Read Te Tusi Tapu I Te Gana Tuvalu Lomiga Lua IELEMIA 5 Bible Online

IELEMIA 5 - Te Tusi Tapu I Te Gana Tuvalu Lomiga Lua bible

IELEMIA 5

¹Tino Ielusalema, 'tele i loto i auala o te otou fa'kai! 'Kilo aka ki otou feitu! 'Kilo ke lavea ne koutou! Olo o salasala i te maketi! E mafai o maua ne koutou se tino e tokotasi Tela e amiotonu kae taumafai o fakamaoni ki te Atua? Kafai e mafai o maua ne koutou se tino penā Kae ka fakamagalo ne te Aliki a Ielusalema.

²E ui eiloa e fai ake koutou pela i a koutou e tapuaki ki te Aliki, Kae e se fakauiga lele eiloa ne koutou otou pati kona e fai.

³A te Aliki e kilokilo eiloa ki tino fakamaoni. Ne fakasala ne ia koutou, kae e se fia 'saga mai lele eiloa koutou; Ne 'ta ne Ia koutou, kae e se 'saga lele eiloa koutou o 'fuli otou uiga. A koutou ne loto ma'keke kae se fia fulitua atu ki otou agasala.

⁴Tena la, ne mafaufau aka au penei, “A tino nei Ne tino ma'tiva fua kae se iloa se mea. E amio se 'tau; E se iloa ne latou a te mea e manako ki ei te lotou Atua, Te mea e manako te Aliki ke fai ne latou.

⁵Au ka fanatu ki tino o toku fenua i toku 'mana, O faipati ki a latou. E 'tau eiloa o iloa ne latou a te mea e manako ki ei te lotou Atua, Te mea e manako te Aliki ke fai ne latou.” Ka ko 'teke ne latou katoa a te pule a te Aliki, Kae ita ma faka'logo ki a Ia.

⁶Tena te pogai ka 'ta ei latou ne leona mai i te vao; Ka sae'sae likiliki latou ne kuli vao mai i te toafa, Ka ko lepoti ka olo sale fua i loto i olotou fa'kai. Kafai e olo ki tua a tino kona mai i olotou fa'kai, Kae ka sae'sae likiliki ne manu fe'kai Me ko to uke olotou agasala, Kae ko to fulitua 'soko atu ki te Atua.

⁷Ne fesili mai te Aliki penei, “Ai a ka fakamagalo ei ne au a agasala a toku fenua? Ne tiakina ne latou a au, Kae tapuaki atu ki atua kola e se ne atua 'tonu. Ne fagai ne au oku tino ke ma'kona, Kae ne fai eiloa ne latou te agasala ko te mulilua O fakaaoga olotou taimi o 'nofo sale mo fafine tali tagata.

⁸E pela latou me ne solofanua vao kola e 'kai makona, kae 'fonu i manakoga ma'sei; Ko fakatau ma'nako ki avaga a olotou tuakoi.

⁹Ko 'tau o fakasala ne au a latou, Kae taui atu ki a latou e tusa eiloa mo olotou amioga ma'sei ne fai.

¹⁰Ka uga atu ne au a te fili ke katikati ki lalo a togavine a oku tino, Kae ke se fakama'sei katoatoa. Ka fai au ki a latou ke 'kati ki lalo a kaula, Me i kaula kona e se aku.

¹¹A tino Isalaelu mo Iuta ne fakatogafiti ne latou a au. Ko au, te Aliki, tena ne faipati atu.”

¹²A te fenua o te Aliki ne taku fakaseaoga ne latou a te Aliki kae fai aka penei, “E se mafai eiloa ne Ia o fai se mea pena ki a tatou.[3] E seai ne fakalavelave e oko ki a tatou, seai ne taua, seai foki ne oge.”

¹³Ne fai olotou pati i pelofeta e pela fua me ne taga e 'fonu i matagi, kae e seai foki ne fekau e maua ne latou mai i te Aliki. A te Aliki te Atua Malosi ne fai mai ki a au penei, “Ielemia, ona ko tino konei ne faipati fakamatamata, tela la, ka fai ne au aku muna ke pela me se afi i tou gutu. A tino ka pela me ne fafie, kae ka 'sunu latou ne te afi.”

