Read Te Tusi Tapu I Te Gana Tuvalu Lomiga Lua IELEMIA 46 Bible Online

IELEMIA 46 - Te Tusi Tapu I Te Gana Tuvalu Lomiga Lua bible

IELEMIA 46

¹A te Aliki ne faipati mai ki a au e uiga ki malo,

² e kamata i a Aikupito. Konei ana muna e uiga ki te kautau a te tupu o Aikupito ko Neko, tela ne fakatakavale ne te tupu o Papelonia ko Nepukanesa i Kakemisa, i tafa o te Vaitafe ko te Eufilate i te fa o tausaga o te nofoaiga a te Tupu ko Ieoiakimo i Iuta:

³“A ofisa o Aikupito ko kalaga penei, ‘Fakatoka otou talita Kae olo atu ki loto i te taua!

⁴Fakatoka otou solofanua kae sopo ki ei! Fakalaina fakalei kae pulou otou pulou! Fakamata otou tao! Pei otou gatu tau!’

⁵Ne fesili te Aliki penei, “Kae se a te mea e lavea ne au? Ko tele latou ki tua mo te mataku. A olotou sotia ko takavale; Ko mataku kae ko tele ki te mea e mafai ne latou, Kae ko se onoono mai eiloa ki olotou tua.

⁶A latou kola e tele makini e se mafai o tele keatea; A sotia e se mafai o tele ke sao latou. E siga fua latou i tafa o te Eufilate i matu.

⁷Ko oi tenei e fanake ki luga pela mo te Naila, Pela me se vai o te vaitafe tela ko lofia ona kaugutu?

⁸Ko Aikupito tena, e fanake pela mo te Naila, Pela me se vaitafe tela ko lofia ona kaugutu. Ne fai mai Aikupito penei, ‘Au ka fanake o ufi te lalolagi; Ka fakamasei ne au a fa'kai mo tino kola e nofo i ei.

⁹Fakatonu atu ki solofanua ke olo, Mo kaliota ke na tele! Uga atu a sotia: Ko tagata mai i Sutana mo Lipia, kola e tauave olotou talita, Mo tino apo i sana o matasana mai i Litia.”’

¹⁰Tenei te aso o te Aliki Sili i te Malosi: Ka taui atu ne ia i te aso nei, A te masei ki tena fili; Ka fakasala ne ia ona fili i te aso nei. A tena pelu ka kai ne ia latou ke oko ki te taimi e makona ei, Kae inu olotou toto ke oko ki te taimi e malie ei. I te Aso nei, ko tamate ne te Aliki Malosi A ona fili i matu, i tafa o te Eufilate.

¹¹Tino Aikupito, olo ki Kileata Kae sala mai ne vailakau! A otou vailakau ko oti ne fakatalitonugina me e se aoga; E seai se mea e mafai o fakalei ne ia koutou.

¹²A malo ko oti ne logo i tou masiasi; Ko oti ne logo a tino katoa i tau tagiga. E lave te vae o te sua sotia i te sua sotia, Tena siga fakatasi ei ki lalo i te laukele.

¹³ I te taimi ne vau ei a Nepukanesa, te tupu o Papelonia, o taua mai ki Aikupito, kae ne faipati mai a te Aliki ki a au, ana muna,

¹⁴“Folafola atu i fa'kai o Aikupito, i Mikitolo, Mefisi, mo Tapenesa penei: ‘Fakatoka o pui koutou, A mea katoa a koutou ka fakamasei katoa i te taua!

¹⁵Ai a ko siga ei te otou atua malosi ko Apisa? Ko te Aliki ne ta ne ia ke siga ki lalo!’

¹⁶A otou sotia ko siga kae pakū ki lalo; E fai mai te sua sotia ki te sua sotia penei, ‘Ke vave! Tatou ka foki ki te tou fenua Ke 'sao tatou mai i te pelu a te fili!’

¹⁷“Fakaigoa atu te tupu o Aikupito ki se igoa fou — ‘Tino gutu faipati kae seai se malosi.’

¹⁸Au, te Aliki Malosi, ko te Tupu. Au ko te Atua ola. E pela mo te Mauga o Tapola tela e maluga atu i mauga, Mo te Mauga o Kalamelu tela e maluga malosi i luga o te tai, Ka pena te malosi o ia tela e taua atu ki a koutou.

¹⁹Fakatoka i a koutou ka ave fakapagota, Koutou tino Aikupito! A Mefisi ka fai mo toafa, Se koga seai ne tino e nofo i ei.

²⁰A Aikupito e pela me se pulumakau gali, Tela e taua mai ki ei te lago u'kati mai i matu.

²¹Ke oko foki eiloa ki sotia kola ne togi mai Ne latou, ko se aoga pela fua me ne tamā pulumakau. A latou e seki tu o taua; Ne mafuli katoa latou o tele ki tua. A te aso malaia o latou ko oko mai, Ko te aso e ta fakapalele ei latou.

²²A Aikupito ko tele keatea, ko tagi pela me se gata, I te taimi ne sae mai ei te kautau a te fili. Ne taua mai latou ki ei ki takū, Pela me ne tino e kati ki lalo a lakau

²³O faka'ma a te toga vao pupu. A olotou tino ko to tokouke ko se mafai o lau; A olotou sotia ko tokouke atu i se akelise.

²⁴A tino Aikupito ko masiasi fāka eiloa; Ko fakatakavale latou ne tino mai i matu. Ko au, te Aliki, tena ne faipati atu.”

²⁵A te Aliki Malosi, te Atua o Isalaelu, ne fai mai penei, “Ka fakasala ne au a te atua o Tepesi ko Amoni, fakatasi mo Aikupito mo ana atua mo ona tupu. Ka puke ne au a te tupu o Aikupito mo tino katoa kola e fakalagolago ki a ia,

²⁶kae tuku atu ki tino kola e fia tamate ki a latou, ki te tupu o Papelonia ko Nepukanesa mo tena kautau. Kae fakamuli ifo, a tino ka toe nofo i Aikupito, e pela mo aso mua. Ko au, te Aliki, tena ne faipati atu.”

²⁷ “Toku fenua, sa mataku, Tino Isalaelu, sa mataku. Ka faka'sao ne au koutou mai i te fenua mao tena, Mai i te fenua tena e nofo pagota ei koutou. Ka toe foki mai koutou ki te otou fenua o ola i te filemu; Ka saogalemu koutou, kae ka seai se tino E toe fai ne ia koutou ke mataku.

²⁸Au ka vau ki a koutou o faka'sao koutou. Ka ta fakapalele ne au a malo katoa kola Ne fakasalalau ne au ki ei koutou, Ka ko koutou e se ta fakapalele ne au. E se tuku atu ne au koutou ke olo kae e seki fakasala; Kae kafai e fakasala ne au koutou, E fakasala eiloa i te auala tonu. Ko au, te Aliki, tena ne faipati atu.”