Read Te Tusi Tapu I Te Gana Tuvalu Lomiga Lua IELEMIA 3 Bible Online

IELEMIA 3 - Te Tusi Tapu I Te Gana Tuvalu Lomiga Lua bible

IELEMIA 3

¹Muna a te Aliki, “Kafai se tagata ko mavae mo tena avaga, kae ko fano tena avaga o toe avaga mo se tagata fakaatea, ko se toe mafai ne te tagata tena o toe puke mai te fafine tena. A te amioga tena e fakalailai ei toku fenua. Ka ko koe Isalaelu, e tokouke ou fiafaiga, kae nei, ko fia foki mai koe ki a au!

²Kilo ki taulu o mauga foliki, e isi se koga e seki fai ei au tapuakiga ki nisi atua? A koe e fakatalitali ki ou fiafaiga i tafa o te auala, e pela me se Alapi tela e fakatalitali i te toafa ki se tino ke ta ne ia. Ko fakalailai ne koe a te fenua i au tapuakiga ki nisi atua.

³Tena te pogai ko seai ei ne vaiua, pela foki vaiua i te tau o te muakiga. A koe ko foliga mai eiloa pelā me se fafine tali tagata, ko seai eiloa se ma i a koe.

⁴“Kae nei, ko fai mai koe ki a au penei, ‘A koe ko toku tamana, kae ne alofa mai eiloa koe ki a au talu mai taku folikiga.

⁵E se ita soko mai koe ki a au; e se tumau tou kaitaua mai ki a au ki te se gata mai.’ Isalaelu, kona au pati e fai, ka ko koe, ne fai eiloa ne koe a amioga ma'sei katoa e mafai ne koe o fai.”

⁶ I te taimi ne tupu ei a Iosia, ne fai mai te Aliki ki a au penei, “E lavea ne koe te mea ne fai ne te fafine 'se fakamaoni tela ko Isalaelu? Ko oti ne fulitua mai ki a au, kae fai ana amioga pela me se fafine mulilua i luga i mauga foliki katoa, pela foki i lalo o malūga o lakau lauusiusi katoa.

⁷Au ne mafaufau pe'la, kafai ko oti ne fai ne ia a mea katoa kona, ko te mea eiloa ko foki mai ki a au. Kae tela la, e seki foki mai ki a au, e lavea foki eiloa ne tena taina se fakamaoni ko Iuta, a mea katoa kona.

⁸Ne lavea foki ne Iuta me ne tiakina ne au a Isalaelu kae uga ke fano keatea, me ne fulitua mai ki a au o tapuaki atu ki nisi atua fakaatea. Ka ko Iuta, te taina se fakamaoni o Isalaelu, e se mataku. A Iuta ne tapuaki atu foki ki atua fakaatea

⁹kae se ma lele eiloa. Ne fakalailai ne ia a te fenua, kae taia i te agasala ko te tapuaki atu ki fatu mo lakau.

¹⁰I te otiga o mea katoa konei, a Iuta, te taina se fakamaoni o Isalaelu, ne 'fuli fakaloiloi mai fua ki a au; e se ko tena loto kātoa tena. Ko au, te Aliki, tena ne faipati atu.”

¹¹A te Aliki ne fai mai ki a au, me e ui eiloa a Isalaelu ne fulitua ki a Ia, kae e tai feoloolo atu i a Iuta te fenua se fakamaoni.

¹²Ne fai mai te Aliki ki a au ke fano au o fai ki a Isalaelu penei, “Isalaelu, te fenua se fakamaoni, foki mai ki a au. Au e loto alofa, kae ko se kaitaua foki au; ka se tumau toku ita ki a koe ki te se gata mai.

¹³Fakaasi mai i a koe e 'se, kae ne 'teke foki koe ki te Aliki tou Atua. Fakaasi mai i a koe ne tapuaki atu ki atua fakaatea i lalo o lakau lauusiusi katoa, kae e seki tausi foki ne koe aku fakatonuga. Ko au, te Aliki, tena ne faipati atu.

¹⁴“Te fenua se fakamaoni, foki mai; a koe ko toku fenua. Ka puke mai ne au e taki tokotasi mai i fa'kai takitasi, kae taki tokolua mai i kaukaiga takitasi, o toe fakafoki mai ki te Mauga o Siona.

¹⁵Ka avatu ne au ne tino pule kola e faka'logo mai ki a au, kae ka pule ne latou a koutou i te poto mo te malamalama.

¹⁶Tena la, kafai ko tokouke koutou i te fenua tena, ko se toe fai'pati ei a tino e uiga ki taku Pusa o te Feagaiga. Ka se toe mafau'fau latou ki ei, se toe manatua foki ne latou; e se toe ma'nako latou ki ei, e se toe faite foki ne latou se Pusa o te Feagaiga fakaatea.

¹⁷Kafai ko oko mai a te taimi tena, a Ielusalema ka fakaigoa ko ‘Te Nofogaaliki o te Aliki,’ ka ko malo katoa ka maopoopo i kona o tapuaki mai ki a au. Ka se toe fai ne latou a amioga ma'sei kola e mafua mai i olotou loto 'se 'lei.

¹⁸A Isalaelu ka fakatasi mo Iuta, kae ka foki tasi mai i te fenua i matu tela ne ave fakapagota ki ei latou, ki te fenua tela ne tuku ne au ki otou tupuga ke fai mo tofi tumau o latou.”

¹⁹Muna a te Aliki, “Isalaelu, au e manako ke talia ne au a koe ke fai Pela me se tama tagata a aku kae ke avatu Ki a koe se fenua gali, ko te toe fenua gali eiloa i te lalolagi katoa. Au e manako ke taku ne koe au ko tou tamana, Kae ke se toe fulitua mai koe ki a au.

²⁰Ka ko koe ne seki fakamaoni mai ki a au, E pela eiloa me se avaga se fakamaoni. Ko au, te Aliki, tena ne faipati atu.”

²¹E isi se leo e lagona atu i taulu o mauga foliki: Ko te leo o tino Isalaelu e tagi kae fakamolemole Ona ko latou ne ola i se olaga fai agasala Kae puli foki i a latou a te Aliki te lotou Atua.

²²Koutou katoa kola ne fulitua ki te Aliki, Foki mai nei ki a ia, Ka faka'lei ne Ia koutou kae toe fai ne Ia koutou Ke loto fakamaoni. E fai mai otou muna penei, “Ao, a matou ka o'mai ki te Aliki, me i a Ia ko te motou Atua.

²³E seai eiloa se fesoasoani ne maua ne matou i omotou tapuakiga fapaupau i ulu o mauga foliki. A te fesoasoani mo Isalaelu e vau fua mai i te Aliki te motou Atua.

²⁴A te tapuaki o matou ki a Paala, te atua fakamasiasi tino, ko ala ei o 'galo omotou lafu mamoe mo lafu pulumakau, omotou tama fafine mo tama tagata — ke oko eiloa ki mea katoa kola ne fi'ta ki ei omotou tupuga i aso mua.

²⁵Ko 'tau matou o ta'kato ki lalo mo te masiasi, kae ke ufi matou ne te motou masiasi. A matou mo omotou tupuga ne agasala faeloa ki te Aliki te motou Atua; e seki tausi eiloa ne matou ana fakatonuga.”