Read Te Tusi Tapu I Te Gana Tuvalu Lomiga Lua IELEMIA 37 Bible Online

IELEMIA 37 - Te Tusi Tapu I Te Gana Tuvalu Lomiga Lua bible

IELEMIA 37

¹ A Setekaia te tama tagata a Iosia, ne fakasopo ne te tupu o Papelonia ko Nepukanesa ke fai mo tupu o Iuta, o sui a Ieoiakini te tama tagata a Ieoiakimo.

²Ka ko Setekaia mo ana ofisa mo tino o te fenua e seki faka'logo ki te fekau tela ne aumai ne te Aliki ki a au.

³Ne uga mai ne te Tupu ko Setekaia a Ieukala te tama tagata a Selemia, mo te faitaulaga ko Sefanaia te tama tagata a Maseia, ke fakamolemole mai ke 'talo au ki te Aliki te motou Atua mo te 'lei o te malo o matou.

⁴Au i te taimi nei e seki 'pei ei ki te falepuipui, kae koi fanofano sāle eiloa au mo te saoloto i te fenua.

⁵A te kautau a Papelonia ne nikoi ne latou a Ielusalema, kae i te logooga i te kautau a Aikupito ko vau mai i te tuakoi o Aikupito, tena ne olo ei latou keatea mai i te fa'kai.

⁶Tena ne fai mai ei te Aliki te Atua o Isalaelu ki a au,

⁷ke fai atu au ki a Setekaia penei, “A te kautau a Aikupito tenei ko vau o fesoasoani ki a koutou, kae e toe foki atu eiloa ki te lotou fenua.

⁸Ka ko te kau Papelonia e toe foki mai o taua ki te fa'kai tenei, fakatakavale eiloa ne latou kae 'sunu.

⁹Au, te Aliki, e fai atu ke sa faka'segina otou mafaufau o fai pela i te kau Papelonia e se 'foki mai, me e 'foki mai eiloa.

¹⁰E ui foki eiloa e fakatakavale ne koutou a te kautau katoa a Papelonia, kae 'toe mai fua ko tagata pa'kia o latou kola e ta'kato i olotou faleie, a tagata pa'kia kona e 'tu aka eiloa o 'sunu te fa'kai tenei ke ii ki lalo i te laukele.”

¹¹A te kautau a Papelonia ne 'tele keatea mai i Ielusalema i te saemaiga o te kautau a Aikupito.

¹²Tena ne tiaki ei ne au Ielusalema o fano ki te laukele o Peniamina o puke toku vaega i tofi o te kaiga.

¹³Kae i te taimi ne oko atu ei au ki te mataloa o Peniamina, a te ofisa pule o sotia tiute i kona e igoa ki a Ilia, te tama tagata a Selemia kae ko te mokopuna o Hanania, ne taofi ne ia a au kae fai mai penei, “A koe ko tele ki te kau Papelonia!”

¹⁴Ne tali atu au penei, “Ikai! Au se tele keatea.” Ka ko Ilia e se fia fakalogo mai ki a au, kae ne puke ne ia a au, ave ei ne ia a au ki te kau ofisa.

¹⁵Ko oko eiloa i te lotou kaitāua ki a au, tena fai ei te lotou fakatonuga ke ave au o kini kae 'loka i te fale o Ionatana, te failautusi o te fono, a tena fale ne fai mo fai a te falepuipui.

¹⁶Au ne 'loka i te potu i lalo o te laukele, kae ne leva eiloa taku nofoga i kona.

¹⁷Fakamuli ifo, ne uga mai a te fekau a te Tupu ko Setekaia ke fanatu au, kae ne fesili mai a ia ki a au i te palesi penei, “E a, e isi se fekau mai i te Aliki?” Ne tali atu au penei, “E isi,” kae toe fakaopoopo atu mo aku muna penei, “A koe ka tuku atu ki te tupu o Papelonia.”

¹⁸Tena, kae fesili atu ei au penei, “Se a taku mea 'se ne fai ki a koe, io me ki au ofisa, io me ki tino konei, ko ala ei o 'pei ne koe au ki te falepuipui?

¹⁹Se a te mea ne tupu ki otou pelofeta kola ne fai atu i te tupu o Papelonia e se taua mai ki a koe mo te fenua tenei?

²⁰I te taimi nei, Tou 'Malu, au e fakamolemole atu ki a koe, ke fakalogo mai koe ki a au, kae talia mai taku fakamolemole. Fakamolemole sa fakafokigina au ki te falepuipui i te fale o Ionatana. Kafai e fakafoki ne koe au ki ei, e iku eiloa au o mate i kona.”

²¹Tena ne fai te fakatonuga a te Tupu ko Setekaia ke ave au o 'loka i te malae fono o te palesi. Ne nofo eiloa au i kona, kae ne aumai faeloa ne latou taku puta falaoa i aso takitasi mai i te fale faka'fete falaoa, ke oko eiloa ki te taimi ko seai ei ne falaoa faka'fete i te fa'kai.