Read Te Tusi Tapu I Te Gana Tuvalu Lomiga Lua IELEMIA 4 Bible Online

IELEMIA 4 - Te Tusi Tapu I Te Gana Tuvalu Lomiga Lua bible

IELEMIA 4

¹Muna a te Aliki, “Tino Isalaelu, kafai ko ma'nako koutou o 'fuli mai, na 'fuli mai la nei ki a au. Kafai e ave keatea ne koutou a tupua kona e se fiafia au ki ei, kae 'saga mai o fakamaoni mai ki a au,

²ko mafai ei ne koutou o fakaaoga toku igoa i otou tautoga. Tena la,[2] ka o'mai a malo katoa ke fakamanuia atu ne au a latou, kae ka 'viki mai latou ki a au.”

³ Muna a te Aliki ki tino Iuta mo Ielusalema, “Fakamalū aka otou laukele kona e seki fakamalū; sa tokigina otou fuaga fakatasi mo lakau makai'kai.

⁴Tausi faka'lei te otou feagaiga ne fai mo au, te otou Aliki, kae fakatapu mai otou foitino ki a au, koutou tino Iuta mo Ielusalema. Kafai e se faka'logo koutou, ko toku kaitaua ka 'ka pela me se afi ona ko amioga ma'sei ne fai ne koutou. Ka 'ka, kae seai eiloa se tino ke tamate ne ia a te afi tena.”

⁵Fakatagi te pu i te fenua katoa! Ka'laga ki luga ke lagona fakalei! Fai atu ki tino Iuta mo Ielusalema Ke 'tele ki fa'kai nofo olo.

⁶Fakasino te auala ki Siona! 'Tele ke sao koutou! Sa fakatalave! A te Aliki ko aumai ne Ia a te mala Mo te fakamaseiga valevale mai i matu.

⁷A te tagata ofa malo tena ko kamata o vau e pela me se leona, Ko vau mai i tena koga muni. Ko vau o 'ta fakamasei a Iuta. A fa'kai o Iuta ka ofa ke maofa, Kae ka seai ne tino e 'nofo i ei.

⁸Tela la, 'pei ki gatu lautaga, Kae 'tagi fanoanoa me i te kaitaua fakamataku o te Aliki e seki gata ki a Iuta.

⁹Muna a te Aliki, “I te aso tena, a tupu mo ofisa ma'luga ka ma'taku; a faitaulaga ka 'poi, pena foki a pelofeta.”

¹⁰Tena, kae fai atu au penei, “Te Aliki Sili, ko oti ne fakatogafiti ne koe a tino Ielusalema! A koe ne fai pela me ka oko mai te filemu, kae tela la, ko te pelu fua tena ko tu i olotou kakia.”

¹¹Ka oko mai te taimi e oko atu ei se fakaasiga ki tino Ielusalema, me ka agi mai se matagi vela mai i te toafa ki a latou. E se se matagi agi malie tela e agina fua i ei se kausaito —

¹²se matagi tela e agi mai i te fakatonuga a te Aliki, se matagi tafasili i te malosi! Ko te Aliki eiloa tenei ko folafola mai ne Ia a te fakamasinoga ki tino o tena fenua.

¹³Kiloke, a te fili ko vau pela me ne kaumana. Ana kaliota tau e pela me ne vaeosio, ka ko ana solofanua e ma'kini atu i aeto. Tatou ko se aoga! Tatou ko malaia!

¹⁴Ielusalema, ave keatea te masei mai i otou loto, ko te mea ke 'sao koutou. E gata afea te mafaufau o koutou ki mafaufauga ma'sei?

¹⁵A avefekau mai i te fa'kai o Tanu pela foki mai i mauga foliki o Efalaima ko folafola ne latou a te tala 'se 'lei.

¹⁶Ko o'mai o fakaasi mai ki malo, kae taku mai ki Ielusalema i te fili tena ko vau mai i se fenua 'mao. A te kau o te fili kona ka paka'laga ki fa'kai o Iuta

¹⁷kae ka nikoi ne latou a Ielusalema e pela me ne tagata kola e leoleo ne latou se fatoaga; ka tupu te mea tena me i tino Ielusalema ne 'teke ki te Aliki. Ko te Aliki tena ne faipati mai.

¹⁸Iuta, a fakalavelave konei ko oko mai ki a koe e pogai eiloa mai i te olaga 'se 'lei ne ola ei koe, mo mea 'se 'lei ne fai ne koe. Ko au agasala foki eiloa konei ko ala ei o oko atu ki a koe a puapuaga konei; ko tu malō tou fatu ne 'velo ne au agasala.

¹⁹Ko oko eiloa i toku 'mae! Ko se maua ne au o kufaki toku 'mae! Toku fatu! Toku fatu ko tuki valevale eiloa! Ko se mafai ne au o nofo filemu; E lagona ne au a leo o pu mo leo o te taua.

²⁰A mala ko fetaotaomaki eiloa; A te fenua kātoa ko masei valevale. E 'poi atu nei ko oti ne ofa a otou faleie; A olotou laugatu 'pui ko palele ne saesae.

²¹E gata afea taku kilokilo atu ki te taua tena e fai mai Mo toku fakalogologo atu ki te 'tagi mai o pu?

²²Muna a te Aliki,‘A tino o toku fenua e va'lea; E se iloa ne latou a au. E pela eiloa me ne tama'liki foliki; E seai se malamalama i a latou. A latou e apo i te faiga o amioga ma'sei, Kae se iloa o fai a amioga 'lei.”

²³Ne kilo atu au ki te lalolagi — ko masei valevale; Ki te lagi — ko seai se mainaga i ei.

²⁴Ne kilo atu au ki mauga — ko pole'pole; Pena foki a mauga foliki, ko gasue'sue fua.

²⁵E lavea atu ne au me ko seai ne tino; Ke oko foki eiloa ki manu eva ko oti ne eva atu keatea.

²⁶A te fenua laukele ola ko liu toafa; A ona fa'kai ko 'maofa valevale ona ko te kaitaua o te Aliki.

²⁷(A te Aliki ne fai tena muna pela i te lalolagi katoa ka fakaliu vao, kae e se ofa katoatoa ne ia.)

²⁸A te lalolagi ka 'tagi fanoanoa; A te lagi ka pouli. A te Aliki ko oti ne faipati Ka se mafai eiloa o 'fuli ona mafaufauga. Ko oti ne fai tena ikuga, Kae se toe 'fuli eiloa.

²⁹A tino katoa ka 'tele manafai ko lagona ne latou A tagata i solofanua mo tino e sana olotou matasana. A nisi tino ka 'tele ki te vao, Ka ko nisi tino ka olo o kake ki luga i kaupapa. A fa'kai katoa ka seai ne tino i ei, Kae ka se toe nofogia eiloa ne tino.

³⁰Ielusalema, a koe ko malaia! Ai a e pei ei koe ki gatu lanu kulakula? Ai a e teu ei koe ki teuga taua kae vali ou mata? A koe e teu fakagaligali tou foitino kae seai se aoga! A ou fiafaiga ko se ma'nako ki a koe kae ko ma'nako o tamate koe.

³¹Ne lagona ne au se tino e tagi, E pela me se fafine ka fai o fanau, E pakalaga pela me se fafine ko fanau mai tena tamaliki muamua eiloa. Ko Ielusalema tena e tagi o taumafai ke manava aka a ia, Kae 'fola mai tena lima kae fai mai penei, “Au ko malaia! Konei ko o'mai o tamate au!”