Read Te Tusi Tapu I Te Gana Tuvalu Lomiga Lua IELEMIA 48 Bible Online

IELEMIA 48 - Te Tusi Tapu I Te Gana Tuvalu Lomiga Lua bible

IELEMIA 48

¹ Konei a muna a te Aliki Malosi ne fai e uiga ki Moapi: “Kalofa i tino Nepo — A te lotou fa'kai ko oti ne ofa fakamasei! A Kiliataima ko oti ne fakatakavale, A tena olo malosi ko oti ne ofa ki lalo, Mo ona tino ko masiasi valevale;

²A te gali o Moapi ko seai eiloa. A Hesepono ko oti ne puke ne te fili, Kae ko taumafai foki o ta fakamasei a te malo o Moapi. A te fa'kai o Matemana ka fakafilemu, A kautau ka olo atu o taua ki ei.

³A tino Holonaima ko tagi penei, ‘Ko oko eiloa i te lasi o te fakasaua! Ko oko eiloa i te lasi o te fakamasei!’

⁴“A Moapi ko oti ne fakamaseigina; Fakalogo aka ki te leo o tamaliki e tagi.

⁵Fakalogo aka ki te tagi mai o latou i te auala ki Luita, Ko tagi ona ko mafatia olotou loto, I te auala ki lalo i Holonaima.

⁶Olotou muna penei, ‘Ke vave, tele ke sao koutou! ’ ‘Tele pela me ne asini vao o te toafa!’

⁷“Moapi, a koe ne fakatuaga ki tou malosi mo tou maumea, Kae nei, a koe e fakatakavalegina foki eiloa; A tou atua ko Kemoso ka ave i te tafeaga, Fakatasi mo ana pelenise mo faitaulaga.

⁸E seai se fa'kai e sao i te fakamaseiga tena; A vanu mo laukele laugatasi ka masei katoa. Ko au, te Aliki, tena ne faipati atu.

⁹Fakatu aka se fatu tugamau mo Moapi; E se leva nei kae ka fakamasei. A ona fa'kai ka maofa valevale, Kae se toe ai ne tino e nofo i kona.”

¹⁰(Ke malaia te tino tela e se fai ne ia a te galuega a te Aliki mo tena loto katoa! Ke malaia te tino tela e se puke tena pelu o katikati a tino ke mate!)

¹¹Muna a te Aliki, “A Moapi ne masani sale eiloa o nofo i te saogalemu, kae e seki ave fakapagota eiloa ki se fenua fakaatea. A Moapi e pela me se uaina tela ne tuku pela ke se fakagasue, kae e seki ligiligi atu eiloa mai i te sua tiā ki te sua tiā. A tena sua lei e seki fakamaseigina eiloa, kae e tumau eiloa tena gali i te inu.

¹²“Tela la, nei, ko oko mai te taimi ka uga atu ei ne au a tino ke ligi atu Moapi keatea e pela me se uaina. Ka ligi katoa ne latou ana tiā uaina ke masa, ko foafoa ei ne latou ke malikiliki.

¹³Tena la, ko tino Moapi eiloa ka se fiafia ki te lotou atua ko Kemoso, e pela eiloa mo tino Isalaelu kola ne ita ki te lotou atua ko Peteli, tela ne fakatuaga sale latou ki ei.

¹⁴“Tagata Moapi, ai a e fai ei koutou pela I a koutou ne tino takutakua, Ne sotia toa kola ko oti ne tofotofo i te taua?

¹⁵A Moapi mo ona fa'kai ko oti ne ofa; A tamataene lei eiloa o te fenua tena ko oti ne tamate. Au ko te tupu, te Aliki Malosi, Kae ko oti foki au ne faipati atu.

¹⁶A te malaia o Moapi ko pili mai; Ko pili nei kae maofa valevale.

¹⁷“Tagi fanoanoa mo te malo tena, koutou kona e nofo pili ki ei, Koutou katoa kola e iloa ne koutou tena tulaga takutakua. Fai aka pela,‘A tena pulega malosi ko oti ne ofa; A tena takutakua mo tena malosi ko seai.’

¹⁸Koutou kola e nofo i Tipono, Olo ifo mai i otou nofoaga fakaaloalogina o sagasaga i lalo i te laukele; A te fili tela e vau o fakamasei a Moapi ko i konei, Ko oti ne ofa ne ia a fa'kai malosi o Moapi.

¹⁹Koutou kona e nofo i Aloela, Tu i tafa o te auala kae fakatali; Fesili atu ki tino kona e tele keatea, Fai atu ki ei me se a te mea ne tupu.

²⁰Ka tali mai latou penei, ‘A Moapi ko takavale,’ ‘Tagi mo te fanoanoa me ko masiasi valevale. Folafola atu i fenua i tafa o te Vaitafe ko Alinona, I a Moapi ko masei valevale!’

²¹“A te Fakamasinoga ko oti ne oko mai ki fa'kai i te laukele laugatasi: ki Holono, Iaasa, Mefata,

²²Tipono, Nepo, Peta Tipalataima,

²³Kiliataima, Petakamula, Petameona,

²⁴Kaliota mo Posala. A te fakamasinoga ko oti ne oko mai ki fa'kai katoa o Moapi, fa'kai mao mo fa'kai pili.

