai takutakua tenei.

⁹Kae ka tali atu koutou me ne ala o fai ne te Aliki a te mea tena ona ne seki tausi ne koutou a te feagaiga a koutou mo au, te otou Atua, kae ne tapuaki kae tavini atu eiloa koutou ki nisi atua.”

¹⁰Tino Iuta, sa tagi fanoanoa mo te Tupu ko Iosia Sa tagi fanoanoa i tena mate. Kae ke tagi fanoanoa koutou ona ko losia tena tama tagata; Ka ave ne latou a ia, se toe foki mai eiloa a ia, Se toe lavea ne ia a te fenua ne fanau ei a ia.

¹¹ Konei a muna a te Aliki ne fai e uiga ki te tama tagata a Iosia ko Ioasi, tela ne sui ne ia tena tamana o fai mo tupu o Iuta, “Ko fano a ia keatea mai i konei, se toe foki mai.

¹²Ka mate atu eiloa a ia i te fenua ne ave ki ei a ia, kae ka se toe matea eiloa ne ia a te fenua tenei.”

¹³Ke malaia te tagata tela e faite tena fale i auala se tonu, Kae fakalasi ne ia i uiga se fakamaoni; E fai ne ia a tagata o tena fenua ke galue seai ne togi, Kae se avatu ne ia se togi mō latou.

¹⁴Ke malaia te tagata tela e fai ana muna penei, “Ka faite soku fale Kae fai ke lasi lei a potu i te fogafale ki luga.” Ne fakapiki ne ia a fakamalama o tena fale, Kae pui te koga i loto ki laupapa o te alasi, Kae peni ne ia ki te peni kula.

¹⁵E mata e lei atu tou tulaga fakatupu Manafai e faite ou fale ki laupapa o te alasi, Ke gali atu i fale o nisi tupu? A tou tamana ne fiafia me ne ola eiloa ke oko ki tena toeaina. A ia se tagata e fai mea tonu kae fakamasino ki te mea tonu, Kae e manuia i ana mea katoa e fai.

¹⁶E fakamasino ne ia a tino mativa i te mea tonu Kae ne solosolo lei tena olaga katoa. Tena te uiga tonu o te tagata ko iloa tonu ne ia a te Aliki.

¹⁷Ka ko koe e kilo fua ki mea e manako ki ei tou loto; E tamate ne koe a tino amiotonu, Kae pule fakasaua ne koe ou tino. Ko te Aliki tena ne faipati.

¹⁸ Tena la, ne faipati mai te Aliki e uiga ki te tama tagata a Iosia ko Ieoiakimo, te tupu o Iuta, ana muna, “E seai se tino e tagi fanoanoa i tena mate, Io me fai aka penei, ‘Ko alofa au i toku taugasoa!’ E seai se tino e tagi fanoanoa Ki a ia io me tagi aka penei, ‘Toku aliki! Toku tupu!’

¹⁹A te faiga fanoanoa e fai ki a ia, E pela mo te faiga fanoanoa ki te manu ko te asini, Ka oti ko toso atu ei a ia keatea, O ave o pei ki tua i mataloa o Ielusalema.

²⁰Tino Ielusalema, olo ki Lepanona o pakalaga, Olo o tagi i te fenua o Pasana; Kalaga mai mai i mauga o Moapi, Me i fenua e kau mo koutou ko takavale katoa.

²¹A te Aliki ne faipati atu ki a koutou i te taimi ne maumea ei koutou, Ka ko koutou e seki fia fakalogo. Tena eiloa te mea ne fai ne koutou i te otou olaga katoa; E se mafai eiloa ne koutou o fakalogo ki te Aliki.

²²A otou tino pule ka agi keatea ne te matagi, A tino e kau mo koutou ka puke fakapagota, A te otou fa'kai ka fakamasiasi Ona ko amioga masei katoa a koutou ne fai.

²³A koutou e manava mo te saogalemu i tafa o alasi kola ne aumai mai i Lepanona; Kae ko alofa au i a koutou manafai ko oko atu te mae ki a koutou Pela mo te mae o te fafine ka fai o fanau.

²⁴ Muna te Aliki ki te Tupu ko Ieoiakini, te tama tagata a Ieoiakimo, te tupu o Iuta, “Au ko te Atua ola, e faipati tonu atu au penei, me moi fai pela a koe ko te mama i toku lima fakaatamai, e tapale eiloa koe ne au keatea

²⁵kae tuku atu koe ki tino kola e mataku koe i ei, tino kola e fia tamate ki a koe. Ka tuku atu ne au a koe ki te Tupu ko Nepukanesa o Papelonia mo tena kautau.

²⁶Ka fai malo ne au a koe mo tou matua ke ave fakapagota. Ko olo koulua ki te fenua e seki fanau i ei koulua, kae ka mate eiloa koulua i kona.

²⁷Ka toe fia kilo ou mata ki te fenua tenei, kae e se mafai, i a koe e se toe foki mai.”

²⁸Ne fai atu au penei, “E a, kai fai a Ieoiakini pela me se tiā one ko mafa, tela ko pei keatea kae ko seai eiloa se tino e manako ki ei? Tena te pogai ne ave fakapagota ei a ia mo ana tamaliki ki se fenua e seki iloa eiloa ne latou?”

²⁹Te fenua, te fenua, te fenua! Fakalogo mai ki muna a te Aliki:

³⁰“A te ikuga o te tagata tenei, Ne fakamalaia eiloa ke 'galo ana tamaliki, Ke pela me se tagata tela e se mafai o taunu ana mea e fai. Ka seai ne tino i tena gafa ke pule i Iuta, Ke fakatumau ei te fakasologa o tupu i te gafa o Tavita. Ko au, te Aliki, tena ne faipati atu.”