Read Te Tusi Tapu I Te Gana Tuvalu Lomiga Lua IELEMIA 49 Bible Online

IELEMIA 49 - Te Tusi Tapu I Te Gana Tuvalu Lomiga Lua bible

IELEMIA 49

¹ Konei a muna a te Aliki e uiga ki a Amoni: “Ko fea a tagata Isalaelu? E a, e seai se tino ke pulu ne ia te lotou fenua? Ai a ne talia ei ne latou ke o'mai a tino kola e tapuaki ki te atua ko Milikoma o puke a te laukele o Kato, kae nofo tumau i ei?

²Ka oko mai te taimi e fai ei ne au a tino o te fa'kai ko Lapa, te laumua o Amoni, ke lagona ne latou te leo o te taua, kae ka ofa ki lalo, mo ona fa'kai ka sunu ke ii ki lalo i te laukele. Tena la, ko toe puke ei ne Isalaelu a te laukele mai i tino kola ne o'mai o puke mai i a latou.

³Tagi, koutou tino Hesepono! A te fa'kai o Ai ko oti ne ofa! Tagi fanoanoa koutou fafine o Lapa! Pei ki gatu lautaga kae tagi fanoanoa. Tele sale mo te numi valevale o otou mafaufau. A te otou atua ko Milikoma ka ave fakapagota, fakatasi mo ana faitaulaga mo pelenise.

⁴Ai a e fakamatamata ei koutou, tino se fakamaoni? A te otou malosi ko fanaifo o seai. Ai a e fakalagolago ei koutou ki te otou malosi kae fai koutou pela me e seai se tino e mafai o vau o taua ki a koutou?

⁵Ka aumai ne au te mala ki a koutou mai i otou feitu katoa. A koutou ka tele katoa keatea. Ka tele eiloa te tino ki tena ola, kae ka seai se tino ke toe fakamaopoopo aka ne ia a potukau takitasi a koutou.

⁶“Kae fakamuli ifo, ka toe fai ne au a Amoni ke maumea. Ko au te Aliki, tena ne faipati atu.”

⁷ Konei a muna a te Aliki Malosi e uiga ki a Etoma: “E a, tefea te atamai o tino Etoma i te faiga o fuafuaga lei? E a, ko se mafai ne olotou tino fakatonutonu o taku ki a latou a te mea e tau o fai? E a, galo te atamai o latou?

⁸Tino o Titana, fuli o tele! Muni! Ka ta fakapalele nei ne au a tino i te gafa o Esau, me ko oko eiloa ki te taimi ko tau ei o fakasala ne au latou.

⁹Kafai ko tau ne tagata a fuagavine, e faka'toe ne latou ne fuagavine, kae kafai e o'mai a tino faomea i te po, e puke fua ne latou a mea e manako latou ki ei.

¹⁰Ka ko te gafa [38] o Esau ko oti ne fulu faka'ma ne au kae fakaasi aka foki ne au olotou koga muni, ko te mea ke se toe mafai o muni. A tino Etoma katoa ko oti ne ta katoa. E seai eiloa se tino ne toe.

¹¹A tamaliki ko mate olotou matua ke tuku mai ke tausi ne au. A fafine ko mate olotou avaga ke fakana mai ki a au.

¹²“Kafai a tino kola ne seki tau o fakasala kae ne inu foki eiloa ki te ipu o te fakasalaga, ko tena uiga, e seai eiloa se tino o koutou e se fakasala. E tau eiloa mo koutou o inu i te ipu o te fakasalaga!

¹³Ne tauto eiloa au i te fa'kai o Posala ka fai mo toafa, kae ka se kilogina eiloa i te mataga; ka fai a muna fakalili a tino ki ei, kae fakaaoga ne latou tena igoa i olotou muna fakamalaia. A fa'kai pili atu ki ei ka maofa ki te se gata mai. Ko au, te Aliki, tena ne faipati atu.”

¹⁴Ne fai atu au penei, “Etoma, e isi se fekau ko oti ne maua ne au mai i te Aliki. Ko oti ne uga mai ne ia tena avefekau ke fai ki malo ke maopoopo olotou kautau kae ke fakatoka o taua atu ki a koe.

¹⁵A te Aliki ka fai ne ia koe ke vaivai, kae ka seai se tino e fakaava atu ki a koe.

¹⁶A tou fiasili ko fakase ne ia a koe. A koe ne leake nei i tino ko oko eiloa i te mataku i a koe, kae tela la, e seai eiloa se tino e mataku i a koe. A koe e nofo i luga i kaupapa, i luga i ulu o mauga; e ui eiloa e maluga te koga e nofo ei koe e pela me se aeto, kae ka ave ifo eiloa koe ne te Aliki ki lalo. Ko te Aliki tena ne faipati atu.”

¹⁷Muna a te Aliki, “A te fakamaseiga tela ka oko mai ki Etoma ka se fakatau eiloa i te masei, tela la, a tino katoa kola e fakasili aka i te fa'kai tena ka poi kae mataku.

