Read Te Tusi Tapu I Te Gana Tuvalu Lomiga Lua IELEMIA 50 Bible Online

IELEMIA 50 - Te Tusi Tapu I Te Gana Tuvalu Lomiga Lua bible

IELEMIA 50

¹ Tenei te fekau ne tuku mai ne te Aliki ki a au e uiga ki te fa'kai o Papelonia mo tino i ei:

²“Fakaasi atu te tala ki malo! Folafola atu te tala tena ki a latou! Fai aka se fakailoga kae folafola atu te tala! Sa funagina te tala tena! A Papelonia ko se aoga! A tena atua ko Matuku ko masei valevale! A tupua o Papelonia ko oti ne fakamasiasigina, A fakatusa o ana atua ko oti ne tukipala!

³“E isi se malo mai i matu tena ko oti ne vau o taua ki Papelonia, kae ka ofa ne ia ke pela me se toafa. A tagata mo manu ka tele keatea, kae ka seai se tino e nofo i kona.”

⁴Muna a te Aliki, “Kafai ko oko mai a te taimi tena, a tino Isalaelu mo Iuta ka tagi kae o'mai o sala a au, te Atua o latou.

⁵Ka fesili latou ki tino ki te auala ki Siona, ko olo ei latou i te auala tena. Ka fai ne latou se feagaiga tumau mo au, kae se toe ofa eiloa ne latou.

⁶“A toku fenua ko pela me ne mamoe kola ne tiakina ne olotou tausi mamoe ke galo i mauga. Ko oloolo sale fua latou pela me ne mamoe mai i te mauga ki sua mauga, kae ko puli i a latou a te koga tonu o latou.

⁷A tino katoa e fetaui mo latou e taua katoa ki a latou. Muna a olotou fili penei, ‘A latou ne agasala ki te lotou Aliki, tela la, a te mea ne fai ne tatou e se se mea se. A olotou tupuga ne fakatuaga ki te Aliki, ka ko latou ne tau o tumau te lotou fakamaoni ki a ia.’

⁸ “Tino Isalaelu, tele keatea mai i Papelonia! Tiaki te fenua tena! Taumafai ko koutou ke muamua o tele keatea mai i te fenua tena!

⁹Ka fakagasue aka ne au a malo malosi i matu ke o'mai o taua ki Papelonia. Ka fakalaina olotou kautau o taua atu ki Papelonia, kae ka fakatakavale eiloa ne latou. A latou ne tagata masani i afuli manu, ka ko olotou matasana e se mafai eiloa o seke mo te taketi.

¹⁰A mea taua i Papelonia ka 'fao malō katoa, ka ko tino kona e fao malō ne latou, ka puke katoa ne latou a mea kola e manako latou ki ei. Ko au, te Aliki, tena ne faipati atu.”

¹¹Muna a te Aliki, “Tino Papelonia, ne ta ne koutou toku malo. A koutou e lifu kae fiafia o olo sale pela me se pulumakau o lakalaka a saito, io me e pela me se solofanua e tagitagi.

¹²Ka ko te otou fa'kai takutakua ka fakaseaoga kae fakamasiasi. A Papelonia ka fai mo malo tafa eiloa ki lalo i malo katoa; ka fai mo toafa e seai ne vai i ei.

¹³Ona ko toku kaitaua, ka se toe ai eiloa se tino e nofo i Papelonia; ka maofa valevale, ka ko tino kola e fakasili aka i ona tafa ka poi kae ofo.

¹⁴“Sotia i matasana, fakatoka o nikoi kae taua atu ki Papelonia. Sana atu otou matasana katoa ki luga i Papelonia, me ne agasala mai ki a au, ko te Aliki.

¹⁵Kalaga ki te kalaga o te taua fakatamilo i te fa'kai! A Papelonia ko fakaseaogagina. A ona pui ko maofa ne ofa ne te fili. Ko taui ne au a te masei o Papelonia. Tela la, taui atu ki a latou a faiga masei kola ne fai ne latou ki nisi tino.

