Read Te Tusi Tapu I Te Gana Tuvalu Lomiga Lua IELEMIA 51 Bible Online

IELEMIA 51 - Te Tusi Tapu I Te Gana Tuvalu Lomiga Lua bible

IELEMIA 51

¹Muna a te Aliki, “Ka fakaagi mai ne au se matagi tela ka ana fakamaseigina[42] a Papelonia mo tino i ei.

²Ka uga mai ne au a tino fakaatea ke o'mai o ta fakamasei a Papelonia, e pela me se matagi tela e agi keatea ne ia a kausaito. Kafai ko oko mai a te aso o te fakamaseiga tena, ka taua atu latou ki Papelonia mai i feitu katoa, kae ka se aoga valevale a te fenua.

³Sa tukuatu se avanoa ki ona sotia ke mafai o sana olotou matasana, io me pei olotou gatu tau. Sa fakasaogina a tamataene! Ta fakapalele atu a te kautau katoa!

⁴Ka pakia latou kae mate i auala o olotou fa'kai.

⁵Au, te Aliki te Atua Malosi, e seki tiakina ne au a Isalaelu mo Iuta, e ui eiloa ne agasala mai ki a au, te Tasi Tapu o Isalaelu.

⁶Tele keatea mai i Papelonia! Tele ke ola koutou! Ke mo a koutou e mate ona ko te agasala a Papelonia. Ko fakasala nei ne au a latou e tusa eiloa mo olotou mea ne fai.

⁷ A Papelonia ne pela me se ipu aulo i toku lima, tela ne fai ne ia te lalolagi ke konā. A malo ne inu ki te uaina a Papelonia tena ne mamio ei olotou mafaufau.

⁸A Papelonia ko takavale kae masei valevale! Tagi fanoanoa i tena takavale! Aumai ne vailakau mo tena pakiaga, e se taumate e iku o lei tena pakiaga.

⁹ A tino fakaatea kona ne nofo i kona ne fai aka penei, ‘A matou ne taumafai o fesoasoani ki Papelonia, kae ko talimuli masei eiloa. Tatou ka na foki ki otou fenua, kae tiaki atu a Papelonia. Ne fakasala ne te Atua a Papelonia i tena malosi katoa, kae ne ta fakamasei eiloa ne ia.’ ”

¹⁰Muna a te Aliki, “A oku tino ne kalaga penei, ‘Ko oti ne fakailoa atu ne te Aliki i a tatou e tonu. Tatou ka olo o fai ki tino i Ielusalema a te mea ne fai ne te Aliki te tou Atua.”’

¹¹A te Aliki ko oti ne fakagasue aka ne ia a tupu o Metai, me i te Aliki e fakamoemoe o ta fakamasei a Papelonia. E taui pena ne ia a te fakamaseiga o tena Faletapu. A ofisa a kautau kola ka taua atu ki Papelonia ne fai atu olotou fakatonuga penei, “Fakamata otou matasana! Fakatoka otou talita!

¹²Tuku atu te fakailoga ke olo atu te kautau o ofa a pui o Papelonia. Fakatokouke te kau leoleo! Sotia leoleo ke tuku ki olotou tulaga! Fakatulaga fakalei te kau alamati!” Ko oti ne fai ne te Aliki a te mea tela ne folafola mai ne ia me fai ki tino Papelonia.

¹³ A te fenua tena e uke ona vaitafe kae lasi tena maumea, kae nei, ko oti atu ona aso, kae ko oko eiloa ki te taimi ka fakagata ei tena malosi.

¹⁴A te Aliki Malosi ne tauto ki a ia eiloa me ka aumai ne ia ne tagata e tokouke e pela me ne muimuiga a se akelise, o taua atu ki Papelonia, kae ka kalaga eiloa latou i te manumalo.

¹⁵Ne faite ne te Aliki a te lalolagi ki tena mana; Ne faite ne Ia a te lalolagi kae fola a te lagi ki tena poto.