¹⁵Tino Isalaelu, a te Aliki ka aumai ne Ia se malo mai i se koga 'mao o 'ta koutou. Se malo taumua kae malosi, ka ko te 'gana a latou e se iloa ne koutou.

¹⁶A olotou tino 'poto i te sana ne sotia ma'losi kae e 'ta ne latou a tino mo te se a'lofa.

¹⁷Ka 'kai ne latou otou lakau kaina mo otou meakai; ka tamate ne latou otou tama tagata mo tama fafine. Ka 'ta valevale ne latou otou lafu mamoe mo lafu pulumakau kae ofa fakama'sei otou vine mo mati. A fa'kai kola ne puipui fakamalosi ne koutou, kola e fakatuaga koutou ki ei ka ofa katoa ne te lotou kautau.

¹⁸Muna a te Aliki, “Kae e ui eiloa i mea kona ne 'tupu i aso kona, kae e se 'ta fakapalele eiloa ne au a tino o toku fenua.

¹⁹Kafai e fesili mai me ai a ne fai ei ne au a mea katoa kona, fai ki ei e Ielemia, me e pela eiloa mo te fulituaga a latou ki a au o tavini atu ki atua fakaatea i te lotou fenua, ka pena foki nei latou me ka tavini atu ki tino fakaatea i se fenua fakaatea.”

²⁰Muna a te Aliki, “Fai atu ki te gafa o Iakopo, pela foki ki tino Iuta:

²¹Faka'logo mai koutou tino va'lea; e isi ne otou mata kae se ile, e isi ne otou taliga kae se 'logo.

²² Au ko te Aliki; ai a e se ma'taku mai ei koutou ki a au? Ai a e se pole'pole ei koutou i oku mua? Ne fakatoka ne au te one ke fai mo tuakoi o te tai, se tuakoi tumau tela e se mafai o oko ki ei te 'tai. A te 'tai e gasuesue kae se mafai o sopo atu ke silia mo te tuakoi; a galu e 'gulu kae se mafai o silia i te tuakoi.

²³Ka ko koutou, ko oko eiloa i te loto ma'keke kae loto 'teke, kae fulitua mai ki a au.

²⁴E seki mafaufau eiloa koutou o fakaaloalo mai ki a au, me ko au e avatu ne au a vaiua i te 'tau o te uaga muamua mo vaiua i te 'tau o te muakiga, kae avatu foki te 'tau o te katiga o te taukai i tausaga takitasi.

²⁵Ko otou agasala ko ala ei o se maua ne koutou a mea 'lei kona.

²⁶“A tino amio ma'sei e 'nofotasi mo oku tino; e ta'kato i lalo o fakatalitali, e pela me ne tino e 'fola olotou tili o 'po a manu eva. A latou kona ne 'tao olotou malei o faka'lave a tino.

²⁷E pela mo te tino po manu eva e faka'fonu tena lulu ki manu eva, e pena foki latou e faka'fonu olotou fale ki mea ne 'fao ma'lo ne latou mai i nisi tino. Tena te mea e mau'mea ei latou, kae ma'losi.

²⁸Tena foki te mea e 'puta ei latou me e 'kai ma'kona. E seai se gataga o olotou amioga ma'sei. E se fesoasoani ki tama'liki seai ne matua, e se a'lofa foki ki tino puapuagatia.

²⁹“Ko au, te Aliki, ka fakasala ne au a latou ona ko mea kona; ka taui atu ne au ki te malo tenei e tusa eiloa mo ana amioga se lei.

³⁰Ko oko eiloa i te mataga kae fakapoi a te mea tenei ko tupu i te fenua tenei:

³¹A pelofeta e fai'pati faeloa ki te 'loi; a faitaulaga e fai olotou pulepulega i te fakatonuga a pelofeta, ka ko oku tino e se ita lele eiloa. Se a la te mea ka fai ne latou manafai ko oko mai te ikuga?”