Read Te Tusi Tapu I Te Gana Tuvalu Lomiga Lua IELEMIA 40 Bible Online

IELEMIA 40 - Te Tusi Tapu I Te Gana Tuvalu Lomiga Lua bible

IELEMIA 40

¹A te Aliki ne faipati mai ki a au ka ko oti ei au ne fakasaoloto ne Nepusalatana, te ofisa pule, i te fa'kai o Lama. Au ne ave ki kona, kae saisai ki seni, fakatasi mo tino katoa mai i Ielusalema mo Iuta kola e ave fakapagota ki Papelonia.

²Ne vau te ofisa pule ki a au, kae fai mai penei, “A te Aliki tou Atua ne fai mai me e aumai ne ia a te masei valevale ki te fenua tenei,

³kae nei, ko oti ne fai ne ia a te mea tena ne folafola mai ne ia. A mea katoa konei ne tupu ona ko tou fenua ne agasala ki te Aliki kae seki fakalogo ki a Ia.

⁴Nei, ka tala ne au a seni mai i ou lima kae fakasaoloto koe. Kafai e fia vau koe i a au ki Papelonia, e lei faeloa, kae ka tausi eiloa ne au a koe. Kae kafai e se fia vau koe, e pule eiloa koe. E pule eiloa koe i tau filifiliga, e pule foki eiloa koe i te koga e fia fano koe ki ei.”

⁵Ne kilo mai Nepusalatana me e seai saku tali ne fai,[33] tena ne fai mai ei ki a au penei, “Foki atu ki a Ketalia te tama tagata a Aikamo kae ko te mokopuna o Safana, ko ia tena ne fakasopo ne te tupu o Papelonia ke fai mo kovana o fa'kai o Iuta. E mafai koe o nofo i a ia ke nofo tasi koe mo tino o te fenua, e mafai foki koe o fano ki so se koga e fia fano koe ki ei.” Tena, ne aumai ne ia tena meaalofa ki a au mo ne meakai ke fano mo au, tuku mai ei ne ia a au ke fano.

⁶Ne fano au o nofo i a Ketalia i Mesepa, tena ne nofo tasi ei au mo tino kona ne toe i te fenua.

⁷ E isi ne ofisa mo sotia Iutaia kola e seki talia ne latou te lotou takavale. Ne logo latou me ne fakasopo ne te tupu o Papelonia a Ketalia ke fai mo kovana o te fenua, kae ne fai ne ia ke pule i tino katoa kola e seki ave ki Papelonia — a tino kona ko toe tino mativa eiloa i te fenua.

⁸Tena la, a Isamaeli te tama tagata a Netania, Ioananu te tama tagata a Kalia, Selaia te tama tagata a Tanumeta, pela foki a tama tagata a Efai mai i Netofa, mo Iesanaia mai i Maaka, ne olo atu mo olotou potukau ki a Ketalia i Mesepa.

⁹Muna a Ketalia ki a latou, “Au e faipati tonu atu ki a koutou me e se tau mo koutou o mataku ma ifo atu ki te kau Papelonia. Taumafai o nofo tumau i te fenua tenei, o tavini atu ki te tupu o Papelonia, kae ka fanofano lei a otou mea katoa e fai.

¹⁰Au ka nofo i Mesepa o fai mo sui o koutou, manafai e o'mai te kau Papelonia ki konei. E mafai faeloa o fakaputu mai ne koutou a uaina fuaga lakau, mo sinu olive, kae tausi fakalei i koga e tau o teu i ei, kae e nofo eiloa koutou i fa'kai kona e nofo koutou i ei.”

¹¹I te taimi tena, a tino Isalaelu katoa kola i Moapi, Amoni, Etoma, pela foki i nisi fenua, ne logo i te tupu o Papelonia ne talia ne ia a nisi tino Isalaelu ke nofo eiloa i Iuta, kae ko oti foki ne fai ne ia a Ketalia ke fai mo kovana o latou.

¹²Tena la, ne tiakina ne latou a koga kona ne salalau latou ki ei, o foki atu ki Iuta. Ne o'mai latou ki a Ketalia i Mesepa, i kona ne fakaputu ne latou a uaina mo fuaga lakau e uke.

¹³I te otiga o mea kona, a Ioananu mo takitaki o sotia kola e seki fakamalalo ki te fili, ne o'mai ki a Ketalia i Mesepa

¹⁴kae fai atu ki a ia penei, “E se iloa ne koe i te tupu o Amoni ko Paalisa ko oti ne uga mai ne ia a Isamaeli ke vau o tamate a koe?” Ka ko Ketalia e se talitonu ki te mea tena.

¹⁵Ne faipati muni atu a Ioananu ki a ia penei, “Tuku mai ke fano au o tamate a Isamaeli, kae e seai eiloa se tino e iloa ne ia. Ai a e tuku fua ei a ia ke vau o tamate a koe? A te mea tena ka fai fua ne ia a tino Iutaia katoa kona i ou tafa ke salalau valevale, kae ka aumai fua ei te malaia ki tino katoa konei e toe i Iuta.”

¹⁶Kae ne tali atu a Ketalia penei, “Sa faigina te mea tena! A tau fakamatalaga tena e uiga ki a Isamaeli e se tonu!”