Read Te Tusi Tapu I Te Gana Tuvalu Lomiga Lua IELEMIA 23 Bible Online

IELEMIA 23 - Te Tusi Tapu I Te Gana Tuvalu Lomiga Lua bible

IELEMIA 23

¹Ka se fakatau eiloa i te fakamataku o te fakamasinoga a te Aliki ki tino pule kola ne ta kae fakasalalau ne latou a tino o tena fenua!

²Konei a muna a te Aliki, te Atua o Isalaelu, e uiga ki takitaki kola ne tau o onoono fakalei ki tino o tena fenua: “A koutou e seki tausi fakalei ki oku tino; ne fakasalalau ne koutou ki fenua valevale kae afuli ne koutou keatea. Ka fakasala nei ne au koutou ona ko te amioga masei tena ne fai ne koutou.

³Ka toe fakamaopoopo mai ne au oku tino kola koi toe mai i fenua kola ne fakasalalau ne au ki ei, kae ka toe fakafoki mai ne au latou ki te lotou fenua tonu. Ka tokouke olotou fanau, kae ka gasolo eiloa o mumea aka te aofaki o latou.

⁴Ka filifili ne au ne takitaki ke tausi latou. Ka se toe mataku eiloa oku tino, kae ka se toe fakasala ne au latou.[16] Ko au, te Aliki, tena ne faipati atu.”

⁵ Muna a te Aliki, “E oko mai te taimi e filifili ei ne au se tino amiotonu mai i te gafa o Tavita ke fai mo tupu. A te tupu tena ka pule mo te atamai, kae fai ne ia te mea tonu kae lei i te fenua katoa.

⁶Kafai ko fai a ia mo tupu, kae ka saogalemu te olaga o tino Iuta, ka nofo foki a tino Isalaelu i se olaga filemu. Ka fakaigoa a ia ko ‘Te Aliki, te Tou Fakaolataga.’

⁷Muna a te Aliki, “E oko mai te taimi e se toe fakaaoga ei ne tino i olotou tautoga a toku igoa tela ko te Atua ola, tela ne aumai ne ia a tino Isalaelu mai i Aikupito.

⁸Kae ka fakaaoga ne latou i olotou tautoga a toku igoa tela ko te Atua ola tela ne aumai ne ia a tino Isalaelu keatea mai i te fenua i matū, pela foki mai i nisi fenua katoa kola ne fakasalalau ne au ki ei latou. Tena la, ka nofo ei latou i te lotou fenua tonu.”

⁹A toku fatu ko momomo, ka ko au ko polepole. Ona ko te Aliki mo ana muna malu, Tela la, au ko pela faka me se tino konā, Tela ko to uke ana uaina ne inu.

¹⁰A te fenua ko fonu i tino se fakamaoni ki te Aliki; E ola i se olaga masei, kae fakaaoga se ne latou olotou malosi. A te laukele ko tagi fanoanoa Mo malae moukua ko malō Ona ko te fakamalaiaga a te Aliki.

¹¹Muna a te Aliki, “A pelofeta mo faitaulaga ko oko eiloa i te fapaupau; Ko oti ne maua ne au e fai ne latou a amioga masei i te Faletapu.

¹²A auala e olo ei latou e molemole kae pouli; Ka fai ne au latou ke siga. Ka aumai ne au a puapuaga ki a latou; a te taimi o te fakasalaga o latou ko pili mai. Ko au, te Aliki, tena ne faipati atu.

¹³Ko oti ne lavea ne au a te agasala a pelofeta o Samalia: ne faipati latou i te igoa o Paala, kae taki se ne latou a tino o toku fenua.

¹⁴ Kae e silia atu te masei o te mea ne lavea ne au i pelofeta o Ielusalema: E mulilua kae loi; E fesoasoani ki tino ke fai a mea se, Ko te mea ke mo a e gata te faiga o amioga masei. I taku kilo, a latou e pau eiloa mo tino o Sotoma mo Komolo i te masei.

¹⁵“Tela la, konei aku muna e uiga ki pelofeta o Ielusalema: Ka tuku atu ne au a lakau 'kona ke kai ki ei latou Mo meainu poisini ke inu ki ei latou, me ko faka'solo ne latou te olaga fapaupau i te fenua katoa.”

¹⁶Muna a te Aliki Malosi ki tino Ielusalema, “Sa fakalogo ki muna e fai mai ne pelofeta; ko fakafonu ne latou a koutou ki fakamoemoega lei kola e se tonu. E faipati atu ne latou a mea kola ne mafaufau ki ei latou, kae se ko mea ne folafola atu ne au.

¹⁷E fai faeloa olotou muna ki tino kola e ita ma fakalogo mai ki aku muna, me e lei faeloa mea katoa. E fai foki olotou muna ki tino loto makeke, me e se mafai o oko atu ne puapuaga ki a latou.”

¹⁸Ne fai aku muna penei, “E seai eiloa se pelofeta i pelofeta konei ne iloa ne ia a mafaufauga funa o te Aliki. E seai eiloa se tino i a latou kai lagona io me malamalama i tena fekau, e seki fakalogo foki io me saga atu ki ana muna ne fai.

