Read Te Tusi Tapu I Te Gana Tuvalu Lomiga Lua IELEMIA 26 Bible Online

IELEMIA 26 - Te Tusi Tapu I Te Gana Tuvalu Lomiga Lua bible

IELEMIA 26

¹ I te taimi ne fatoa sopo ei a Ieoiakimo te tama tagata a Iosia o fai mo tupu o Iuta,

²ne fai mai ei te Aliki ki a au penei, “Tu i te malae fono o te Faletapu, kae folafola atu a mea katoa kola ne fakatonu atu ne au ke faipati atu ne koe ki tino kola e o'mai mai i fa'kai o Iuta o tapuaki i kona. Sa tiakina eiloa ne koe se mea e tasi i muna ne fai atu ne au.

³E se taumate ka fakalogo a tino kae tiaki olotou uiga masei. Kafai e fakalogo latou, ko tena uiga ka fuli toku mafaufau e uiga ki te fakamaseiga tela ne mafaufau au o aumai ki a latou e tusa mo olotou amioga masei ne fai.”

⁴A te Aliki ne fai mai ki a au ke faipati atu au ki tino penei, “Au, te Aliki, ne fai atu ki a koutou me e tau mo koutou o fakalogo mai ki a au, o tautali ki akoakoga kola ne avatu ne au ki a koutou,

⁵kae saga mai foki ki muna a aku tavini ko pelofeta, kola ne uga sale atu eiloa ne au ki a koutou. E seki fakalogo eiloa koutou ki muna ne faipati atu ne latou.

⁶ Kafai e tumau eiloa te se fakalogo o koutou, ko te mea eiloa ko fai ne au ki te Faletapu tenei a te mea tela ne fai ne au ki Sailo, kae ka fakaaoga foki ne malo katoa o te lalolagi a te igoa o te fa'kai tenei e pela me se muna fakamalaia.”

⁷A faitaulaga, pelofeta, mo tino katoa, ne lagona ne latou te faipatiga ne au o mea kona i te Faletapu,

⁸kae i te otiga o mea katoa kola ne fakatonu mai ne te Aliki ke faipati atu ne au, ko te mea eiloa ko o'mai o puke au kae ka'laga penei, “A koe e tau o tamate ona ko au muna konei ne fai!

⁹Ai a ne faipati ei koe i te igoa o te Aliki o fai pela i te Faletapu tenei ka pela mo Sailo, mo te fa'kai foki tenei ka ofa fakamasei kae ka seai se tino e nofo i ei?” Tena, ko tino eiloa ko mumu mai i oku feitu.

¹⁰I te logoga o takitaki o Iuta i te mea ne tupu, ne o'mai fakavave latou mai i te palesi ki te Faletapu o nofo i olotou nofoaga i te Mataloa Fou.

¹¹Tena, kae faipati aka mo faitaulaga mo pelofeta ki takitaki mo tino o te fenua penei, “A te tagata tenei e tau o fakasala ki te mate, me ne faipati fakamasei ne ia te tou fa'kai. Ne lagona eiloa ne koutou ki otou taliga a muna a ia ne fai.”

¹²Tena, kae fai atu ei au penei, “Au ne uga mai ne te Aliki ke folafola atu ne au a mea katoa kona ne lagona ne koutou, e uiga ki te Faletapu mo te fa'kai tenei.

¹³E tau mo koutou o fuli otou olaga mo otou mea e fai, kae fakalogo atu ki te Aliki te otou Atua. Kafai e fakalogo koutou, kae ka fuli ona mafaufauga e uiga ki te fakamaseiga tela ne fai mai me e fakaoko mai ne ia ki luga i a koutou.

¹⁴Ka ko au, au ko i lalo i te otou pulega! O'mai la o fai ki a au a te mea e fakatau ifo koutou e lei kae tonu.

¹⁵Kae ke manatua ne koutou te mea tenei: kafai e tamate ne koutou a au, ka agasala koutou mo tino katoa o te fa'kai tenei, me ne tamate ne koutou te tagata e seai sena mea se ne fai, me ko te Aliki eiloa ne uga mai ne ia a au ke folafola atu a mea kona.”

¹⁶Tena ne fai atu ei a takitaki mo tino o te fenua ki faitaulaga mo pelofeta penei, “A te tagata tenei ne faipati mai ki a tatou i te igoa o te Aliki te tou Atua; e se tau a ia o tamate.”

¹⁷I te otiga o mea kona, ne tu ake a nisi toeaina o te fenua kae fai atu ki tino kona ne maopoopo i kona penei,

¹⁸ “I te taimi ne fai ei a Hesekia mo tupu o Iuta, a te pelofeta ko Mika o Moleseta ne faipati atu ki tino katoa i te Aliki Malosi ne faipati penei, ‘A Siona ka fakamalū pela me se fatoaga, Ielusalema ka pela me se faka'tuga o mea ne fakamasei, ka ko te mauga tela e tu i ei te Faletapu ka liu vao.’

¹⁹Ne seki tamate a Mika ne te Tupu ko Hesekia mo tino o Iuta. Ne mataku eiloa Hesekia i te Aliki, tena ne taumafai eiloa a ia ke fiafia atu te Aliki ki a ia. Tena la, ne fuli eiloa mafaufauga o te Aliki e uiga ki te mala tela ne fai o fakaoko mai ne ia ki a latou. Nei, ko se mao eiloa kae oko mai te mala ki a tatou, ne fai foki eiloa ne tatou.”

²⁰(E isi aka foki se tagata fakaatea e igoa ki a Ulia, te tama tagata a Semaia, mai i Kiliata Iealima, tela ne faipati foki i te igoa o te Aliki o teke atu ki te fa'kai tenei, mo te malo tenei e pela mo te mea a Ielemia ne fai.

²¹I te logoga a te Tupu ko Ieoiakimo, mo ana sotia mo ana ofisa i muna a Ulia ne fai, ne taumafai ei a ia ke tamate a Ulia. Ne logo Ulia i te mea tena, sola ei ki Aikupito ona ko te mataku.

²²Ne uga ne te Tupu ko Ieoiakimo a Elenatano te tama tagata a Akapola, mo nisi tagata, ke puke mai a Ulia mai i Aikupito.

²³Ne puke mai ne latou a Ulia o avatu ki te Tupu ko Ieoiakimo, tamate ei ne te tupu, kae pei atu tena foitino ki te laukele tela e tanu sale ei a tino mate.)

²⁴Kae ona ko Aikamo te tama tagata a Safana e kau mai ki a au, tela la, e seki tuku atu ei au ke tamate ne tino o te fenua.