Read Te Tusi Tapu I Te Gana Tuvalu Lomiga Lua IELEMIA 28 Bible Online

IELEMIA 28 - Te Tusi Tapu I Te Gana Tuvalu Lomiga Lua bible

IELEMIA 28

¹I te tausaga foki eiloa tena,[22] te lima o masina i te fa o tausaga o te nofoaiga a te Tupu ko Setekaia, ne faipati mai ei ki a au i te Faletapu, a Hanania te tama tagata a Asula, kae se pelofeta mai i te fa'kai o Kipeona. Ne faipati mai a ia ki a au i mua o faitaulaga mo tino o te fenua,

²i te Aliki Malosi, te Atua o Isalaelu ne faipati penei: “Ko oti ne ofa ne au a te malosi o te tupu o Papelonia.

³Ka fakafoki mai ne au ki te koga tenei, a koloa katoa o te Faletapu kola ne ave ne te Tupu ko Nepukanesa ki Papelonia, kae koi tuai o kātoa te lua tausaga.

⁴Ka fakafoki mai foki ne au a te tupu o Iuta ko Ieoiakini, te tama tagata a Ieoiakimo, fakatasi mo tino Iuta katoa kola ne ave i te tafeaga ki Papelonia. Ao, ka ofa eiloa ne au a te malosi o te tupu o Papelonia. Ko au, te Aliki, tena ne faipati atu.”

⁵Oti aka, faipati atu ei au ki a Hanania i mua o faitaulaga mo tino katoa kola e tu mai i te Faletapu. Aku muna penei:

⁶“Ko oko eiloa i te lei! Fakamoemoe atu ke fai ne te Aliki te mea tena! A toku fakamoemoega ke fakataunu ne te Aliki tau valoaga, ke fakafoki mai ne ia mai i Papelonia a koloa katoa o te Faletapu, mo tino katoa kola ne ave fakapagota.

⁷Kae fakalogo mai la ki aku muna konei ki a koe mo tino o te fenua.

⁸A pelofeta kola ne faipati i aso mua, i mua atu o tatou, ne valo ne latou a te taua, te mate fiakai, mo te famai, me e oko mai ki fenua e uke mo malo malosi.

⁹Ka ko te pelofeta tela e valo ne ia te filemu, e mafai fua o iloa me se pelofeta ne uga mai ne te Aliki, manafai e taunu ana valoaga.”

¹⁰Tena, ne tapale aka ne Hanania a te amo mai i toku ua, fatifati ne ia,

¹¹kae faipati aka i mua o tino katoa penei, “A te Aliki ne fai mai me e fatifati penei ne ia a te amo tela ne tuku ne te Tupu ko Nepukanesa ki ua o malo katoa. E fai ne ia a te mea tena i loto i se lua tausaga.” Oti aka, ko au eiloa ko fano.

¹²I se taimi fakamuli ifo, ne fai mai te Aliki ki a au

¹³ke fano au o fai atu ki a Hanania penei: “A te Aliki ne fai mai me e tonu e mafai o 'fati ne koe te amo lakau,[23] kae ka sui ne ia ki se amo fiti.

¹⁴A te Aliki Malosi, te Atua o Isalaelu, ne fai mai me ka tuku atu ne ia se amo fiti ki luga i malo katoa konei, kae ka tavini atu latou ki te Tupu o Papelonia ko Nepukanesa. A te Aliki ne fai mai me e fai foki ne ia a manu vao ke tavini atu ki a Nepukanesa.”

¹⁵Ne toe faipati atu foki au ki a Hanania penei, “Hanania, fakalogo mai! A koe e seki uga mai ne te Aliki, a koe e taumafai o fai a tino konei ke talitonu ki te mea loi.

¹⁶Tela la, a te Aliki ne fai mai me ka ave keatea ne ia a koe. Koi tuai o oti atu te tausaga tenei, kae ka mate koe, i a koe ne fai ki tino konei ke 'teke atu ki te Aliki.”

¹⁷Tena ne mate ei Hanania i te fitu o masina i te tausaga tena.