Read Te Tusi Tapu I Te Gana Tuvalu Lomiga Lua IELEMIA 31 Bible Online

IELEMIA 31 - Te Tusi Tapu I Te Gana Tuvalu Lomiga Lua bible

IELEMIA 31

¹Muna a te Aliki, “Ka oko mai te taimi e fai ei au mo Atua o matakaiga katoa o Isalaelu, ka ko latou ka fai mo oku tino.

²I te vao, ne fakaasi toku alofa ki a latou katoa kola ne sao mai i te mate. I te taimi ne manako ei tino Isalaelu ki se manavaga filemu,

³ne fakasae atu eiloa au ki a latou [28] mai i se koga mao eiloa. Tino Isalaelu, au e alofa faeloa ki a koutou, tela la, e tumau faeloa o fakaasi sale atu ne au a toku alofa tumau ki a koutou.

⁴Ka toe atiake nei ne au koutou. Ka toe puke aka ne koutou otou samupelini kae saka mo te fiafia.

⁵Ka toe toki otou togavine i mauga o Samalia, kae ka kai eiloa ne koutou a fua o togavine a koutou ne toki.

⁶E tonu, ka oko mai te taimi e kalaga ei a tino leoleo mai i mauga o Efalaima penei, ‘Tatou ka olo ki Siona, ki te Aliki te tou Atua.”’

⁷Muna a te Aliki, “Usu pese mo te fiafia ona ko Isalaelu, Te malo tafasili i malo katoa. Usu otou pese o tavaega, ‘Ko oti ne fakasao ne te Aliki a tino o tena fenua; [29] tino; Ko oti ne fakasao ne ia a tino katoa kola e toe.’

⁸Ka aumai ne au latou mai i matū, Kae luku mai latou mai i feitu e fa o te lalolagi. A tino kivi mo tino vae masei ka o'mai fakatasi mo latou, Pena foki a fafine faitama mo fafine kola ko pili o fanau. Ka foki mai latou o fai mo malo takutakua.

⁹A toku fenua ka foki mai kae tagi, Kae talo faeloa i te taimi e takitaki mai ei ne au latou. Ka 'taki ne au latou ki vaitafe, I luga i auala maniania ke mo a e 'siga. Au e pela me se tamana ki tino Isalaelu, Ka ko Efalaima ko taku toekimua tagata.”

¹⁰Muna a te Aliki, “Malo, fakalogo mai ki a au, Kae folafola atu aku muna ki fenua mao. Ne fakasalalau ne au oku tino, kae ka toe luku mai ne au latou Kae tausi fakalei latou, e pela mo te leoleo mamoe tela e tausi fakalei ana mamoe.

¹¹Ko oti ne fakasaoloto ne au a tino Isalaelu Kae fakasao latou mai i te malo malosi.

¹²Ka o'mai latou o usu pese mo te fiafia i luga i te Mauga o Siona, Kae ka fiafia i aku meaalofa Ko meaalofa saito mo uaina mo sinu olive, Ko meaalofa mamoe mo pulumakau. Ka pela latou me se fatoaga tela e fakasusu fakalei; Ka maua ne latou a mea katoa e manako latou ki ei.

¹³Tena la, a fafine ka saka kae fiafia, Mo tamataene mo tagata matua ka fiafia foki. Ka fakamafanafana ne au latou kae fuli te lotou tagi fanoanoa ki te fiafia, Te lotou fanoanoa ki te fiafia.

¹⁴Ka tuku atu ne au a meakai gali ki faitaulaga Kae faka'malie a tino o toku fenua i mea e manako latou ki ei. Ko au, te Aliki, tena ne faipati atu.”

¹⁵ Muna a te Aliki, “E isi se leo e lagona atu i Lama, Se leo o te tagi mafatia. A Lasela ko tagi ona ko ana tamaliki; Ko galo atu latou, Kae e se talia ne ia ke fakamafanafana a ia ne se tino.

¹⁶Fakagata tau tagi, Kae solo ou loimata. A mea katoa ne fai ne koe mo au tamaliki E se mafai o fakapuli, kae e maua eiloa Ne koe se taui lei i au faiga mo latou; Ka foki mai eiloa latou mai i te fenua o olotou fili.

¹⁷E isi se fakamoemoega lei mo koutou fakamuli; A otou tamaliki ka toe foki mai ki te lotou fenua. Ko au, te Aliki, tena ne faipati atu.

¹⁸“E lagona ne au a muna a tino Isalaelu e fai mo olotou loto fanoanoa penei, ‘Te Aliki, a matou e pela me ne manu lata vao, Kae ne akoako ne koe matou ke fakalogo. Fakafoki atu matou; te Aliki te motou Atua, A matou ko toka o foki atu ki a koe.

¹⁹A matou ne fulitua atu ki a koe, Kae se leva, ko fia foki atu foki matou. I te otiga ne fakasala ne koe matou, Ne punou ifo omotou ulu i te fanoanoa. A matou ko ma kae fakamasiasigina, Ona ko matou ne agasala i te taimi koi foliki ei matou.’