¹⁶A vai mai luga atu o te lagi[43] e 'gulu; E fakamaopoopo mai ne ia a kaumana mai i feitu o te lalolagi. E faka'lapa ne Ia a uila i te taimi e to ei te vaiua, Kae fakaagi mai ne Ia te matagi mai i te koga e teu sale ne Ia i ei.

¹⁷Kafai e lavea ne tino a mea kona, Kae ka lagona ifo ne tino i a latou e valea kae se aoga i mua o te Atua; A tino kola e faite tupua ko se fiafia, Me i atua kola e faite ne latou ne atua loi fua kae se ola.

¹⁸A atua kona ne atua mate fua, Kae e tau o se fiafia ki ei a tino; Ka fakamasei ne te Aliki a atua kona, Manafai ko oko ki te taimi ka saga mai ei a ia o ta latou.

¹⁹A te Atua o Iakopo e se pau mo atua kona; Ko Ia ne faite ne Ia a mea katoa, Kae ne filifili foki ne Ia a Isalaelu ke fai mo fenua tonu o Ia. A tena igoa ko te Aliki Malosi.

²⁰Muna a te Aliki, “Papelonia, a koe ko taku samala, ko taku meatau o te taua. Ne fakaaoga ne au a koe o tukipala ki ei a fenua mo malo,

²¹'Ta a solofanua mo tino e 'sopo i ei, Ofa a kaliota kae ta a tino e fakatele ne latou,

²²Tamate a tagata mo fafine, 'Ta a tino matua mo tino koi tupu aka, Tamate a tamaliki tagata mo tamaliki fafine,

²³Tamate a tausi mamoe mo olotou lafu, Ta a tino fakamalū laukele mo olotou solofanua, Tukipala a takitaki mo ofisa maluga.”

²⁴Muna a te Aliki, “Ka lavea ne koutou me ka taui ne au ki Papelonia mo ona tino e tusa eiloa mo amioga masei kola ne fai ne latou ki Ielusalema.

²⁵Papelonia, a koe e pela me se mauga tela e ta fakamasei ne ia a te lalolagi katoa, ka ko au, te Aliki, ko tou fili. Ka puke atu au ki a koe, kae fakalaugatasi ne au a koe mo te laukele, kae tiakina ne au a koe me ko ou lefu fua e toe mai.

²⁶E seai eiloa se fatu i ou fale kona ne maofa e toe fakaaoga mo toe faite se isi fale. A koe ka pela me se toafa ki te se gata mai. Ko au, te Aliki, tena ne faipati atu.

²⁷“Tuku atu se fakailoga ke kamata o olo o taua! Fakatagi te pu ko te mea ke lagona ne malo! A malo ke fakatoka ki te taua mo Papelonia! Fai atu ki malo o Alalata, Mini, mo te malo o Asekenasa ke taua atu. Fili aka se ofisa ke takitaki ne ia te kautau. Aumai ki mua a solofanua pela me se muimuiga a se akelise.

²⁸A malo ke fakatoka ki te taua mo Papelonia. Uga atu te fekau ki tupu o Metai ke o'mai, fakatasi mo takitaki mo ofisa, mo kautau a fenua katoa kola e pule ne latou.

²⁹A te lalolagi ko polepole kae galulu, me i te Aliki ko fakataunu a tena fuafuaga ki te faiga o Papelonia ke pela me se toafa, te koga e seai se tino e nofo i ei.

³⁰A sotia o Papelonia ko se taua, kae ko nofo mai fua i olotou olo malosi. Ko seai ne olotou loto toa, kae ko pela fua me ne fafine. A mataloa o te fa'kai ko oti ne ofa ki lalo, mo fale ko ka valevale.

³¹E tokouke a avefekau ne tele ki te tupu o Papelonia o fakailoa ki ei i tena fa'kai ko oti ne ofa ne te fili a ona feitu katoa.

³²Ko oti ne puke ne te fili a te auala ki te sua feitu o te vaitafe, kae sunu a olo o Papelonia. A sotia Papelonia ko oko eiloa i te mataku.