¹⁹A tena kaitaua se afā, se matagi malosi tela e agi i luga i ulu o tino amio masei,

²⁰kae e se mafai o gata, vagana ke oti ne fakataunu ne ia a mea katoa kola ne fakamoemoe a ia o fai. I aso mai mua nei, kae ka malamalama fakalei a tino o tena fenua i mea kona.”

²¹Muna a te Aliki, “E seki uga ne au a pelofeta kona, kae ne olo eiloa i a latou. E seki ai se fekau ne tuku atu ne au ki a latou, kae ne faipati atu eiloa ki tino i toku igoa.

²²Moi ne iloa ne latou oku mafaufauga lilo, e penei e folafola atu ne latou taku fekau ki tino o toku fenua, ka mafai foki o fai ne latou oku tino ke tiaki te olaga masei tela e ola ei latou, mo amioga masei kola e fai sale ne latou.

²³“Au se Atua e nofo i koga katoa, kae se i se koga fua e tasi.

²⁴E seai se tino e mafai o muni mai i a au. E se iloa ne koutou i a au e nofo i koga katoa, i te lagi mo te lalolagi?

²⁵E iloa ne au a muna a pelofeta kola e fai, kola e faipati ki muna loi i toku igoa, kae fai pela me ne avatu ne au aku fekau ki a latou i moemiti.

²⁶E gata afea te fakaloiloi ne pelofeta kona a tino ki olotou loi ne fatu?

²⁷E leake nei latou i olotou moemiti kola e fakamatala atu ne latou ka fai ne ia a tino o toku fenua ke puli i a latou a au, e pela mo olotou tamana kola ne puli i a latou a au kae fuli atu ki a Paala.

²⁸A te pelofeta tela ne moemiti fua, e tau o fakaasi atu ne ia me se moemiti fua, ka ko te pelofeta tela ne lagona eiloa ne ia taku fekau, e tau eiloa o folafola atu ne ia a te fekau tena mo te fakamaoni. Se a te lei e maua i te kausaito manafai e fakatusa mo te saito?

²⁹A taku fekau e pela me se afi, kae pela foki me se samala tela e ofa likiliki ne ia a kaupapa.

³⁰Au e se fiafia ki pelofeta kola e folafola ne latou a muna a nisi pelofeta o fai pela me se fekau mai i au.

³¹Au e se fiafia foki ki pelofeta kola e folafola ne latou olotou muna eiloa, kae fai pela me ne muna mai i a au.

³²Fakalogo mai ki aku muna! Au e se fiafia ki pelofeta kola e folafola atu ne latou olotou moemiti kola e fonu i te loi. E folafola atu ne latou a moemiti konei kae taki se ne latou oku tino ki olotou loi mo olotou muna fakamatamata. E seki uga ne au latou, seki fakatonu foki ne au ke olo o folafola atu taku fekau. E seai foki eiloa se fesoasoani o latou ki tino o te fenua. Ko au, te Aliki, tena ne faipati atu.”

³³Muna a te Aliki ki a au, “Ielemia, kafai e isi se tino o toku fenua, io me se pelofeta, io me se faitaulaga e fesili atu penei, ‘Se a te fekau a te Aliki?’ E tau o fai koe ki ei penei, ‘A koe se amoga mafa[17] ki te Aliki, tela la, ka toese keatea koe ne ia.’

³⁴Kafai e isi se tino o toku fenua, io me se pelofeta io me se faitaulaga e fakaaoga ne ia a muna penei, ‘Ko te amoga mafa a te Aliki,’ ka fakasala ne au a ia fakatasi mo tena kaiga.

³⁵Kae e tau mo tino o fesili atu ki olotou taugasoa mo olotou kaiga penei, ‘Se a te tali a te Aliki ne fai mai? Ne a muna a te Aliki ne fai mai?’

³⁶Tela la, e se toe tau eiloa o fakaaoga ne latou a muna konei, ‘Ko te amoga mafa a te Aliki,’ me i so se tino e fakaaoga ne ia a muna kona, ko tena uiga ka fai ne au taku fekau ke pela me se amoga mafa ki a ia. A tino o te Atua ko oti ne fakaseaoga ne latou a muna a te lotou Atua, te Atua ola, te Aliki Malosi.

³⁷Ielemia, fesili atu ki pelofeta penei, ‘Se a te tali a te Aliki ne avatu ki a koutou? Ne a muna a te Aliki?’

³⁸Kae kafai e se fakalogo latou ki taku fakatonuga kae fakaaoga eiloa ne latou a muna konei ‘Te amoga mafa a te Aliki,’ fai la ki ei

³⁹me ka puke aka[18] ne au latou o pei keatea ke mao mai i a au, ko latou fakatasi mo te fa'kai tena ne tuku atu ne au ki a latou mo olotou tupuga.

⁴⁰Ka aumai ne au ki a latou a te ma mo te masiasi tela e se toe mafai o fakapuli.”