¹⁶Onoono ke mo a ne fuataga e toki i te fenua tena, ke mo a foki se taukai e maua i ei. A tino fakaatea katoa kola e nofo i te fenua tena ka mataku i te kautau kola e taua mai ki ei, tela la, ka foki atu ei latou ki olotou fenua.

¹⁷Muna a te Aliki, “A tino Isalaelu e pela me ne mamoe kola e afuli kae fakamafuta valevale ne leona. Ko te tupu o Asulia ne muamua o taua ki a latou, tao atu ki ei ko Nepukanesa, te tupu o Papelonia, ne vau o gugu olotou ivi.

¹⁸Ona ko te mea tena, ko au, te Aliki Malosi, te Atua o Isalaelu, ka fakasala ne au a te Tupu ko Nepukanesa mo tena fenua, e pela mo te fakasalaga ne au a te tupu o Asulia.

¹⁹Ka toe fakafoki mai ne au a tino Isalaelu ki te lotou fenua. Ka kai latou i mea e ola i luga i te Mauga o Kalamelu, pela foki i te laukele o Pasana, kae ka kai latou ki te mea e mafai ne latou, i fuataga o lakau kaina kola e ola i laukele o Efalaima mo Kileata.

²⁰Kafai e oko mai a te taimi tena, ka se toe ai se agasala e toe maua i luga i Isalaelu, se toe ai foki se amioga masei e fai i Iuta, me ka fakamagalo ne au a tino kola ne fakasao ne au olotou ola. Ko au, te Aliki, tena ne faipati atu.”

²¹Muna a te Aliki, “Taua atu ki tino Melataima mo tino Pelota. Ta fakapalele atu latou.[40] Fai a mea katoa kola ne fakatonu atu ne au. Ko au, te Aliki, tena ne faipati atu.

²²A te leo o te taua ko lagona i te fenua, kae ko oko eiloa i te lasi o te fakamaseiga.

²³A te lalolagi ne tukipala ne Papelonia, kae nei a Papelonia ko se aoga! A malo katoa ko oko eiloa i te poi i te mea ne tupu ki te fenua tena.

²⁴Papelonia, a koe ne taua mai ki a au, kae ne lavelave koe i te malei tela ne tao ne au ke lave koe i ei, kae e seiloa eiloa ne koe.

²⁵Ko oti ne tala ne au a te koga tela e teu ei aku meatau, kae ko oti ne tapale mai ne au ki tua ona ko toku kaitaua, me i a au, te Aliki Sili i te Malosi, e isi se galuega e fia fai ne au i Papelonia.

²⁶Taua atu ki ei mai i feitu katoa, kae ofa a te koga tela e teu ei ana saito! Fakaputu a mea kona ne fao malo ne koutou e pela me se fakaputuga saito! Ta fakamasei te fenua! Sa fakatoegina eiloa se mea!

²⁷Tamate katoa a olotou sotia! Ta ke mate! A tino Papelonia ko malaia! Ko oko mai eiloa te taimi e tau ei o fakasala latou!”

²⁸(A tino ne sola mai mai Papelonia ne o'mai ki Ielusalema, kae ne fakamatala mai ne latou a te mea ne fai ne te Aliki te motou Atua ki tino Papelonia, o taui te mea ne fai ne latou ki tena Faletapu.)

²⁹ “Fai atu ki sotia i matasana ke taua atu ki Papelonia. Uga atu a tino katoa kola e iloa ne latou o fakaaoga a te kausana mo te matasana. Nikoigina a te fa'kai, kae onoono ke mo a se tino e tele keatea mai i te fa'kai. Taui atu a te mea ne fai ne latou ki nisi fa'kai, me ne fakamatamata o fia teke mai ki a au, te Tasi Tapu o Isalaelu.

³⁰Tela la, a ona tamataene ka mate i auala o te fa'kai, mo ona sotia ka ta katoa i te aso tena. Ko au, te Aliki, tena ne faipati atu.