¹⁸ A te mea tena ka tupu ki Etoma, e pela eiloa mo te mea tela ne tupu ki a Sotoma mo Komolo, i te taimi ne fakamasei ei ne te Aliki fakatasi mo fa'kai foliki i o la tafa. E se toe ai eiloa se tino e toe nofo tumau i kona. Ko au, te Aliki, tena ne faipati atu.

¹⁹Au ka vau o fai a tino Etoma ke tele fakavave mai i te lotou fenua, e pela eiloa au me se leona tela e ulu mai i loto i te togā vao i tafa o te Iolitana o fano ki laukele moukuā. Tena la, ko te takitaki tela ne filifili ne au ka pule ne ia a te malo. Ko oi e mafai o fakapau mai ki a au? Ko oi e mafai o fia taua mai ki a au? Ko oi te takitaki e mafai o teke mai ki a au?

²⁰Tela la, fakalogo mai ki te fuafuaga tela ko oti ne fakatoka ne au e uiga mo tino Etoma, mo te mea tela e mafaufau au o fai ki tino i te fa'kai o Timanu. Ke oko foki eiloa ki olotou tamaliki e toso keatea eiloa, ka ko tino ka mataku katoa.

²¹Kafai ko siga Etoma, kae ka galulu te laukele mo te pakē o tena sigaga e fai eiloa i luga, mo te kalaga o tino i te poi ka lagona atu eiloa i te koga 'mao i te Mataosoga o Akapa.

²²A te fili ka taua mai ki Posala e pela me se aeto tela e fakato ifo mo ana kapakau e fola. I te aso tena, a sotia o Etoma ka se fakatau eiloa i te mataku, e pela eiloa me se fafine ka fai o fanau.”

²³ Konei a muna a te Aliki e uiga ki a Tamaseko: “A tino i fa'kai o Hamata mo Apata ko oko eiloa i te manavase kae fanoanoa ona ko oti ne lagona ne latou se tala se lei. Ko oko eiloa i te lotou manavase, ko se mafai ne latou o filemu.

²⁴A tino Tamaseko ko vaivai kae ko tele i te mataku. Ko oko eiloa i te fita kae fanoanoa, e pela me se fafine ka fai o fanau.

²⁵A te fa'kai takutakua tela e masani o nofo i ei te fiafia[39] ko seai eiloa ne tino e toe i ei.

²⁶I te aso tena, a tamataene o Tamaseko ka mate i auala o te fa'kai, mo ana sotia katoa ka mate katoa.

²⁷Ka 'sunu ne au a pui o Tamaseko, pela foki mo te palesi o te Tupu ko Peniata. Ko au, te Aliki Malosi, tena ne faipati atu.”

²⁸Konei a muna a te Aliki e uiga ki te matakaiga o Ketala mo kogā fenua kola e pule ne Hasola, kola ne fakatakavale ne Nepukanesa te tupu o Papelonia: “Taua atu ki tino Ketala, kae ta fakapalele atu a te matakaiga tena mai i te saegala!

²⁹Fao malo olotou faleie mo olotou lafu manu, mo pui laugatu o olotou faleie, mo mea katoa i loto i olotou faleie. Puke olotou kamela, kae fai atu ki tino penei, ‘A te fakamataku ko i otou feitu katoa!’

³⁰“Tino Hasola, a au, te Aliki, ko fai atu ki a koutou ke tele koutou o muni. A te tupu o Papelonia ko Nepukanesa ko fai tena aofaga o ta koutou, kae konei ana muna,

³¹‘O'mai! Tatou ka olo o taua atu ki tino kona e fai pela i a latou e nofo lei kae saogalemu! A te lotou fa'kai e seai ne ona mataloa, seai foki ne loka, kae e se puipui foki.’

³²“Puke olotou kamela mo olotou pulumakau! Ka fakasalalau ne au ki koga katoa a tino kola e kati mutu olotou ulu, kae ka aumai ne au a puapuaga ki luga i a latou mai i feitu katoa.

³³A te fa'kai ko Hasola ka fai mo toafa ki te se gata mai, te koga e nofo i ei a manu vao ko tiakolo. E se toe ai se tino e toe nofo tumau i kona. Ko au, te Aliki, tena ne faipati atu.”

³⁴I te fatoa otiga eiloa ne fakasopo a Setekaia ke fai mo tupu o Iuta, kae faipati mai te Aliki Malosi ki a au e uiga ki te fenua o Elama.

³⁵Muna a ia penei, “Ka tamate ne au a sotia sana i matasana kola ne fai ne latou a Elama ke takutakua.

³⁶Ka fakaagi ne au a te matagi mai i feitu katoa o Elama, kae fakasalalau ne au ona tino ki koga katoa, ke tofu a fenua katoa i tino ne sola mai i ei.

³⁷Ka fai ne au a tino Elama ke mataku i olotou fili, kola e fia tamate ki a latou. Ka ta fakapalele ne au a tino Elama i toku kaitaua, kae uga a kautau ke taua atu ki a latou, ke oko eiloa ki te taimi e fulu faka'ma ei ne au latou.

³⁸Ka ta ne au olotou tupu mo olotou takitaki; kae fakatu toku nofogaaliki i kona.

³⁹Kae fakamuli ifo, ko toe fai ei ne au a tino Elama ke maumea. Ko au, te Aliki, tena ne faipati atu.”