Read Te Tusi Tapu I Te Gana Tuvalu Lomiga Lua IELEMIA 43 Bible Online

IELEMIA 43 - Te Tusi Tapu I Te Gana Tuvalu Lomiga Lua bible

IELEMIA 43

¹I te otiga ne faipati atu ne au ki tino o te fenua a mea katoa kola ne fai mai ne te Aliki te olotou Atua ke fai atu ne au ki a latou,

²kae o'mai a Asalia te tama tagata a Hosaia, mo Ioananu te tama tagata a Kalia, mo nisi tagata fiasili katoa o fai mai ki a au penei, “A koe e loi. A koe e seki uga mai ne te Aliki te motou Atua ke fai mai koe ki a matou ke se olo matou o nofo i Aikupito.

³A Paluka te tama tagata a Nelia ne fakaoso ne ia a koe ki a matou, ko te mea ke pule matou ne te kau Papelonia, ke tamate ne latou a matou io me ave fakapagota matou ki Papelonia.”

⁴Tela la, a Ioananu mo takitaki o kautau, mo tino o te fenua, e se fia fakalogo eiloa ki te fakatonuga a te Aliki ke nofo malie i te fenua o Iuta.

⁵ Tena la, a Ioananu mo ofisa katoa o kautau, ne puke ne latou a tino katoa kola e toe i Iuta o ave ki Aikupito, fakatasi mo tino katoa kola ne foki mai mai malo kola ne fakasalalau latou ki ei:

⁶ko tagata, fafine, tamaliki, mo tama fafine a te tupu. Ne ave katoa ne latou a tino katoa kola ne tuku ne Nepusalatana, te ofisa pule, ke nofo i te pulega a Ketalia, e aofia ei maua mo Paluka.

⁷Ne seki fakalogo latou ki te fakatonuga a te Aliki, kae ne olo eiloa ki Aikupito ke oko ki te fa'kai ko Tapenesa.

⁸I kona, ne fai mai ei te Aliki ki a au penei,

⁹“Puke mai ne fatu lasi kae ave o tanu i te fakavae o te auala i mua o te mataloa ki te fale o te malo i te fa'kai, kae fai atu ki ne tino Isalaelu ke o'mai o onoono i te mea tena e fai ne koutou.

¹⁰Ka oti, ko fai ei koe ki a latou i a au, te Aliki Malosi, te Atua o Isalaelu, ka aumai ne au taku tavini ko Nepukanesa, te tupu o Papelonia, ki te koga tenei, [36] kae ka fakatu tena nofogaaliki i luga i fatu kona ne tanu ne koe, kae ka fola ne ia a te faleie o te tupu i luga i fatu kona.

¹¹A Nepukanesa ka vau kae ka fakatakavale ne ia a Aikupito. A tino kola ko oti ne tusia ke mate i famai e mate eiloa i famai, a tino kola ne tusia ke ave fakapagota e ave eiloa fakapagota, ka ko tino kola ne tusia ke mate i taua, e mate eiloa i taua.

¹²Ka fakaka ne au a faletapu o atua o Aikupito, ka ko te tupu o Papelonia ka sunu ne ia a olotou atua, kae ave ne ia. E pela mo te leoleo mamoe tela e taetae faka'ma ne ia a kutu i ana gatu, e pena foki te tupu o Papelonia me ka fulu faka'ma ne ia a te fenua o Aikupito, ko fano ei a ia mo te manumalo.

¹³Ka ofa fakamasei ne ia a fatu fakamanatu i Heliopolisi i Aikupito, kae sunu a faletapu o atua o Aikupito.”