Read Te Tusi Tapu I Te Gana Tuvalu Lomiga Lua IELEMIA 41 Bible Online

IELEMIA 41 - Te Tusi Tapu I Te Gana Tuvalu Lomiga Lua bible

IELEMIA 41

¹ I te fitu o masina i te tausaga tena, a Isamaeli, te tama tagata a Netania kae ko te mokopuna o Elisaia, se tino i te kaiga tupu, kae se ofisa pule e tokotasi mai i ofisa pule a te tupu, ne fano ki Mesepa mo tena kau e tinogafulu tagata, o olo ki a Ketalia. Ite taimi tena ne kai fakatasi ei latou,

²ne tapale aka a pelu a Isamaeli mo tena kau kona, tamate eiloa ne latou a Ketalia.

³Ne tamate foki ne Isamaeli a tino Isalaelu katoa kola ne nofo tasi mo Ketalia i Mesepa, pela foki a sotia Papelonia kola ne nofo i kona.

⁴I te aso mai tua ifo, seki ai ei se tino kai iloa ne ia i a Ketalia ko oti ne tamate,

⁵kae ne oko mai e tino valu tagata mai i Sekema, Sailo, mo Samalia. A tino konei ko oti ne vele olotou talafa, saesae olotou gatu, kae katikati olotou foitino. E puke mai ne latou a saito mo mea manogi o ofo atu i te Faletapu.

⁶Tena, ne fanatu a Isamaeli mai i Mesepa o fakafetaui ki a latou, kae e tagi i te taimi e fanatu ei a ia. I te okoatuga a ia ki a latou, ne fai atu a ia ki a latou penei, “Fakamolemole, o'mai ki loto o asi ki a Ketalia.”

⁷I te ulumaiga a te kau kona ki loto i te fa'kai, ne tamate latou ne Isamaeli mo tena kau, kae pei olotou foitino ki lalo i te vaikeli.

⁸Kae a tinoagafulu i te kau tena ne fai atu ki a Isamaeli penei, “Fakamolemole, sa tamategina matou! E isi ne saito mo kalite mo sinu olive mo hani a matou kola e funa i tua o te fa'kai.” Tena ne fakasao eiloa ne ia latou.

⁹A te vaikeli tela ne pei ki ei ne Isamaeli a foitino o tino kola ne tamate ne ia, ko te vaikeli lasi[34] tela ne keli ne te kau a te Tupu ko Asa i te taimi ne taua atu ei ki a ia a te tupu o Isalaelu ko Paasa. Ne fakafonu ne Isamaeli a te vaikeli tena ki foitino mate.

¹⁰Tena, ne puke fakapagota ne ia a tama fafine a te tupu, pela foki mo tino katoa o Mesepa kola ne tuku ne te ofisa pule ko Nepusalatana ke pule ne Ketalia. Ne ave fakapagota latou ne Isamaeli, olo ei i te auala ki te fenua o Amoni.

¹¹A Ioananu mo takitaki o kautau kola e nofo mo ia, ne logo i te mea masei tela ne fai ne Isamaeli.

¹²Tena ne olo atu ei latou o afuli a Isamaeli mo tena kau, maua atu ei ne latou i tafa o te vai lasi i Kipeona.

¹³I te laveaga ne tino kola ne puke fakapagota ne Isamaeli a Ioananu mo takitaki o kautau kola e o'mai mo ia, ko oko eiloa i te lotou fiafia,

¹⁴tena ne mafuli mai ei latou o tele mai ki a latou.

¹⁵Ka ko Isamaeli mo te tokovalu tagata i tena kau ne sao mai i a Ioananu, sola atu ei ki Amoni.

¹⁶A Ioananu mo takitaki o kautau kola ne o'mai mo ia ne tausi fakalei ki tino kola ne puke fakapagota ne Isamaeli mai i Mesepa i te otiga ne tamate ne latou a Ketalia — a pagota kona e aofia ei a sotia, fafine, tamaliki mo eunuka.

¹⁷A Ioananu mo takitaki o kautau kona ne o'mai mo ia ko mataku i te kau Papelonia ona ko te tamatega o Ketalia ne Isamaeli. A Ketalia ne fakasopo ne te tupu o Papelonia ke fai mo kovana o te fenua. Tena la, ne malaga atu ei latou o olo ki Aikupito, ko te mea ke mao latou mai i te kau Papelonia. I te lotou auala, ne nofo ake latou i Kimeama, i tafa o Peteleema.