Read Te Tusi Tapu I Te Gana Tuvalu Lomiga Lua IELEMIA 33 Bible Online

IELEMIA 33 - Te Tusi Tapu I Te Gana Tuvalu Lomiga Lua bible

IELEMIA 33

¹I te taimi koi falepuipui ei au i te malae fono o te palesi, kae ne oko mai a te fekau a te Aliki ki a au.

²A te Aliki tela ne faite ne ia a te lalolagi kae fakatulaga fakalei ne ia, ne faipati mai ki a au. A ia tela e igoa ki te Aliki ne fai mai penei,

³“Kalaga mai ki a au, kae ka tali atu au; ka taku atu ne au a mea gali kae fakaofoofogia kola e seki iloa lele eiloa ne koe.

⁴Au, te Aliki, te Atua o Isalaelu, ko fai atu i fale o Ielusalema mo palesi o Iuta ka ofa ki lalo. E seai se aoga e olo atu ei koutou ki tua mo te fa'kai o taua ki olo a te kau Papelonia ne faka'tu i tua o te fa'kai. Ka fonu fua ei te fa'kai i foitino mate o tino kola ka tamate ne au i toku kaitaua. Au ko oti ne fulitua ki te fa'kai tenei, ona ko amioga masei ne fai ne tino i ei.

⁶Kae fakamuli, ka toe fakalei ne au a te fa'kai tenei mo tino i ei, o toe fakafoki mai te malosi ki a latou. Ka aumai ne au ki a latou te filemu mo te saogalemu.

⁷Ka fai ne au a Iuta mo Isalaelu ke maumea, kae ka toe atiake ne au ke pela eiloa mo aso mua.

⁸Ka faka'ma ne au a tino i ei mai i agasala a latou ne fai mai ki a au, kae ka fakamagalo ne au olotou agasala mo olotou uiga 'teke.

⁹A Ielusalema ka fai mo koga o te fiafia, te fakaaloalogina, kae fakamatamata ki a au; ka ko malo katoa i te lalolagi ka ma'taku kae polepole manafai e logo i mea lei ka fai ne au mo tino Ielusalema, mo te maumea foki tela ka aumai ne au ki te fa'kai tena.”

¹⁰Muna a te Aliki, “A tino e fai olotou pati i te koga tenei e pela me se toafa, seai ne tino io me ne manu e nofo i ei. E tonu eiloa olotou muna; a fa'kai o Iuta mo auala o Ielusalema ko lavaki; seai ne tino io me ne manu e nofo i kona. Kae ka toe lagona ne koutou i koga kona,

¹¹ a leo o te 'lifu mo te fiafia, mo te leo fiafia i 'kaiga o fakaipoipoga. Ka lagona ne koutou a tino e usu pese i te taimi e aumai ei olotou taulaga fakafetai ki toku Faletapu; ka fai aka olotou muna penei, ‘Tuku atu te fakafetai ki te Aliki Malosi, Me i a ia e agalei Kae tumau foki tena alofa.’ Ka toe fai ne au a te fenua tenei ke maumea e pela eiloa mo aso mua. Ko au, te Aliki, tena ne faipati atu.”

¹²Muna a te Aliki Malosi, “I te fenua tenei, tela ko pela me se toafa kae ko seai ne tino io me ne manu e nofo i ei, ka toe isi ne malae mouku kola e mafai o olo ki ei a leoleo mamoe o ave ki ei olotou mamoe.

¹³I fa'kai i fenua maugā, i tafito mauga, pela foki i Iuta ki saute, i te kogā fenua o Peniamina, i fa'kai i tafatafa o Ielusalema, mo fa'kai o Iuta, i koga kona ka toe mafai ei ne leoleo mamoe o fagai kae lau olotou mamoe. Ko au, te Aliki, tena ne faipati atu.”

¹⁴ Muna a te Aliki, “E oko mai te taimi e fakataunu ei ne au taku tautoga tela ne fai ki tino Isalaelu mo Iuta.

¹⁵I te taimi tena, ka fili ne au se tino amiotonu i te gafa o Tavita ke fai mo tupu. A te tupu tena ka fai ne ia a te mea tonu mo te fakamasinoga tonu i te fenua kātoa.

¹⁶A tino Iuta mo Ielusalema ka fakasao kae ka nofo i te olaga saogalemu. A te fa'kai ka fakaigoa ko ‘Te Aliki te Tou Fakaolataga.’

¹⁷ Au, te Aliki, e tauto atu me ka isi faeloa se tino i te gafa o Tavita e fai mo tupu o Isalaelu,

¹⁸ kae ka isi faeloa ne faitaulaga mai i te matakaiga o Levi ke tavini mai ki a au kae ofo mai ne latou a taulaga 'sunu, taulaga saito, mo taulaga manu.”

¹⁹Muna a te Aliki ki a au,

²⁰“Ko oti ne fai ne au taku feagaiga mo te ao mo te po, ko te mea ke 'mai faeloa i o la taimi tonu; a te feagaiga tena e se mafai o ofa.

²¹E pena foki te feagaiga ko oti ne fai ne au mo taku tavini ko Tavita, me ka isi faeloa se tino i tena gafa e fai mo tupu. Ne fai foki taku feagaiga mo faitaulaga mai i te matakaiga o Levi me ka tavini mai faeloa latou ki a au. A feagaiga kona e se mafai o ofa.

²²Ka fakatokouke ne au a te aofaki o tino i te gafa o taku tavini ko Tavita, mo te aofaki o faitaulaga i te matakaiga o Levi, ko te mea ke se mafai o lau i te uke, e pela eiloa mo fetu i te lagi io me ko one o te tafatai kola e se mafai o lau i te uke.”

²³Muna a te Aliki ki a au,

²⁴“E lagona ne koe a muna a tino kola e fai pela me ko oti ne tiakina ne au a te avā kaiga kola ne filifili ne au, ko Isalaelu mo Iuta? Tena la, ne kilo latou mo te takalialia ki tino o toku fenua kae ko se taku ne latou me se malo.

²⁵Ka ko au, te Aliki, e isi saku feagaiga ne fai mo te ao mo te po, kae ne fai foki ne au a tulafono kola e fakatulaga tonu ei te lagi mo te lalolagi.

²⁶Kae e pela eiloa mo te mautinoa tonu me ne fai ne au a te mea tena, e mautinoa foki me ka tausi eiloa ne au taku feagaiga mo te gafa o Iakopo, mo taku tavini ko Tavita. Ka fili ne au se tino i te gafa o Tavita ke pule i tino o te gafa o Apelaamo, Isaako mo Iakopo. Ka alofa au ki oku tino, kae fai ne au ke toe maumea.”