³³E se leva nei, kae ka ta latou ne te fili kae lakalaka pela me ne saito i te koga solo saito. Ko au, te Aliki Malosi, te Atua o Isalaelu tena ne faipati atu.”

³⁴A te tupu o Papelonia ne katikati fakaseaoga ne ia a Ielusalema Kae kai ne ia. Ne ta fakapalele ne la a te fa'kai pela me se tia ne ligi faka'masa; Ne folo ne ia te fa'kai pela me se manu fakamataku tela e folo tena meakai. E puke ne ia a mea kola e manako a ia ki ei, kae pei keatea te toega.

³⁵A tino o Siona ke fai ake penei, “A te fakasauaga tela ne oko ki a tatou, Ko Papelonia ke paku ki ei te se tena!” A tino Ielusalema ke fai aka penei, “A te puapuaga tela ne fita ei tatou, Ko Papelonia ke paku ki ei te se tena!”

³⁶Tena la, ne fai atu ei te Aliki ki tino Ielusalema penei, “Ka kau atu au ki te otou mea tena e taumafai o fai, kae ka taui ne au ki otou fili e tusa mo te mea ne fai ne latou ki a koutou. Ka faka'masa pakupaku ne au a te koga e aumai ei te vai ki Papelonia, pena foki a ona vaitafe.

³⁷A te fenua tena ka pela me se fakaputuga o mea ne maofa, kola e nofo i ei a manu o te vao. Ka se kilogina eiloa i te mataga; ka seai se tino e nofo i kona, ka ko tino katoa e kilo ki ei ka mataku.

³⁸A tino Papelonia katoa e gulu pela me ne leona kae tagitagi pela me ne tama leona.

³⁹E a, a latou na e mata sogea fua? Ka fakatoka ne au se 'kaiga mo latou, kae fai ne au ke kona kae fiafia. Ka moe latou se toe ala ake eiloa.

⁴⁰Ka ave ne au a latou ke tamate, pela me ne tamā mamoe, mo kouti, mo mamoe tagata. Ko au, te Aliki, tena ne faipati atu.”

⁴¹Muna a te Aliki e uiga ki a Papelonia: “A te fa'kai tela e tavaegina ne te lalolagi ko oti ne fakatakavale! A malo ko oko eiloa i te mataku manafai e kilo ki a Papelonia!

⁴²A te tai ko tafe ki luga i Papelonia kae ko fati valevale a galu i luga i ei.

⁴³A fa'kai ko se kilogina eiloa i te fakamataku, kae ko pela me se toafa seai ne vai i ei, tela e seai ne tino e nofo i ei, seai foki ne tino e olo sale i ei.

⁴⁴Ka fakasala ne au a Pele, te atua o Papelonia, kae fai ne au ke fakaasi aka a mea kola ne kaisoa ne ia; ka se toe tapuaki eiloa a malo ki a ia. “A pui o Papelonia ko maofa.

⁴⁵Tino Isalaelu, tele keatea mai i kona! Tele ke sao koutou mai i toku kaitaua fakamataku.

⁴⁶Sa fakavaivai otou loto io me mataku ona ko tala e lagona ne koutou. I tausaga takitasi, e isi faeloa se tala se mautinoa e fai ne tino — ne tala o te fakasauaga i te fenua, mo tala o tupu e taua ki nisi tupu.

⁴⁷Tela la, ko oko mai te taimi e saga atu ei au o fakamasei a tupua o Papelonia. Ka fakamasiasi ne au a te fenua katoa, kae tamate a tino katoa i ei.

⁴⁸ A mea katoa i te lagi mo te lalolagi ka kalaga mo te fiafia, manafai ko takavale a Papelonia i tino kola ne o'mai mai i matu o ta fakamasei.

⁴⁹ Ko Papelonia ne pogai ei te mate o tino e tokouke o te lalolagi, tela la, a Papelonia i te taimi nei ka fakatakavale, me ko ia ne pogai ei te mate o tino Isalaelu e tokouke. Ko au, te Aliki, tena ne faipati atu.”