²⁵A te malosi o Moapi ko oti ne tukipala; a tena malosi ko oti ne fakaseaoga. Ko au, te Aliki, tena ne faipati atu.”

²⁶Muna a te Aliki, “Fai Moapi ke konā, me ne teke mai ki a au. A Moapi ka takafilifili i luga i ona luaga, ka ko tino ka kata ki ei.

²⁷Moapi, e masaua ne koe a te fakaliliga ne koe o tino Isalaelu? Au faiga ne fai ki a latou, e pela eiloa latou me ne maua ne se potukau faomea.

²⁸“Koutou kona e nofo i Moapi, tiaki otou fa'kai! Olo o nofo i luga i kaupapa! Ke pela koutou me se lupe tela e fai tena ofaga i feitu o se vanu.

²⁹A Moapi ko oko eiloa i te fiasili! Au ko oti ne logo me ko oko eiloa i te fakamatamata kae fiasili, kae mafaufau pela i a latou ko se fakatau eiloa i te maluga.

³⁰A au, te Aliki, e iloa ne au olotou uiga fiasili. A olotou muna fakamatamata e seai se uiga, ka ko mea e fai ne latou e se tumau.

³¹Tela la, au ka tagi fanoanoa ona ko tino katoa i Moapi, pela foki a tino o Kila Helesi.

³²Au ka tagi ona ko tino o Sipima, e malosi atu toku tagi mo latou kona i lo tino o Iasela. Te fa'kai o Sipima, a koe e pela me se vine tela e oko ona kaula ki te Tai Mate, kae oko atu foki eiloa ki Iasela. Kae nei, a ou fuataga i te tau vela mo ou fuagavine ko oti ne fakamasei.

³³A te lifu mo te fiafia ko oti ne ave keatea mai i te laukele ola o Moapi. Ko oti ne fai ne au ke se toe tafe mai a te sua vine mai i koga faite uaina; ko seai se tino e faite ne ia a te uaina kae kalaga mo te fiafia.

³⁴“A tino o Hesepono mo Eleale ko tagi, kae e lagona atu eiloa te lotou tagi i te koga mao ko Iasa; e lagona mai foki ne tino i Soala, kae e lagona foki i Holonaima mo Ekelata Selisia. Ke oko foki eiloa ki te alia o Nimalima ko masa pakupaku.

³⁵Ka fakagata ne au te ofo taulaga a tino Moapi i olotou koga tapuaki, ka fakagata foki ne au olotou faiga taulaga ki olotou atua. Ko au, te Aliki, tena ne faipati atu.

³⁶“Tela la, a toku loto ko tagi fanoanoa ona ko Moapi mo Kila Helesi, e pela me se tino tela e fakatagi ne ia a te pese o te mate i te fulute, me i ana mea katoa ko galo katoa.

³⁷A latou katoa ko oti ne vele olotou ulu mo olotou talafa. Ne katikati katoa olotou lima, kae pei katoa ki gatu lautaga.

³⁸I tuafale katoa o fale i Moapi, pela foki i malae sautala katoa, a tino e tagi fanoanoa ona ko Moapi ko oti ne foa ne au e pela me se tia tela ko se manako ki ei se tino.

³⁹A Moapi ko masei valevale! Tagi ki luga! A Moapi ko oti ne fakamasiasigina. Ko maofa valevale, ka ko malo katoa i ona tafa ko fakalili ki ei. Ko au, te Aliki, tena ne faipati atu.”

⁴⁰A te Aliki ne tauto me e isi se malo ka oko mai ki Moapi e pela me se aeto tela e fakato ifo mo ona kapakau e fola,

⁴¹kae ka fakatakavale ne ia a fa'kai mo olo malosi o Moapi. I te aso tena, a sotia Moapi ka se fakatau eiloa i te mataku, pela eiloa me se fafine tela ka fai o fanau.

⁴²A Moapi ka ofa fakamasei, kae se toe taku me se malo, me ne teke mai ki a au.

⁴³A mea fakamataku, mo lua mo malei, ka fakatalitali o malei a tino Moapi. Ko te Aliki tena ne faipati.

⁴⁴So se tino e taumafai o tele ke sao mai i te mea fakamataku ka to ki loto i lua, ka ko so se tino e kake ki tua mo lua kona ka lave i te malei, me ko oti eiloa ne fakamoe ne te Aliki te taimi e ta fakamasei ei a Moapi.

⁴⁵A tino kola ne tele ke sao latou ko taumafai o tele ki Hesepono ke sao latou. Hesepono ko te fa'kai ne pule muamua ne te Tupu ko Sekono, kae nei ko ka i te afi.[37] A te afi ko ka i tuakoi mo mauga maluga o tino Moapi kola e fiafia ki taua.

⁴⁶Kalofa i tino Moapi! A tino kola ne tapuaki ki a Kemoso ko oti ne ta fakapalele, ka ko olotou tama tagata mo tama fafine ko oti ne ave fakapagota.

⁴⁷Kae i aso fakamuli, ka fai ne te Aliki a Moapi ke maumea. A mea katoa kona ne tupu, ko mea kola ne folafola ne te Aliki me e tupu ki a Moapi.