Read Te Tusi Tapu I Te Gana Tuvalu Lomiga Lua IELEMIA 29 Bible Online

IELEMIA 29 - Te Tusi Tapu I Te Gana Tuvalu Lomiga Lua bible

IELEMIA 29

¹ Ne tusi taku tusi ki faitaulaga, pelofeta, takitaki o te fenua, pela foki ki tino katoa kola ne ave fakapagota ne Nepukanesa mai i Ielusalema ki Papelonia.

²Ne tusi taku tusi tena, ka ko oti ei ne ave fakapagota a te Tupu ko Ieoiakini, pela foki mo tena matua, ofisa o te palesi, takitaki o Iuta mo Ielusalema, tino apo i galuega, mo tino masani i galuega kesekese.

³Ne tuku atu ne au taku tusi ki a Elasa te tama tagata a Safana, mo Kemalia te tama tagata a Hilikia, kola ne uga ne te Tupu o Iuta ko Setekaia ki a Nepukanesa, te tupu o Papelonia. E penei a muna i te tusi:

⁴“A te Aliki Malosi, te Atua o Isalaelu, ne fai mai penei ki tino katoa kola ne talia ne ia ke ave fakapagota ne Nepukanesa mai i Ielusalema ki Papelonia:

⁵‘Faite otou fale o nofo tumau i ei. Toki otou fatoaga kae kai ki fuataga o lakau kona ne toki ne koutou i ei.

⁶Fai otou avaga kae fanafanau. Fakaavaga foki otou fanau, ko te mea ke fai foki ne olotou fanau. E tau mo koutou o fakatokouke malosi, kae ke se fakamutana.

⁷Galue mo te lei o fa'kai kona ne ave fakapagota ne au koutou ki ei. Talo mai ki a au mo latou, me kafai e maumea latou kae maumea foki koutou.

⁸Au, te Aliki, te Atua o Isalaelu ko fai atu ki a koutou ke mo a e fakaloiloigina koutou ne pelofeta kona e nofo tasi koutou, io me ko nisi tino kola e fai mai me e mafai o folafola ne latou a mea ka tupu i aso fakamuli. Sa saga eiloa ki olotou[24] moemiti.

⁹E fakaloiloi fua ne latou a koutou i toku igoa. E seki uga lele eiloa ne au latou. Ko au, te Aliki, tena ne faipati atu.’

¹⁰ “Muna a te Aliki, ‘Kafai ko katoa te fitusefulu tausaga o Papelonia, ko fakaasi atu ei ne au toku saga atu ki a koutou, kae fakataunu taku tautoga ke fakafoki koutou ki te otou fenua.

¹¹Ko au tokotasi e iloa ne au aku fuafuaga mo koutou, ko fuafuaga kola e aumai ei te manuia kae se ko te puapuaga, ko fuafuaga e aumai ei te lei tela e fakamoemoe koutou ki ei mo aso fakamuli.[25]

¹²Tena la, ka kalaga mai foki ei koutou ki a au. Ka o'mai koutou o talo mai ki a au, kae ka tali atu au ki otou talosaga.

¹³Ka sala mai koutou ki a au, kae ka maua eiloa ne koutou a au, me i a koutou ka sala mai ki a au mo otou loto katoa.

¹⁴Ao, au e fai atu penei me ka maua eiloa ne koutou a au, kae ka toe fakafoki ne au koutou ki te otou fenua. Ka fakamaopoopo mai ne au koutou mai i fenua katoa mo koga katoa kola ne fakasalalau ne au ki ei koutou, kae ka toe fakafoki mai ne au koutou ki te fenua tenei ne avatu i ei ne au koutou o ave ki te tafeaga. Ko au, te Aliki, tena ne faipati atu.’

¹⁵“A koutou e fai mai i te Aliki ne avatu ne ia ne pelofeta ki a koutou i Papelonia.

¹⁶Fakalogo mai ki muna a te Aliki e uiga ki te tupu tela e pule ne ia a te malo tela ne pule ne Tavita, e uiga foki ki tino o te fa'kai tenei, ko kaiga kona o koutou kola e seki ave fakapagota fakatasi mo koutou.