³¹“Papelonia, a koe ko oko eiloa i te fakamatamata, tela la, a au, te Aliki Sili i te Malosi, e se fiafia ki a koe! Ko oko eiloa ki te taimi ka fakasala ei koe ne au.

³²A tou malo fiasili ka siga kae takavale, kae ka seai se tino e puke atu o fakatu aka koe ki luga. Ka sunu ne au ou fa'kai, kae ka masei valevale a mea katoa i ou tafatafa.”

³³Muna a te Aliki Malosi penei, “A tino Isalaelu mo Iuta ko pule fakasauagina. A malo kola ne fakatakavale ne latou a Isalaelu mo Iuta e sai mautakitaki eiloa ne latou kae se tuku eiloa ke saoloto.

³⁴Ka ko ia tela ka fakasao ne ia latou e malosi, a tena igoa ko te Aliki Malosi. Ko ia ka fesoasoani ki a latou, kae aumai ne ia a te filemu ki te lalolagi, ka ko te puapuaga ki te kau Papelonia.”

³⁵Muna a te Aliki, “Tamate a tino Papelonia! Tamate atu ona tino, Ona takitaki, mo ona tagata poto.

³⁶Tamate atu a ona pelofeta loi — Ne pelofeta valea fua! Tamate atu a ona sotia — Ko oko eiloa i te mataku!

³⁷Ta atu a solofanua kae ofa a kaliota! Tamate atu a sotia kona ne togi mai ne latou — Ne sotia vaivai fua! Fakamasei atu ona koloa; Puke kae 'fao malō.

³⁸Aumai te oge vai ki tena laukele Kae faka'masa a ona vaitafe. A Papelonia se fenua e uke i ei a tupua fakamataku, Kola ne fakasegina ei a tino.

³⁹ “Tela la, a Papelonia ka fonu i temoni mo agaga masei,[41] mo manu eva se ma i feitu fakatapuakiga. Ka se toe ai ne tino e nofo i kona, ka se toe ai eiloa ke oko ki te se gata mai.

⁴⁰ A te mea ka tupu ki Papelonia e pela eiloa mo te mea, ne tupu ki Sotoma mo Komolo, i te taimi ne ta fakamasei ei ne au, fakatasi mo fa'kai i o la tafatafa. E se toe ai ne tino e toe nofo i kona. Ko au, te Aliki, tena ne faipati atu.

⁴¹“A tino konei ko o'mai mai i te fenua i matu, Se malo malosi mai i se koga mao; E tokouke a tupu ko fakatokatoka mo te taua.

⁴²Ko oti ne puke olotou kausana mo olotou pelu; A latou ne tino masei kae se alofa. Kafai e tele mai i olotou solofanua, E pela eiloa mo te gulu o te tai. Ko toka o taua mai ki Papelonia.

⁴³A te tupu o Papelonia ko logo i te tala, Tela la, ko tautau fua ona lima i ona feitu i te vaivai. Ko oko eiloa i ana manavase, Kae mae pela me se fafine ka fai o fanau.

⁴⁴“Au, te Aliki, ka vau o fai a tino Papelonia ke tele fakavave keatea mai i te lotou fa'kai, e pela me se leona tela e ulu mai i te togavao pupu i tafa o te Iolitana o fanatu ki te laukele moukuā kae lauusiusi. Tena la, ko te takitaki tela ne filifili ne au ka pule ne ia a te malo. Ko oi e mafai o fakapau mai ki a au? Ko oi e mafai o fia taua mai ki a au? Ko oi te takitaki e mafai o teke mai ki a au?

⁴⁵Tela la, fakalogo mai ki te fuafuaga tela ko oti ne fai ne au o teke atu ki Papelonia, mo te mea e mafaufau au o fai ki ona tino. Ke oko foki eiloa ki olotou tamaliki ka toso keatea, ka ko tino katoa ka mataku.

⁴⁶Kafai ko siga a Papelonia, kae ka paku eiloa i luga, mo te lalolagi ka galulu, mo te tagi o tino ka lagona mai eiloa mai i nisi malo.”