²⁰“Isalaelu, a koe ko taku tama fagasele, Ko te tamaliki e alofa malosi au ki ei. I so se taimi e taku ei ne au tou igoa, Kae mafaufau au[30] mo te alofa ki a koe. A toku loto ko oti atu eiloa ki a koe; Ka alofa atu eiloa au ki a koe.

²¹Fakatu aka ne fakailoga kae fakamailoga te auala; Toe sala aka te auala ne fano ei koe. Foki mai, tino Isalaelu, Foki mai ki fa'kai ne tiakina ne koutou.

²²E fakatalave koutou ke afea, koutou tino se fakatuanaki? Ko oti ne faite ne au se mea fou kae kese, E pela eiloa i te kese mo te fafine tela e puipui ne ia a te tagata.”

²³A te Aliki Malosi, te Atua o Isalaelu, ne fai mai penei,“Kafai ko fakafoki ne au a tino Isalaelu ki te lotou fenua, kae ka toe fai aka olotou muna penei, i te fenua o Iuta mo ona fa'kai, A te Aliki ke fakamanuia atu ki te mauga tapu o Ielusalema,[31] Te koga tapu tela e nofo ei a ia.’

²⁴A tino ka nofo i Iuta mo fa'kai katoa i ei, kae ka toe isi ne tino fai fatoaga, mo leoleo mamoe mo olotou lafu mamoe.

²⁵Ka toe avatu ne au te malosi fou ki tino vaivai, kae fagai a tino katoa kola ko vaivai i te fiakai.

²⁶Tena la, ka fai aka a muna a tino penei, ‘Au ne moe kae ala aka ko malosi faka eiloa toku foitino.’

²⁷“Au, te Aliki, ko fai atu me ka oko mai te taimi e fakafonu ei ne au te fenua o Isalaelu mo Iuta i tino mo manu.

²⁸E pela eiloa mo taku taumafaiga o unu keatea latou, o ta ki lalo, o fakatakavale, o ta fakamasei kae ta fakapalele, ka pena foki toku taumafai o toki kae toe atiake latou.

²⁹ Kafai e oko mai te taimi tena, ka se toe faipati a tino penei, ‘Ne kai ne matua a vine 'kona, Kae kavasia i ei tamaliki.’

³⁰Kae nei, so se tino e kai ne ia a vine 'kona, ka kavasia eiloa a ia i ei; a tino ka mate ona eiloa ko olotou agasala.”

³¹ Muna a te Aliki, “Ka oko mai te taimi e fai ei ne au se feagaiga fou mo tino Isalaelu mo tino Iuta.

³²Ka se pau mo te feagaiga mua tela ne fai ne au mo olotou tupuga i te taimi ne taki mai ei ne au latou mai i Aikupito. E ui eiloa au ne pela eiloa me se tagata ka ko latou ko taku avaga, kae e seki tausi eiloa ne latou te feagaiga tena.

³³ A te feagaiga fou tenei ka fai ne au mo tino Isalaelu, e penei: Ka tuku atu ne au taku tulafono ki a latou kae tusi ne au i olotou loto. Ka fai au mo Atua o latou, ka ko latou ka fai mo oku tino.

³⁴ E seai se tino e fano o akoako te sua tino ke iloa ne ia te Aliki, me ka iloa eiloa ne tino katoa a au, mai i te tino malalo eiloa ke oko eiloa ki te toe tino maluga eiloa. Ka fakamagalo ne au olotou agasala, kae se toe manatua olotou mea se ne fai. Ko au, te Aliki, tena ne faipati atu.”

³⁵Ne fai ne te Aliki a te la ke fakamaina ei te ao, Mo te masina mo fetu ke fakamaina i te po. E fakagasue ne ia te tai kae fai ke gulu; A tena igoa ko te Aliki Malosi.

³⁶Ne tauto mai a ia i te malo o Isalaelu e tumau eiloa e pela mo te lalolagi.

³⁷Kafai e mafai o fua a te lasi o te lagi, Kae oko foki a tino ki fakavae o te lalolagi, Kaati tena foki te taimi ka teke ei ne ia Isalaelu Ona ko mea ne fai ne latou. Ko te Aliki tena ne faipati atu.

³⁸Muna a te Aliki, “Ko pili mai te taimi e toe faite ei a toku fa'kai ko Ielusalema, e kamata mai i te Taoa o Hananelu o fano ki te togala ki te Mataloa o Matulimanu.

³⁹A te tuakoi ka fanatu mai i te togala ki te mauga foliki o Kalepo, ko takapili ei i tua o fano ki Koa.

⁴⁰A te vanu kātoa, tela e tanu ei a tino mate kae pei foki ki ei a kaiga, mo koga ateatea mai i luga o te vai o Kitilona, ke oko eiloa ki te Mataloa o Solofanua i te saegala, ka fai mo koga tapu te koga tena. A te fa'kai ka se toe ofa io me fakamasei.”