¹⁷Muna a te Aliki Malosi, ‘Ka aumai ne au te taua, te mate fiakai, mo te famai ki a latou, kae ka fai ne au latou ke pela me ne mati kola ko to 'pala ko se lei i te kai.

¹⁸Ka fakaoko atu ne au ki a latou a te taua, te mate fiakai, mo te famai, ka ko malo o te lalolagi ka poi i te mataku i te mea e lavea ne latou. I koga katoa e fakasalalau ei ne au ki ei latou, a tino i koga kona ka poi kae mataku i te mea ne tupu ki a latou. Ka fakalili latou ne tino kae fakaaoga te lotou igoa e fai mo muna fakamalaia.

¹⁹Ka tupu te mea tena ki a latou me e seki fakalogo ki te fekau tela ne avatu soko ne au ki a latou e auala i aku tavini ko pelofeta. Ne ita eiloa ma fakalogo.

²⁰A koutou katoa kona ne ave fakapagota ne au ki Papelonia, fakalogo mai ki muna a te Aliki konei ne fai atu.’

²¹“A te Aliki Malosi, te Atua o Isalaelu, ko oti ne faipati e uiga mo Aapo te tama tagata a Kolaia, mo Setekaia te tama tagata a Maseia, ko laua kona e faipati ki muna loi i tena igoa. Muna a te Aliki me ka tuku atu ne ia a laua kona ki te pule a Nepukanesa, te tupu o Papelonia, tela ka tamate ne ia a te tokolua kona i otou mua.

²²A tino kola ne ave fakapagota mai i Ielusalema ki Papelonia — kafai e fia fakamalaia ne latou se tino, ka fai aka latou penei, ‘Ke fai koe ne te Aliki e pela mo Setekaia mo Aapo kola ne sunu ola ne te Aliki’

²³Tena te ikuga o laua me ne 'se i a la agasala — ne agasala i te mulilua kae faipati loi i te igoa o te Aliki. A te mea tena e se fetaui mo te loto o te Aliki; e iloa ne ia te mea ne fai ne laua, e molimau a ia e uiga ki mea masei ne fai ne laua.[26] Ko te Aliki tena ne faipati atu.”

²⁴A te Aliki Malosi, te Atua o Isalaelu, ne tuku mai ne ia ki a au a te fekau e uiga mo Semaia mai Nelama, tela e isi sena tusi ne ave i tena igoa eiloa ki tino Ielusalema katoa, pela foki ki te faitaulaga ko Sefanaia te tama tagata a Maseia, mo faitaulaga katoa foki. Konei a muna o te tusi a Semaia ki a Sefanaia:

²⁶“A te Aliki ne fai ne ia koe mo faitaulaga o sui a Ieoiata, kae nei a koe ko fai mo ofisa pule[27] i te Faletapu. Ko te tiute o koe o onoono fakalei ki tino fakavalevale kola e fai pela i a latou ne pelofeta, ke ave ne koe o saisai ki seni mo kola fiti i olotou ua.

²⁷Ai a seki fai ei ne koe a te mea tena ki a Ielemia o Anatota, tela ne faipati sale ki tino e pela me se pelofeta?

²⁸E tau a Ielemia o taofi ke mo a e toe faipati, me ne fai atu ki tino i Papelonia me e leva eiloa te taimi e fai ei latou mo pagota i kona, tela la, ke faite olotou fale o nofo tumau, toki olotou fatoaga, kae kai a mea ne toki ne latou.”

²⁹Ne faitau mai ne Sefanaia a te tusi tena ki a au,

³⁰kae ne fai mai te Aliki ki a au

³¹ke avatu ki pagota katoa i Papelonia a te fekau tenei e uiga ki a Semaia: “Au, te Aliki, ka fakasala ne au a Semaia mo tena gafa katoa. E seki uga atu ne au a ia, kae ne faipati atu ki a koutou e pela eiloa a ia me se pelofeta, kae ne fakaloiloi eiloa ne ia koutou. Ka seai ne tino o tena gafa e nofo tasi mo koutou. Ka se lavea ne ia a mea lei kola ka fai ne au mo oku tino, ona ko ia ne fai ki a latou ke teke mai ki a au. Ko au, te Aliki, tena ne faipati atu.”