Read Te Tusi Tapu I Te Gana Tuvalu Lomiga Lua IELEMIA 34 Bible Online

IELEMIA 34 - Te Tusi Tapu I Te Gana Tuvalu Lomiga Lua bible

IELEMIA 34

¹ A te Aliki ne faipati mai ki a au i te taimi ne taua atu ei a Nepukanesa, te tupu o Papelonia, mo tena kautau, fakatasi mo kautau a malo mo fenua kola e pule ne ia, ki Ielusalema mo fa'kai i ona tafa.

²A te Aliki, te Atua o Isalaelu, ne fai mai ki a au, ke fano au o fai ki te Tupu o Iuta ko Setekaia penei, “Au, te Aliki, ka tuku atu ne au a te fa'kai tenei ki te tupu o Papelonia, kae ka 'sunu ne ia.

³A koe e se sao; ka puke fakapagota koe kae tuku atu ki a ia. Ka fakafesagai ou lua mata, kae faipati fakalei eiloa; tena, ko ave ei koe ki Papelonia.

⁴Setekaia, fakalogo mai ki aku muna konei e uiga ki a koe. A koe e se mate i te taua.

⁵A koe e mate mo te filemu, kae ka 'sunu mea manogi a tino i te taimi e tanu ei koe, e pela eiloa mo te 'sunuga sale ne latou a mea manogi i taimi ne tanu ei ou tupuga, kola ne fai mo tupu i ou mua. Ka 'tagi fanoanoa i tou mate, kae fai aka penei, ‘A te motou tupu ko mate!’ Ko au, te Aliki, tena ne faipati atu.”

⁶Ne fakaoko atu ne au a te fekau tena ki te Tupu ko Setekaia i Ielusalema

⁷i te taimi e taua mai ei te kautau a te tupu o Papelonia ki te fa'kai o Ielusalema. A te kautau a te fili e taua atu foki i te taimi tena ki fa'kai ko Lakisa mo Aseka, kona eiloa a nisi fa'kai kola ne fakamalosi fakalei.

⁸A te Tupu ko Setekaia, mo tino Ielusalema ne fai te feagaiga a latou ke fakasaoloto

⁹a pologa Epelu a latou, tagata mo fafine, ko te mea ke se toe ai se tino Isalaelu e fakapologa ne ia sena taina Isalaelu.

¹⁰A tino katoa o te fenua, mo olotou takitaki, ne loto tasi ke fakasaoloto olotou pologa, kae se toe fakapologa eiloa ne latou. Ne fakasaoloto eiloa ne latou olotou pologa,

¹¹kae fakamuli ifo, ne toe 'fuli olotou mafaufauga, toe puke mai foki ne latou o fakapologa ne latou.

¹²Tena, fai mai ei te Aliki,

¹³te Atua o Isalaelu ki a au, ke fai atu au ki te fenua penei: “Ne fai ne au taku feagaiga mo otou tupuga i te taimi ne faka'sao ei ne au latou mai i Aikupito, kae fakasaoloto mai i te olaga fakapologa. Au ne fai ki a latou,

¹⁴ me i taki fitu tausaga katoa, e tau o fakasaoloto ne latou a pologa Epelu kola ko oti ne tavini ki a latou i te ono tausaga. Ka ko otou tupuga e seki 'saga mai ki a au, io me faka'logo mai ki aku muna ne fai.

¹⁵I ne nai aso konei ko teka atu, ne 'fuli otou mafaufauga, fai ei ne koutou te mea tela e fiafia au ki ei. Ne fakasaoloto katoa ne koutou otou taina Isalaelu kola e pologa i a koutou, kae ne fai ne koutou se feagaiga i oku mua, i te Faletapu tela e tapuaki mai ei a tino ki a au.

¹⁶Kae ne toe 'fuli foki otou mafaufauga, ko fakaseaoga ei ne koutou a au. A koutou katoa ne toe olo o puke mai a pologa kola ne fakasaoloto ne koutou (ko latou ne manako ke fakasaoloto latou) kae fai malō ne koutou ke toe fai mo pologa a koutou.

¹⁷Tela la, a au, te Aliki, ko fai atu ki a koutou, i a koutou ko se fakalogo mai ki a au: e seki tuku atu ne koutou te saolotoga e tau ki otou taina Isalaelu. Tela la, i te taimi nei, ka avatu ne au te saolotoga ki a koutou: ko te saolotoga ke 'mate koutou i te taua, te famai, mo te fia'kai. Ka fai ne au a malo katoa i te lalolagi ke ma'taku i te mea e fai ne au ki a koutou.

¹⁸A tino maluga o Iuta mo Ielusalema, fakatasi mo ofisa o te palesi, mo faitaulaga, mo takitaki katoa, ne fai ne latou a te feagaiga mo au i te sasalega i te va o te avā feitu o te pulumakau tela ne kati lua ne latou. Ne ofa ne latou te feagaiga tena, kae seki tausi ne latou a ona tulafono. Tela la, ka fai ne au ki a latou a te mea tela ne fai ne au ki te pulumakau.

²⁰Ka tuku atu ne au latou ki olotou fili, kola e fia tamate ki a latou, ka ko olotou foitino 'mate ka kai ne manu eva mo manu o te vao.

²¹Ka tuku atu foki ne au a te tupu o Iuta ko Setekaia, mo ana ofisa, ki a latou kola e fia tamate ki a latou. Ka tuku atu ne au latou ki te kautau a Papelonia, tela ko gata tena faitaua atu ki a koutou.

²²Ka fai ne au a te fakatonuga, ko foki mai ei latou ki te fa'kai tenei. Ka taua atu latou ki te fa'kai tena, puke ne latou kae 'sunu. Ka fai ne au a fa'kai o Iuta ke pela me se toafa tela e seai ne tino e nofo i ei. Ko au, te Aliki, tena ne faipati atu.”