⁵⁰Muna a te Aliki ki tino o tena fenua i Papelonia: “A koutou ko sao mai i te mate! Na olo nei! Sa fakatali! E ui eiloa e mao koutou mai i te otou fenua, kae mafaufau mai ki a au, te otou Aliki, kae manatua a Ielusalema.

⁵¹E fai ake otou muna penei, ‘A matou ko oti ne fakamasiasigina, kae fai ke ma; ko lagona ifo eiloa ne matou me ko seai eiloa se mea e mafai o fai ne matou, me i tino fakaatea ko oti ne puke ne latou a koga tapu i te Faletapu.’

⁵²Tela la, au ko fai atu me ko oko mai te taimi ka saga atu ei au o ofa a tupua o Papelonia, ka ko tino pakia i te fenua ka tagi fita.

⁵³E ui eiloa me e kake Papelonia ki te lagi o faite tena olo malosi i ei, kae e uga atu eiloa ne au a tino ke olo o fakamasei tena olo tena. Ko au, te Aliki, tena ne faipati atu.”

⁵⁴Muna a te Aliki, “Fakalogo ki te leo o tino e tagi i Papelonia, E tagi fanoanoa ona ko te fakamaseiga o te fenua.

⁵⁵Ko ofa fakamasei nei ne au a Papelonia kae fakafilemu. A kautau ko tele atu o taua pela me ne galu e gulu, Kae taua atu mo olotou leo e kalaga eiloa i luga.

⁵⁶Ko o'mai o ta fakamasei a Papelonia; A sotia o Papelonia ko takavale, Mo olotou kausana ko oti ne fatifati. Au se Atua tela e fakasala ne au a tino amio masei, Kae ka fakasala ne au a Papelonia E tusa eiloa mo tena mea ne fai.

⁵⁷Ka fai ne au a ona takitaki ke kona — Ko tagata poto, mo takitaki, mo sotia. Ka olo latou o moe, ko se toe ala ake eiloa. Ko au, te tupu, tena ne faipati atu, Ko au, ko te Aliki Malosi.

⁵⁸A pui o Papelonia, te fa'kai malosi, Ka maofa ki lalo i te laukele, Mo ona mataloa maluga ka sunu ke ii ki lalo i te laukele. A te galuega a malo ne fai ko seai se aoga; A mea ne fita ki ei latou ko ula i te afi. Ko au, te Aliki Malosi, tena ne faipati atu.”

⁵⁹A te tavini fesoasoani a te Tupu Setekaia, ko Selaia te tama tagata a Nelia kae ko te mokopuna o Maseia. I te fa o tausaga o te nofoaiga a Setekaia te tupu o Iuta, kae ne fai ke olo laua mo Selaia ki Papelonia, tena ne tuku atu ei ne au ne fakatonuga ki a Selaia.

⁶⁰Ne tusi ne au i te tusi, a te tala katoa o te fakamalaiaga tela ka oko mai ki Papelonia, pela foki mo nisi mea ake e uiga ki a Papelonia.

⁶¹Ne fai atu au ki a Selaia penei, “Kafai e oko atu koe ki Papelonia, manatua eiloa o faitau atu ki tino i te leo maluga, a mea katoa kona e tusi i te tusi tena.

⁶²Ka oti, ko talo atu ei koe penei, ‘Te Aliki, a koe ne fai mai me e ofa fakamasei ne koe a te koga tena, ko te mea ke seai eiloa se mea ola e toe i ei, me se tino io me se manu, kae ka fai mo toafa ki te se gata mai.’

⁶³ Selaia, kafai ko oti ne faitau atu ne koe a te tusi tena ki tino, ko sai ei ki se fatu, ko ave ei ne koe o pei ki te Vaitafe ko te Eufilate,

⁶⁴kae fai atu mo au muna penei, ‘Tenei te mea ka tupu ki a Papelonia — ka apulu ki lalo kae se toe sae aka eiloa, ona ko te fakamaseiga tela ka aumai ne te Aliki ki ei.”’[44] Ko gata i kona a muna a Ielemia.